ಮಾಸ್ಕೋ: ಇರಾನ್ ಮತ್ತು ಇಸ್ರೇಲ್ ನಡುವಿನ ಸಂಘರ್ಷ ದಿನಕ್ಕೊಂದು ತಿರುವು ಪಡೆಯುತ್ತಿದ್ದು, ಈಗ ರಷ್ಯಾ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ ಅವರ ಒಂದು ನಡೆ ಇಡೀ ವಿಶ್ವದ ಗಮನ ಸೆಳೆದಿದೆ. ಇರಾನ್ ಬೆಂಬಲಕ್ಕೆ ರಷ್ಯಾ ಅಧಿಕೃತವಾಗಿ ಮಿಲಿಟರಿ ಸಹಾಯ ಘೋಷಿಸುವ ಸೂಚನೆ ಸಿಗುತ್ತಿದ್ದು, ಇದು ಅಮೆರಿಕ ಮತ್ತು ಇಸ್ರೇಲ್ಗೆ ಹೊಸ ಸವಾಲಾಗಿ ಪರಿಣಮಿಸಿದೆ.
ಇರಾನ್ನ ವಾಯುಪ್ರದೇಶವನ್ನು ರಕ್ಷಿಸಲು ರಷ್ಯಾ ತನ್ನ ಅತ್ಯಾಧುನಿಕ ವಾಯು ರಕ್ಷಣಾ ವ್ಯವಸ್ಥೆಗಳನ್ನು (Air Defense Systems) ಒದಗಿಸಲು ಮುಂದಾಗಿದೆ ಎನ್ನಲಾಗುತ್ತಿದ್ದು, ಇದು ಇಸ್ರೇಲ್ನ ವೈಮಾನಿಕ ದಾಳಿಗಳಿಗೆ ಅಡ್ಡಿಯಾಗಬಹುದು.ಇತ್ತೀಚೆಗಷ್ಟೇ ರಷ್ಯಾ ಮತ್ತು ಇರಾನ್ ನಡುವೆ ನಡೆದ ಉನ್ನತ ಮಟ್ಟದ ಭೇಟಿಯಲ್ಲಿ ‘ವ್ಯಾಪಕ ಕಾರ್ಯತಂತ್ರದ ಪಾಲುದಾರಿಕೆ’ಗೆ ಸಹಿ ಹಾಕಲಾಗಿದೆ. ಇದು ಕೇವಲ ವ್ಯಾಪಾರಕ್ಕೆ ಸೀಮಿತವಾಗಿರದೆ, ಯುದ್ಧದ ಸಮಯದಲ್ಲಿ ಪರಸ್ಪರ ಸೈನಿಕ ನೆರವು ನೀಡುವುದನ್ನೂ ಒಳಗೊಂಡಿದೆ ಎಂಬ ಆತಂಕ ಮೂಡಿದೆ.
ರಷ್ಯಾ ಈ ಸಂಘರ್ಷದಲ್ಲಿ ನೇರವಾಗಿ ಭಾಗಿಯಾದರೆ ಅದು ‘ಮೂರನೇ ಮಹಾಯುದ್ಧ’ಕ್ಕೆ ನಾಂದಿಯಾಗಬಹುದು ಎಂದು ಅಮೆರಿಕದ ಗುಪ್ತಚರ ಇಲಾಖೆ ಎಚ್ಚರಿಸಿದೆ. ಪುಟಿನ್ ಅವರ ಈ ನಡೆ ಅಂತರಾಷ್ಟ್ರೀಯ ಮಟ್ಟದಲ್ಲಿ ದೊಡ್ಡ ಬೆದರಿಕೆಯಾಗಿ ಕಾಣುತ್ತಿದೆ.ರಷ್ಯಾದ ತಂತ್ರಜ್ಞಾನ ಇರಾನ್ ಕೈ ಸೇರಿದರೆ, ಇಸ್ರೇಲ್ನ ‘ಅಯನ್ ಡೋಮ್’ ತಂತ್ರಜ್ಞಾನಕ್ಕೆ ಕಠಿಣ ಸವಾಲು ಎದುರಾಗಬಹುದು ಎಂದು ರಕ್ಷಣಾ ತಜ್ಞರು ವಿಶ್ಲೇಷಿಸುತ್ತಿದ್ದಾರೆ.
