ನವದೆಹಲಿ: ಇರಾನ್-ಇಸ್ರೇಲ್ ಮತ್ತು ಅಮೆರಿಕ ನಡುವಿನ ಸಂಘರ್ಷದಿಂದಾಗಿ ಜಾಗತಿಕ ಇಂಧನ ಪೂರೈಕೆಯಲ್ಲಿ ಭಾರಿ ಏರುಪೇರಾಗಿರುವ ಬೆನ್ನಲ್ಲೇ, ಭಾರತವು ತನ್ನ ಇಂಧನ ಭದ್ರತೆಯನ್ನು ಖಚಿತಪಡಿಸಿಕೊಳ್ಳುವಲ್ಲಿ ಯಶಸ್ವಿಯಾಗಿದೆ. ರಷ್ಯಾದಿಂದ ಕಚ್ಚಾ ತೈಲ ಹೊತ್ತ ‘ಆಕ್ವಾ ಟೈಟಾನ್’ (Aqua Titan) ಮತ್ತು ಅಮೆರಿಕದಿಂದ ಅಡುಗೆ ಅನಿಲ (LPG) ಹೊತ್ತ ‘ಪೈಕ್ಸಿಸ್ ಪಯೋನಿಯರ್’ (Pyxis Pioneer) ಬೃಹತ್ ಹಡಗುಗಳು ಭಾನುವಾರ ಬೆಳಿಗ್ಗೆ ನವ ಮಂಗಳೂರು ಬಂದರನ್ನು (NMPA) ತಲುಪಿವೆ.
ರಷ್ಯಾದಿಂದ ಚೀನಾದ ರಿಜಾವೊ ಬಂದರಿಗೆ ಹೋಗಬೇಕಿದ್ದ ‘ಆಕ್ವಾ ಟೈಟಾನ್’ ಎಂಬ ತೈಲ ನೌಕೆಯು ಆಗ್ನೇಯ ಏಷ್ಯಾದ ಸಮುದ್ರ ಮಾರ್ಗದಲ್ಲಿ ಇದ್ದಕ್ಕಿದ್ದಂತೆ ಯು-ಟರ್ನ್ (U-Turn) ಪಡೆದು ಮಂಗಳೂರಿನತ್ತ ಬಂದಿದೆ. ಇದರಲ್ಲಿ ಎಂಆರ್ಪಿಎಲ್ (MRPL) ಸಂಸ್ಥೆಗೆ ಸೇರಿದ ಸುಮಾರು 7.7 ಲಕ್ಷ ಬ್ಯಾರೆಲ್ ಕಚ್ಚಾ ತೈಲವಿದೆ.
ಇದೇ ವೇಳೆ ಅಮೆರಿಕದ ಟೆಕ್ಸಾಸ್ನಿಂದ ಫೆಬ್ರವರಿ 14 ರಂದು ಹೊರಟಿದ್ದ ‘ಪೈಕ್ಸಿಸ್ ಪಯೋನಿಯರ್’ ಹಡಗು 16,714 ಟನ್ ಅಡುಗೆ ಅನಿಲದೊಂದಿಗೆ ಮಂಗಳೂರು ಬಂದರಿನ 13ನೇ ಬರ್ತ್ನಲ್ಲಿ ಲಂಗರು ಹಾಕಿದೆ. ಇದು ದಕ್ಷಿಣ ಭಾರತದ ಅಡುಗೆ ಅನಿಲದ ಬೇಡಿಕೆಯನ್ನು ಪೂರೈಸಲು ಸಹಕಾರಿಯಾಗಲಿದೆ.
ಇರಾನ್ ಸಂಘರ್ಷದಿಂದಾಗಿ ಮಧ್ಯಪ್ರಾಚ್ಯದ ತೈಲ ಪೂರೈಕೆ ಕಡಿತಗೊಂಡಿರುವುದರಿಂದ, ಭಾರತಕ್ಕೆ ರಷ್ಯಾದಿಂದ ಕಚ್ಚಾ ತೈಲ ಖರೀದಿಸಲು ಅಮೆರಿಕವು 30 ದಿನಗಳ ಕಾಲ ತಾತ್ಕಾಲಿಕ ವಿನಾಯಿತಿ ನೀಡಿದೆ. ಇದರ ಲಾಭ ಪಡೆದ ಭಾರತೀಯ ಕಂಪನಿಗಳು ಕೇವಲ ಒಂದು ವಾರದಲ್ಲಿ ಸುಮಾರು 3 ಕೋಟಿ ಬ್ಯಾರೆಲ್ ರಷ್ಯಾದ ತೈಲವನ್ನು ಖರೀದಿಸಿವೆ.
ಇಂಧನ ಬಿಕ್ಕಟ್ಟಿನ ತುರ್ತು ಪರಿಸ್ಥಿತಿಯನ್ನು ಗಮನದಲ್ಲಿಟ್ಟುಕೊಂಡು ಕೇಂದ್ರ ಶಿಪ್ಪಿಂಗ್ ಸಚಿವಾಲಯವು ಮಾರ್ಚ್ 31ರವರೆಗೆ ಮಂಗಳೂರು ಬಂದರಿನಲ್ಲಿ ಕಚ್ಚಾ ತೈಲ ಮತ್ತು ಎಲ್ಪಿಜಿ ಹಡಗುಗಳಿಗೆ ಕಾರ್ಗೋ ಸಂಬಂಧಿತ ಎಲ್ಲಾ ಶುಲ್ಕಗಳನ್ನು ಸಂಪೂರ್ಣವಾಗಿ ಮನ್ನಾ ಮಾಡಿದೆ.
