ಬೆಂಗಳೂರು: ರಾಜ್ಯ ಸರ್ಕಾರವು ದೈಹಿಕ ವಿಕಲಚೇತನರ ಸಬಲೀಕರಣಕ್ಕಾಗಿ ಜಾರಿಗೆ ತಂದಿರುವ ‘ಮೋಟಾರೀಕೃತ ತ್ರಿಚಕ್ರ ವಾಹನ’ ಯೋಜನೆಯಡಿ ಸೌಲಭ್ಯ ಪಡೆಯಲು ಇರಬೇಕಾದ ಮಾನದಂಡಗಳ ಬಗ್ಗೆ ಇತ್ತೀಚಿನ ಆದೇಶದಲ್ಲಿ ಸ್ಪಷ್ಟಪಡಿಸಲಾಗಿದೆ. ಅರ್ಹ ಫಲಾನುಭವಿಗಳನ್ನು ಆಯ್ಕೆ ಮಾಡಲು ಜಿಲ್ಲಾ ಮಟ್ಟದ ಸಮಿತಿಗಳಿಗೆ ಕಟ್ಟುನಿಟ್ಟಿನ ಸೂಚನೆ ನೀಡಲಾಗಿದೆ.
ಯಾರು ಅರ್ಹರು?
ಈ ಯೋಜನೆಯಡಿ ಸೌಲಭ್ಯ ಪಡೆಯಲು ಈ ಕೆಳಗಿನ ಶರತ್ತುಗಳನ್ನು ಪೂರೈಸುವುದು ಕಡ್ಡಾಯ:
ನಿವಾಸಿ ಪುರಾವೆ: ಅರ್ಜಿದಾರರು ಭಾರತದ ಪ್ರಜೆಯಾಗಿರಬೇಕು ಮತ್ತು ಕರ್ನಾಟಕದಲ್ಲಿ ಕನಿಷ್ಠ 10 ವರ್ಷಗಳ ಕಾಲ ವಾಸವಾಗಿರಬೇಕು.
ವಯೋಮಿತಿ: ಅಭ್ಯರ್ಥಿಗಳ ವಯಸ್ಸು 20 ರಿಂದ 60 ವರ್ಷದೊಳಗಿರಬೇಕು.
ವಿಕಲಚೇತನದ ಪ್ರಮಾಣ: ದೈಹಿಕ ವಿಕಲಚೇತನದ ಪ್ರಮಾಣ ಶೇ. 75ಕ್ಕಿಂತ ಹೆಚ್ಚಿರಬೇಕು. ಪ್ರಮುಖವಾಗಿ ಸೊಂಟದ ಕೆಳಭಾಗದ ಎರಡೂ ಕಾಲುಗಳ ಸ್ವಾಧೀನ ಕಳೆದುಕೊಂಡಿದ್ದು, ತ್ರಿಚಕ್ರ ವಾಹನ ಚಾಲನೆ ಮಾಡಲು ಕೈಗಳು ಸಮರ್ಪಕವಾಗಿರಬೇಕು.
ಆದಾಯ ಮಿತಿ: ಕುಟುಂಬದ ವಾರ್ಷಿಕ ಆದಾಯವು 2 ಲಕ್ಷ ರೂಪಾಯಿಗಳಿಗಿಂತ ಕಡಿಮೆ ಇರಬೇಕು.
ಪ್ರಮುಖ ನಿಯಮಗಳು:
ಒಂದು ಬಾರಿ ಮಾತ್ರ ಅವಕಾಶ: ಈ ಸೌಲಭ್ಯವು ಅರ್ಹ ವ್ಯಕ್ತಿಗೆ ಜೀವನದಲ್ಲಿ ಒಂದು ಬಾರಿ ಮಾತ್ರ ಲಭ್ಯವಿರುತ್ತದೆ. ಈ ಹಿಂದೆ ಬೇರೆ ಇಲಾಖೆ ಅಥವಾ ಸಂಸ್ಥೆಗಳಿಂದ ವಾಹನ ಪಡೆದಿದ್ದಲ್ಲಿ ಅವರು ಅರ್ಹರಾಗಿರುವುದಿಲ್ಲ.
ಮಾರಾಟ ನಿಷೇಧ: ಸರ್ಕಾರ ನೀಡುವ ಈ ವಾಹನವನ್ನು ಯಾವುದೇ ಕಾರಣಕ್ಕೂ ಮಾರಾಟ ಮಾಡುವಂತಿಲ್ಲ ಅಥವಾ ಬೇರೆಯವರಿಗೆ ವರ್ಗಾಯಿಸುವಂತಿಲ್ಲ. ಒಂದು ವೇಳೆ ನಿಯಮ ಉಲ್ಲಂಘಿಸಿರುವುದು ಕಂಡುಬಂದಲ್ಲಿ ವಾಹನವನ್ನು ಸರ್ಕಾರ ಮುಟ್ಟುಗೋಲು ಹಾಕಿಕೊಳ್ಳಲಿದೆ.
ಚಾಲನಾ ಪರವಾನಗಿ: ಅರ್ಜಿ ಸಲ್ಲಿಸುವವರು ತ್ರಿಚಕ್ರ ವಾಹನ ಚಾಲನೆ ಮಾಡುವ ಸಿಂಧುತ್ವವಿರುವ ಪರವಾನಗಿ (Driving License) ಹೊಂದಿರಬೇಕು.
ಆಯ್ಕೆ ಪ್ರಕ್ರಿಯೆ: ಜಿಲ್ಲಾ ಪಂಚಾಯತ್ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿಗಳ ಅಧ್ಯಕ್ಷತೆಯ ಸಮಿತಿಯು ಅರ್ಹ ಫಲಾನುಭವಿಗಳನ್ನು ಆಯ್ಕೆ ಮಾಡುತ್ತದೆ.
ಗಮನಿಸಿ: ವಾಹನದ ಆರ್.ಸಿ (R.C.) ಪುಸ್ತಕದಲ್ಲಿ “ಫಲಾನುಭವಿ ಜೀವಂತವಾಗಿರುವವರೆಗೆ ಈ ವಾಹನವನ್ನು ಮರು ಮಾರಾಟ ಮಾಡುವಂತಿಲ್ಲ” ಎಂಬ ಕಡ್ಡಾಯ ಉಲ್ಲೇಖವಿರುತ್ತದೆ.
ಈ ಸೌಲಭ್ಯದ ಹೆಚ್ಚಿನ ಮಾಹಿತಿಗಾಗಿ ಹಾಗೂ ಅರ್ಜಿ ಸಲ್ಲಿಸಲು ನಿಮ್ಮ ಜಿಲ್ಲೆಯ ವಿಕಲಚೇತನರ ಹಾಗೂ ಹಿರಿಯ ನಾಗರಿಕರ ಸಬಲೀಕರಣ ಇಲಾಖೆಯನ್ನು ಸಂಪರ್ಕಿಸಬಹುದಾಗಿದೆ.
