ಬೆಂಗಳೂರು: ಜಾನಪದದ ಅಪ್ಪಟ ಸಗಡು ಮತ್ತು ಮಣ್ಣಿನ ಸಂಸ್ಕೃತಿಯನ್ನು ಉಸಿರಾಗಿಸಿಕೊಂಡಿರುವ ಕಾಡುಗೊಲ್ಲರ ಸಮುದಾಯದ ಹೆಮ್ಮೆಯ ಪುತ್ರಿ, ಉದಯೋನ್ಮುಖ ಸಾಹಿತಿ ಶಿವ ಕೀರ್ತಿ (ಕೀರ್ತಿ) ಅವರು ರಚಿಸಿರುವ ‘ಶ್ರೀ ಶಿವ ಚಿತ್ರಲಿಂಗೇಶ್ವರ ವಾಣಿ’ ಎಂಬ 101 ವಚನಗಳ ಸಂಕಲನವು ಕನ್ನಡ ಸಾಹಿತ್ಯದ ಬಾನಿನಲ್ಲಿ ಹೊಸ ಧ್ರುವತಾರೆಯಾಗಿ ಮೂಡಿಬಂದಿದೆ.
ಆಧುನಿಕತೆಯ ಭರಾಟೆಯಲ್ಲಿ ಮೌಲ್ಯಗಳು ಮರೆಯಾಗುತ್ತಿರುವ ಈ ಸಂಕೀರ್ಣ ಕಾಲಘಟ್ಟದಲ್ಲಿ, ಹದಿಹರೆಯದ ಹೆಣ್ಣುಮಗಳೊಬ್ಬಳು ಹನ್ನೆರಡನೇ ಶತಮಾನದ ಶರಣರ ಕ್ರಾಂತಿಕಾರಿ ಚಿಂತನೆಗಳನ್ನು ಸಮಕಾಲೀನ ಬದುಕಿಗೆ ಅನ್ವಯಿಸಿ ವಚನಗಳನ್ನು ರಚಿಸಿರುವುದು ಅಕ್ಷರ ಲೋಕದ ವಿಸ್ಮಯವೇ ಸರಿ. ದೊಡ್ಡಗೊಲ್ಲರಹಟ್ಟಿಯ ಈ ಪ್ರತಿಭೆಯು ತನ್ನ ಲೇಖನಿಯ ಮೂಲಕ ಸಾಮಾಜಿಕ ಕಳಕಳಿ ಮತ್ತು ಆಧ್ಯಾತ್ಮಿಕ ಉನ್ನತಿಯನ್ನು ಅತ್ಯಂತ ಪ್ರೌಢಿಮೆಯಿಂದ ಚಿತ್ರಿಸಿದ್ದು, ಈ ಕೃತಿಯು ಕೇವಲ ಅಕ್ಷರಗಳ ಗುಂಪಾಗದೆ, ಅಂತರಂಗದ ಅರಿವನ್ನು ಜಾಗೃತಗೊಳಿಸುವ ಜ್ಞಾನದೀವಿಗೆಯಾಗಿದೆ.
ಈ ವಚನ ಸಂಕಲನದ ಪ್ರತಿ ಸಾಲುಗಳಲ್ಲೂ ಭಕ್ತಿ ಮತ್ತು ವೈಚಾರಿಕತೆಯ ಅದ್ಭುತ ಸಂಗಮವಿದೆ. ‘ಶ್ರೀ ಶಿವ ಚಿತ್ರಲಿಂಗೇಶ್ವರ’ ಎಂಬ ಪವಿತ್ರ ಅಂಕಿತನಾಮದಡಿ ಲೇಖಕಿಯು ಶರಣಾಗತಿ ಭಾವದ ಪರಮೋಚ್ಛ ಸ್ಥಿತಿಯನ್ನು ತಲುಪಿದ್ದಾರೆ. ಮನುಷ್ಯನ ಅಹಂಕಾರದ ಮುಖವಾಡವನ್ನು ಕಳಚಿ, ವಿನಯವನ್ನೇ ಜೀವನದ ಪರಮ ಧರ್ಮವನ್ನಾಗಿಸಿಕೊಳ್ಳಬೇಕು ಎನ್ನುವ ಹಂಬಲ ಇಲ್ಲಿನ ಪ್ರತಿ ವಚನದಲ್ಲೂ ಎದ್ದು ಕಾಣುತ್ತದೆ.
ಬಸವಣ್ಣನವರ ‘ಕಾಯಕವೇ ಕೈಲಾಸ’ ತತ್ತ್ವವನ್ನು ಮೈಗೂಡಿಸಿಕೊಂಡಿರುವ ಶಿವ ಕೀರ್ತಿ ಅವರು, ಸೋಮಾರಿತನವನ್ನು ತೊರೆದು ಶ್ರಮಜೀವಿಯಾಗುವ ಸನ್ಮಾರ್ಗವನ್ನು ಯುವ ಪೀಳಿಗೆಗೆ ಬೋಧಿಸಿದ್ದಾರೆ. ಸಂಬಂಧಗಳ ಸಂಕೋಲೆಯಲ್ಲಿ ‘ನಂಬಿಕೆಯೇ ಜೀವಾಳ’ ಎಂಬ ಸತ್ಯವನ್ನು ಸಾರುತ್ತಾ, ಲೋಕದ ಡೊಂಕನ್ನು ತಿದ್ದುವ ಮುನ್ನ ತನ್ನ ಅಂತರಂಗವನ್ನು ಶುದ್ಧೀಕರಿಸಿಕೊಳ್ಳಬೇಕೆಂಬ ಶರಣರ ಸಿದ್ಧಾಂತವನ್ನು ಲೇಖಕಿ ಅತ್ಯಂತ ಪರಿಣಾಮಕಾರಿಯಾಗಿ ಕಟ್ಟಿಕೊಟ್ಟಿದ್ದಾರೆ.
ಈ ಸಾಹಿತ್ಯಿಕ ಮಹತ್ಕಾರ್ಯವನ್ನು ಕಂಡು ಕಾಡುಗೊಲ್ಲರ ಜನಪದ ಸಗಡು ತಂಡ ಹಾಗೂ ಸಮಸ್ತ ಕಾಡುಗೊಲ್ಲ ಸಮಾಜವು ಅತ್ಯಂತ ಹೆಮ್ಮೆಯಿಂದ ಅಭಿನಂದನೆಗಳನ್ನು ಸಲ್ಲಿಸಿದೆ.ಪರಿಮಳ ಪ್ರಕಾಶನದ ಮೂಲಕ ಅಚ್ಚುಕಟ್ಟಾಗಿ ಹೊರಬಂದಿರುವ ಈ ವಚನ ಕುಸುಮಗಳು ಅಜ್ಞಾನದ ಕತ್ತಲೆಯನ್ನು ಸರಿಸಿ, ಜ್ಞಾನದ ಬೆಳಕನ್ನು ಪಸರಿಸಲಿ ಎಂಬುದು ಸಾಹಿತ್ಯಾಸಕ್ತರ ಸದಾಶಯವಾಗಿದೆ. ಶಿವ ಕೀರ್ತಿ ಅವರ ಸಾಹಿತ್ಯ ಕೃಷಿಯು ನಿರಂತರವಾಗಿ ಸಾಗಲಿ, ಅವರಿಗೆ ಶ್ರೀ ಶಿವ ಚಿತ್ರಲಿಂಗೇಶ್ವರನು ಆಯುಷ್ಯ, ಆರೋಗ್ಯ ಮತ್ತು ಯಶಸ್ಸನ್ನು ಕರುಣಿಸಲಿ ಎಂದು ಸಮಸ್ತ ನಾಡು ತುಂಬು ಹೃದಯದಿಂದ ಹಾರೈಸುತ್ತಿದೆ.
ವರದಿ: ಶಶಿ ಬಿ ಈಶ್ವರಗೆರೆ
ದುಬೈನಲ್ಲಿ ಸಿಲುಕಿರುವ ಕನ್ನಡಿಗರ ಸುರಕ್ಷಿತವಾಗಿ ಕರೆತರಲು ಎಲ್ಲ ವ್ಯವಸ್ಥೆ: ಸಿಎಂ ಸಿದ್ಧರಾಮಯ್ಯ
ರಾಜ್ಯದ ಜನತೆಗೆ ಸಿಹಿ ಸುದ್ದಿ: ಸದ್ಯಕ್ಕಿಲ್ಲ ವಿದ್ಯುತ್ ದರ ಏರಿಕೆ; ಸಿಎಂ ಸ್ಪಷ್ಟನೆ
