ವಾಷಿಂಗ್ಟನ್: ಇರಾನ್ ಮತ್ತು ಇಸ್ರೇಲ್ ನಡುವಿನ ಸಂಘರ್ಷವು ಭೀಕರ ಮಹಾಯುದ್ಧದ ರೂಪ ಪಡೆದುಕೊಳ್ಳುತ್ತಿರುವ ಬೆನ್ನಲ್ಲೇ, ಅಮೆರಿಕ ಸರ್ಕಾರವು ತನ್ನ ನಾಗರಿಕರಿಗೆ ಅತ್ಯಂತ ಗಂಭೀರ ಎಚ್ಚರಿಕೆಯನ್ನು ನೀಡಿದೆ. ಮಧ್ಯಪ್ರಾಚ್ಯದ 14 ದೇಶಗಳಲ್ಲಿ ನೆಲೆಸಿರುವ ಅಮೆರಿಕನ್ನರು ಲಭ್ಯವಿರುವ ವಾಣಿಜ್ಯ ವಿಮಾನಗಳ ಮೂಲಕ “ತಕ್ಷಣವೇ ಹೊರಡಿ” (DEPART NOW) ಎಂದು ಅಮೆರಿಕದ ವಿದೇಶಾಂಗ ಇಲಾಖೆ ಸೂಚಿಸಿದೆ.
ಯಾವೆಲ್ಲಾ ದೇಶಗಳಿಗೆ ಈ ಎಚ್ಚರಿಕೆ ಅನ್ವಯ?
ಅಮೆರಿಕ ಬಿಡುಗಡೆ ಮಾಡಿರುವ ಪಟ್ಟಿಯಲ್ಲಿ ಈ ಕೆಳಗಿನ 14 ಪ್ರಮುಖ ರಾಷ್ಟ್ರಗಳಿವೆ:
ಇರಾನ್ 2. ಇರಾಕ್ 3. ಇಸ್ರೇಲ್ (ಪ್ಯಾಲೆಸ್ಟೈನ್ ಸೇರಿ) 4. ಸೌದಿ ಅರೇಬಿಯಾ 5. ಯುಎಇ (ದುಬೈ/ಅಬುಧಾಬಿ) 6. ಕತಾರ್ 7. ಕುವೈತ್ 8. ಬಹ್ರೇನ್ 9. ಒಮಾನ್ 10. ಈಜಿಪ್ಟ್ 11. ಜೋರ್ಡಾನ್ 12. ಲೆಬನಾನ್ 13. ಸಿರಿಯಾ 14. ಯೆಮೆನ್.
ಆದೇಶದ ಹಿಂದಿನ ಕಾರಣಗಳು:
ವಾಯುಪ್ರದೇಶ ಬಂದ್ ಭೀತಿ: ಯುದ್ಧ ತೀವ್ರಗೊಂಡಂತೆ ಹಲವು ದೇಶಗಳು ತಮ್ಮ ವಾಯುಪ್ರದೇಶವನ್ನು (Airspace) ಮುಚ್ಚುತ್ತಿವೆ. ಇದರಿಂದ ಮುಂದಿನ ದಿನಗಳಲ್ಲಿ ವಾಣಿಜ್ಯ ವಿಮಾನಗಳ ಸಂಚಾರ ಸಂಪೂರ್ಣ ಸ್ಥಗಿತಗೊಳ್ಳುವ ಸಾಧ್ಯತೆಯಿದೆ.
ಭದ್ರತಾ ಅಪಾಯ: ರಿಯಾದ್ನಲ್ಲಿರುವ ಅಮೆರಿಕ ರಾಯಭಾರ ಕಚೇರಿಯ ಮೇಲೆ ಇತ್ತೀಚೆಗೆ ನಡೆದ ಡ್ರೋನ್ ದಾಳಿ ಮತ್ತು ಕುವೈತ್ನಲ್ಲಿ ನಡೆದ ಸಂಘರ್ಷಗಳು ಅಮೆರಿಕನ್ನರ ಸುರಕ್ಷತೆಯ ಬಗ್ಗೆ ಆತಂಕ ಮೂಡಿಸಿವೆ.
ಜಾಗತಿಕ ಎಚ್ಚರಿಕೆ: ಫೆಬ್ರವರಿ 28 ರಿಂದ ಅಮೆರಿಕ ಮತ್ತು ಇಸ್ರೇಲ್ ಜಂಟಿಯಾಗಿ ಇರಾನ್ ಮೇಲೆ ನಡೆಸುತ್ತಿರುವ ದಾಳಿಗಳಿಂದಾಗಿ ಇಡೀ ಮಧ್ಯಪ್ರಾಚ್ಯ ಪ್ರದೇಶವು ಈಗ ‘ರೆಡ್ ಝೋನ್’ ಆಗಿ ಮಾರ್ಪಟ್ಟಿದೆ.
ಅಮೆರಿಕ ಸರ್ಕಾರದ ಸಲಹೆ:
ವಿದೇಶಾಂಗ ಇಲಾಖೆಯ ಸಹಾಯಕ ಕಾರ್ಯದರ್ಶಿ ಮೋರಾ ನಾಮ್ದಾರ್ ಅವರು ಈ ಬಗ್ಗೆ ಮಾಹಿತಿ ನೀಡಿದ್ದು, “ಪರಿಸ್ಥಿತಿ ಕ್ಷಣ ಕ್ಷಣಕ್ಕೂ ಹದಗೆಡುತ್ತಿದೆ. ನಾಗರಿಕರು ಸರ್ಕಾರಿ ಸ್ಥಳಾಂತರಕ್ಕೆ ಕಾಯದೆ ತಕ್ಷಣವೇ ಲಭ್ಯವಿರುವ ಖಾಸಗಿ ವಿಮಾನಗಳ ಮೂಲಕ ಸುರಕ್ಷಿತ ದೇಶಗಳಿಗೆ ತೆರಳಬೇಕು” ಎಂದು ತಿಳಿಸಿದ್ದಾರೆ. ಅಲ್ಲದೆ, ನಾಗರಿಕರು ‘STEP’ (Smart Traveler Enrollment Program) ಮೂಲಕ ತಮ್ಮ ವಿವರಗಳನ್ನು ನೋಂದಾಯಿಸಿಕೊಳ್ಳಲು ಸೂಚಿಸಲಾಗಿದೆ.
