ಬೆಂಗಳೂರು: ಬೇಸಿಗೆಯ ಸುಡುವ ಬಿಸಿಲಿನ ನಡುವೆಯೇ ರಾಜ್ಯದ ಮಾಂಸಪ್ರಿಯರಿಗೆ ಈಗ ಬೆಲೆ ಏರಿಕೆಯ ಬಿಸಿ ತಟ್ಟಿದೆ. ಬೇಸಿಗೆಯ ಹವಾಮಾನ ವೈಪರೀತ್ಯದ ಹಿನ್ನೆಲೆಯಲ್ಲಿ ಚಿಕನ್ ಹಾಗೂ ಮಟನ್ ದರಗಳು ಗಗನಕ್ಕೇರಿದ್ದು, ಗ್ರಾಹಕರ ಜೇಬಿಗೆ ಕತ್ತರಿ ಬೀಳುತ್ತಿದೆ.
ಚಿಕನ್ ದರದಲ್ಲಿ ಭಾರೀ ಜಿಗಿತ
ಕಳೆದ ಕೆಲವು ದಿನಗಳ ಹಿಂದೆಯಷ್ಟೇ ಕೆ.ಜಿ.ಗೆ ₹330 ಆಸುಪಾಸಿನಲ್ಲಿದ್ದ ಸ್ಕಿನ್ಲೆಸ್ ಚಿಕನ್ ಬೆಲೆ ಈಗ ₹400ರ ಗಡಿ ತಲುಪುತ್ತಿದೆ. ಬೆಂಗಳೂರಿನಲ್ಲಿ ಚಿಕನ್ ದರ ₹300 ದಾಟಿದ್ದರೆ, ನೆರೆರಾಜ್ಯಗಳಾದ ಆಂಧ್ರಪ್ರದೇಶ ಮತ್ತು ತೆಲಂಗಾಣದಲ್ಲಿ ಇದು ₹400ರ ವರೆಗೆ ಮಾರಾಟವಾಗುತ್ತಿದೆ. ಪ್ರಸ್ತುತ ಮಾರುಕಟ್ಟೆಯಲ್ಲಿ ಲೈವ್ ಬರ್ಡ್ ದರ ₹207ರಷ್ಟಿದ್ದರೆ, ಸ್ಕಿನ್ಲೆಸ್ ಚಿಕನ್ ದರ ₹350 ರಿಂದ ₹400ರ ನಡುವೆ ಇದೆ.
ಮಟನ್ ಬೆಲೆಯೂ ದುಬಾರಿ
ಚಿಕನ್ ಮಾತ್ರವಲ್ಲದೆ ಮಟನ್ ಬೆಲೆಯೂ ಸಾಮಾನ್ಯ ಜನರ ಕೈಗೆಟುಕದಂತಾಗುತ್ತಿದೆ. ಮಾರುಕಟ್ಟೆಯಲ್ಲಿ ಒಂದು ಕೆ.ಜಿ. ಮಟನ್ ಬೆಲೆ ₹800 ರಿಂದ ₹1000 ವರೆಗೆ ಏರಿಕೆಯಾಗಿದ್ದು, ಹಬ್ಬದ ಸೀಸನ್ನಲ್ಲಿ ಗ್ರಾಹಕರು ಮಾಂಸ ಖರೀದಿಸಲು ಹಿಂದೇಟು ಹಾಕುವಂತಾಗಿದೆ.
ಬೆಲೆ ಏರಿಕೆಗೆ ಪ್ರಮುಖ ಕಾರಣಗಳೇನು?
ಮಾಂಸದ ದರ ದಿಢೀರ್ ಏರಿಕೆಯಾಗಲು ಮಾರುಕಟ್ಟೆಯ ತಜ್ಞರು ಈ ಕೆಳಗಿನ ಕಾರಣಗಳನ್ನು ನೀಡಿದ್ದಾರೆ:
ಬಿಸಿಲ ಬೇಗೆ ಮತ್ತು ಉತ್ಪಾದನೆ ಕುಸಿತ: ತೀವ್ರವಾದ ಬಿಸಿಲಿನಿಂದಾಗಿ ಕೋಳಿಗಳು ಸಾವನ್ನಪ್ಪುತ್ತಿವೆ. ಇದರಿಂದ ಕಂಗಾಲಾಗಿರುವ ಸಾಕಾಣಿಕೆದಾರರು ಉತ್ಪಾದನೆಯನ್ನು ಅರ್ಧಕ್ಕೆ ಇಳಿಸಿದ್ದಾರೆ. ಈ ಹಿಂದೆ 1 ಲಕ್ಷ ಕೋಳಿ ಸಾಕುತ್ತಿದ್ದವರು ಈಗ ಕೇವಲ 50 ಸಾವಿರಕ್ಕೆ ಮಿತಿಗೊಳಿಸಿದ್ದಾರೆ.
ಸಾಕಾಣಿಕೆ ವೆಚ್ಚದಲ್ಲಿ ಏರಿಕೆ: ಕೋಳಿ ಮರಿಗಳ ಬೆಲೆ ₹45 ರಿಂದ ₹61ಕ್ಕೆ ಏರಿಕೆಯಾಗಿದೆ. ಇದರೊಂದಿಗೆ ಕೋಳಿ ಆಹಾರ (Feed) ಮತ್ತು ಸಾಗಾಣಿಕೆ ವೆಚ್ಚವೂ ಅಧಿಕವಾಗಿರುವುದು ಬೆಲೆ ಏರಿಕೆಗೆ ಪೂರಕವಾಗಿದೆ.
ರೈತರ ಆತಂಕ: ಹವಾಮಾನ ವೈಪರೀತ್ಯದಿಂದಾಗಿ ಹೊಸದಾಗಿ ಕೋಳಿ ಸಾಕಲು ರೈತರು ಮುಂದೆ ಬರುತ್ತಿಲ್ಲ. ಇದು ಮಾರುಕಟ್ಟೆಗೆ ಕೋಳಿಗಳ ಪೂರೈಕೆಯಲ್ಲಿ ವ್ಯತ್ಯಯ ಉಂಟುಮಾಡಿದೆ. ಒಟ್ಟಾರೆಯಾಗಿ, ಒಂದೆಡೆ ಬಿಸಿಲಿನ ತಾಪ, ಮತ್ತೊಂದೆಡೆ ಬೆಲೆ ಏರಿಕೆಯ ದಾಪ ಜನರ ಬಜೆಟ್ ಮೇಲೆ ನೇರ ಪರಿಣಾಮ ಬೀರಿದೆ.
