ತೆಹ್ರಾನ್: ದಕ್ಷಿಣ ಇರಾನ್ನ ಮಿನಾಬ್ (Minab) ನಗರದ ಬಾಲಕಿಯರ ಪ್ರಾಥಮಿಕ ಶಾಲೆಯೊಂದರ ಮೇಲೆ ನಡೆದ ಭೀಕರ ವೈಮಾನಿಕ ದಾಳಿಯಲ್ಲಿ ಕನಿಷ್ಠ 150ಕ್ಕೂ ಹೆಚ್ಚು ವಿದ್ಯಾರ್ಥಿನಿಯರು ಸಾವನ್ನಪ್ಪಿದ್ದು, ಇಡೀ ವಿಶ್ವವನ್ನೇ ಬೆಚ್ಚಿಬೀಳಿಸಿದೆ. ಈ ಘಟನೆಯನ್ನು “ಅತ್ಯಂತ ಭೀಕರ” (Absolutely Horrific) ಎಂದು ಬಣ್ಣಿಸಿರುವ ವಿಶ್ವಸಂಸ್ಥೆ, ಕೂಡಲೇ ನಿಷ್ಪಕ್ಷಪಾತ ತನಿಖೆಗೆ ಆದೇಶಿಸಿದೆ.
ಘಟನೆಯ ಹಿನ್ನೆಲೆ:
ಇತ್ತೀಚಿನ ಯುದ್ಧದ ನಡುವೆ ನಡೆದ ಈ ದಾಳಿಯಲ್ಲಿ ಮಿನಾಬ್ನ ‘ಶಜರೆ ತಯ್ಯೆಬೆ’ (Shajareh Tayyebeh) ಎಂಬ ಬಾಲಕಿಯರ ಶಾಲೆಯು ಸಂಪೂರ್ಣವಾಗಿ ನೆಲಸಮವಾಗಿದೆ. ಶಾಲಾ ಅವಧಿ ನಡೆಯುತ್ತಿದ್ದ ಸಮಯದಲ್ಲೇ ಈ ದಾಳಿ ನಡೆದಿದ್ದರಿಂದ ಹೆಚ್ಚಿನ ಸಂಖ್ಯೆಯಲ್ಲಿ ಮಕ್ಕಳು ಪ್ರಾಣ ಕಳೆದುಕೊಂಡಿದ್ದಾರೆ. ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿರುವ ರಕ್ತಸಿಕ್ತ ಶಾಲಾ ಬ್ಯಾಗ್ಗಳು ಮತ್ತು ಅವಶೇಷಗಳ ಫೋಟೋಗಳು ಸಂಘರ್ಷದ ಕ್ರೂರತೆಯನ್ನು ಪ್ರತಿಬಿಂಬಿಸುತ್ತಿವೆ.
ವಿಶ್ವಸಂಸ್ಥೆಯ ತೀವ್ರ ಆಕ್ರೋಶ:
ವಿಶ್ವಸಂಸ್ಥೆಯ ಮಾನವ ಹಕ್ಕುಗಳ ಹೈಕಮಿಷನರ್ ವೋಲ್ಕರ್ ಟರ್ಕ್ ಅವರು ಈ ಘಟನೆಯಿಂದ ತೀವ್ರ ಆಘಾತ ವ್ಯಕ್ತಪಡಿಸಿದ್ದಾರೆ. ಈ ಕುರಿತು ಮಾತನಾಡಿದ ವಿಶ್ವಸಂಸ್ಥೆಯ ವಕ್ತಾರೆ ರವೀನಾ ಶಮ್ದಾಸಾನಿ, “ಚಿಕ್ಕ ಬಾಲಕಿಯರು ಶಾಲಾ ದಿನದ ಆರಂಭದಲ್ಲೇ ಈ ರೀತಿ ಬಲಿಯಾಗಿರುವುದು ನಿಜಕ್ಕೂ ಹೃದಯವಿದ್ರಾವಕ. ಈ ದಾಳಿಯ ಹೊಣೆ ಹೊತ್ತವರು ತಕ್ಷಣವೇ ವಿವರವಾದ ತನಿಖೆ ನಡೆಸಿ ಸತ್ಯವನ್ನು ಬಹಿರಂಗಪಡಿಸಬೇಕು,” ಎಂದು ಆಗ್ರಹಿಸಿದ್ದಾರೆ.
