ಟೆಹ್ರಾನ್: ಇರಾನ್ ತನ್ನ ಯುರೇನಿಯಂ ದಾಸ್ತಾನು ಹೆಚ್ಚಿಸಿಕೊಳ್ಳುತ್ತಿರುವ ಬೆನ್ನಲ್ಲೇ, ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಇರಾನ್ನ ವಿದ್ಯುತ್ ಸ್ಥಾವರಗಳ ಮೇಲೆ ದಾಳಿ ನಡೆಸುವ ಎಚ್ಚರಿಕೆ ನೀಡಿದ್ದಾರೆ. ಈ ಉದ್ವಿಗ್ನತೆಯ ನಡುವೆ ‘ಡರ್ಟಿ ಬಾಂಬ್’ ಬಳಕೆಯ ಸಾಧ್ಯತೆಗಳ ಬಗ್ಗೆ ಜಾಗತಿಕ ರಕ್ಷಣಾ ತಜ್ಞರು ಕಳವಳ ವ್ಯಕ್ತಪಡಿಸಿದ್ದಾರೆ.
ಸಾಮಾನ್ಯವಾಗಿ ಅನೇಕರು ‘ಡರ್ಟಿ ಬಾಂಬ್’ ಮತ್ತು ‘ಪರಮಾಣು ಬಾಂಬ್’ (Nuclear Bomb) ಎರಡೂ ಒಂದೇ ಎಂದು ಭಾವಿಸುತ್ತಾರೆ. ಆದರೆ ಇವುಗಳ ನಡುವೆ ಆಕಾಶ ಭೂಮಿಯ ವ್ಯತ್ಯಾಸವಿದೆ.
’ಡರ್ಟಿ ಬಾಂಬ್’ ಎಂದರೇನು?
ಡರ್ಟಿ ಬಾಂಬ್ ಅನ್ನು ತಾಂತ್ರಿಕವಾಗಿ ‘ರೇಡಿಯೋಲಾಜಿಕಲ್ ಡಿಸ್ಪರ್ಸಲ್ ಡಿವೈಸ್’ (RDD) ಎಂದು ಕರೆಯಲಾಗುತ್ತದೆ. ಇದು ಡೈನಮೈಟ್ನಂತಹ ಸಾಮಾನ್ಯ ಸ್ಫೋಟಕಗಳನ್ನು ವಿಕಿರಣಶೀಲ ವಸ್ತುಗಳೊಂದಿಗೆ (Radioactive materials) ಬೆರೆಸಿ ತಯಾರಿಸಿದ ಬಾಂಬ್ ಆಗಿದೆ.
ಕಾರ್ಯವೈಖರಿ: ಇದು ಪರಮಾಣು ಸ್ಫೋಟವನ್ನು ಉಂಟುಮಾಡುವುದಿಲ್ಲ. ಬದಲಿಗೆ, ಸಾಮಾನ್ಯ ಸ್ಫೋಟದ ಮೂಲಕ ತನ್ನಲ್ಲಿರುವ ವಿಕಿರಣಶೀಲ ಧೂಳು ಅಥವಾ ಕಣಗಳನ್ನು ವಾತಾವರಣದಲ್ಲಿ ಹರಡುತ್ತದೆ.
ಪರಿಣಾಮ: ಇದು ಸ್ಫೋಟಗೊಂಡ ಜಾಗದಲ್ಲಿ ತಕ್ಷಣವೇ ಸಾವಿರಾರು ಜನರನ್ನು ಕೊಲ್ಲುವುದಿಲ್ಲ. ಆದರೆ, ಆ ಪ್ರದೇಶದ ಗಾಳಿ, ನೀರು ಮತ್ತು ಮಣ್ಣನ್ನು ದೀರ್ಘಕಾಲದವರೆಗೆ ವಿಷಕಾರಿಯಾಗಿಸುತ್ತದೆ. ಇದನ್ನು ‘ಸಾಮೂಹಿಕ ವಿನಾಶದ ಅಸ್ತ್ರ’ ಎನ್ನುವುದಕ್ಕಿಂತ ‘ಸಾಮೂಹಿಕ ಅಸ್ತವ್ಯಸ್ತತೆಯ ಅಸ್ತ್ರ’ (Weapon of Mass Disruption) ಎಂದು ಕರೆಯಲಾಗುತ್ತದೆ.
