ಬೆಂಗಳೂರು: ರಾಜಧಾನಿಯ ಡಿ.ಜೆ. ಹಳ್ಳಿಯಲ್ಲಿ ಇಡೀ ನಗರವೇ ಬೆಚ್ಚಿಬೀಳುವಂತೆ ನಡೆದಿದ್ದ ಅಪ್ರಾಪ್ತ ಬಾಲಕಿಯ ಕೊಲೆ ಪ್ರಕರಣದ ಪ್ರಮುಖ ಆರೋಪಿ ಶಬೀಲ್ನನ್ನು ಪೊಲೀಸರು ರಾಜಸ್ಥಾನದ ಅಜ್ಮೀರ್ನಲ್ಲಿ ಬಂಧಿಸುವಲ್ಲಿ ಯಶಸ್ವಿಯಾಗಿದ್ದಾರೆ. ನಿಶ್ಚಿತಾರ್ಥವಾಗಿದ್ದ ಯುವತಿಯನ್ನೇ ಅನುಮಾನದ ಬೆನ್ನೇರಿ ಬರ್ಬರವಾಗಿ ಹತ್ಯೆ ಮಾಡಿ ಈತ ಪರಾರಿಯಾಗಿದ್ದ.
ಘಟನೆಯ ಹಿನ್ನೆಲೆ:
ಬೆಂಗಳೂರಿನ ಡಿ.ಜೆ. ಹಳ್ಳಿಯ ನಿವಾಸಿಯಾದ ಶಬೀಲ್ (20) ಹಾಗೂ ಕೋಲಾರ ಮೂಲದ 17 ವರ್ಷದ ಅಪ್ರಾಪ್ತ ಬಾಲಕಿಯ ನಡುವೆ ಪ್ರೀತಿ ಇತ್ತು. ಇವರ ಸಂಬಂಧಕ್ಕೆ ಎರಡು ಕುಟುಂಬಗಳು ಒಪ್ಪಿಗೆ ನೀಡಿ, 2025ರ ಜೂನ್ನಲ್ಲಿ ಅದ್ಧೂರಿಯಾಗಿ ನಿಶ್ಚಿತಾರ್ಥವನ್ನೂ ಮಾಡಿಸಲಾಗಿತ್ತು. ರಂಜಾನ್ ಹಬ್ಬದ ನಂತರ ಇವರಿಬ್ಬರ ವಿವಾಹ ನಡೆಸಲು ಪೋಷಕರು ನಿರ್ಧರಿಸಿದ್ದರು.
ಕೊಲೆಗೆ ಕಾರಣವಾದ ‘ಅನುಮಾನ’:
ನಿಶ್ಚಿತಾರ್ಥದ ನಂತರ ಶಬೀಲ್ ತನ್ನ ಭಾವಿ ಪತ್ನಿಯ ಮೇಲೆ ತೀವ್ರವಾಗಿ ಅನುಮಾನ ಪಡಲು ಶುರುಮಾಡಿದ್ದ ಎನ್ನಲಾಗಿದೆ. ಆಕೆ ಬೇರೆ ಯುವಕರ ಜೊತೆ ಮಾತನಾಡುತ್ತಿದ್ದಾಳೆ ಎಂಬ ಸಂಶಯ ಅವನ ತಲೆಯಲ್ಲಿ ಹೊಕ್ಕಿತ್ತು. ಇದೇ ಕಾರಣಕ್ಕೆ ಆಕೆಯನ್ನು ಹತ್ಯೆ ಮಾಡಲು ಸಂಚು ರೂಪಿಸಿದ್ದ.
-
ಸಂಚು ಮತ್ತು ಹತ್ಯೆ: ಮಾ. 17ರ ಮಂಗಳವಾರ ಮುಂಜಾನೆ 6:30ರ ಸುಮಾರಿಗೆ “ಖಾಸಗಿಯಾಗಿ ಮಾತನಾಡಬೇಕು” ಎಂದು ನಂಬಿಸಿ ಬಾಲಕಿಯನ್ನು ಸಕ್ಕರೆ ಮಂಡಿ ಬಳಿಯಿರುವ ತನ್ನ ಸಂಬಂಧಿಕರಿಗೆ ಸೇರಿದ ಪಾಳುಬಿದ್ದ ಮನೆಗೆ ಕರೆಸಿಕೊಂಡಿದ್ದಾನೆ.
-
ಬರ್ಬರತೆ: ಅಲ್ಲಿ ಇಬ್ಬರ ನಡುವೆ ಮಾತಿಗೆ ಮಾತು ಬೆಳೆದು ಜಗಳವಾಗಿದ್ದು, ವಿಕೃತಿಯ ಪರಮಾವಧಿ ಮೆರೆದ ಶಬೀಲ್ ಚಾಕುವಿನಿಂದ ಬಾಲಕಿಯ ಎದೆ ಮತ್ತು ಗುಪ್ತಾಂಗಕ್ಕೆ ಸುಮಾರು 17 ಬಾರಿ ಇರಿದಿದ್ದಾನೆ. ಅಂತಿಮವಾಗಿ ಆಕೆಯ ಕತ್ತು ಸೀಳಿ ಸ್ಥಳದಲ್ಲೇ ಕೊಲೆ ಮಾಡಿ ಪರಾರಿಯಾಗಿದ್ದ.
ಪೊಲೀಸ್ ಕಾರ್ಯಾಚರಣೆ:
ಘಟನೆ ನಡೆದ ನಂತರ ಶಬೀಲ್ ಮೊಬೈಲ್ ಸ್ವಿಚ್ ಆಫ್ ಮಾಡಿ ತಲೆಮರೆಸಿಕೊಂಡಿದ್ದ. ಈ ಪ್ರಕರಣವನ್ನು ಗಂಭೀರವಾಗಿ ಪರಿಗಣಿಸಿದ ಡಿ.ಜೆ. ಹಳ್ಳಿ ಪೊಲೀಸರು ವಿಶೇಷ ತಂಡ ರಚಿಸಿ ತನಿಖೆ ಕೈಗೊಂಡಿದ್ದರು. ತಾಂತ್ರಿಕ ದಾಖಲೆಗಳು ಮತ್ತು ಮೊಬೈಲ್ ಟವರ್ ಲೋಕೇಷನ್ ಆಧರಿಸಿ ಆರೋಪಿ ರಾಜಸ್ಥಾನದ ಅಜ್ಮೀರ್ನಲ್ಲಿದ್ದಾನೆ ಎಂಬ ಸುಳಿವು ಸಿಕ್ಕಿತ್ತು. ತಕ್ಷಣವೇ ಅಲ್ಲಿಗೆ ತೆರಳಿದ ಪೊಲೀಸರು ಶಬೀಲ್ನನ್ನು ವಶಕ್ಕೆ ಪಡೆದಿದ್ದಾರೆ.
ಸದ್ಯ ಆರೋಪಿಯನ್ನು ಬೆಂಗಳೂರಿಗೆ ಕರೆತರಲಾಗುತ್ತಿದ್ದು, ವಿಚಾರಣೆಯ ನಂತರ ಕೊಲೆಗೆ ನಿಖರ ಕಾರಣಗಳು ಮತ್ತು ಈತನಿಗೆ ಯಾರಾದರೂ ಸಹಾಯ ಮಾಡಿದ್ದಾರೆಯೇ ಎಂಬುದು ಬಯಲಾಗಲಿದೆ.
50 ವರ್ಷಗಳ ನಂತರ ಮತ್ತೆ ಚಂದಿರನತ್ತ ಮಾನವ: ಏ.2ಕ್ಕೆ ನಾಸಾದಿಂದ ಆರ್ಟೆಮಿಸ್-2 ಲಾಂಚ್ | Artemis-II Moon rocket
