ಒಂದು ದೊಡ್ಡ ತಪ್ಪೊಪ್ಪಿಗೆಯಲ್ಲಿ, ಪಾಕಿಸ್ತಾನದ ರಕ್ಷಣಾ ಸಚಿವ ಖವಾಜಾ ಆಸಿಫ್ ಅವರು, ಅಮೆರಿಕವು ತನ್ನದೇ ಆದ ವ್ಯೂಹಾತ್ಮಕ ಉದ್ದೇಶಗಳಿಗಾಗಿ ಪಾಕಿಸ್ತಾನವನ್ನು ಬಳಸಿಕೊಂಡಿತು ಮತ್ತು ನಂತರ ಅದನ್ನು ‘ಟಾಯ್ಲೆಟ್ ಪೇಪರ್ಗಿಂತಲೂ ಕೆಟ್ಟದಾಗಿ’ ಬಿಸಾಡಿತು ಎಂದು ಮುಕ್ತವಾಗಿ ಒಪ್ಪಿಕೊಂಡಿದ್ದಾರೆ. ಸಂಸತ್ತಿನಲ್ಲಿ ಮಾತನಾಡುತ್ತಾ ಅಮೆರಿಕದ ವಿರುದ್ಧ ತೀವ್ರ ವಾಗ್ದಾಳಿ ನಡೆಸಿದ ಆಸಿಫ್, ವಾಷಿಂಗ್ಟನ್ ಜೊತೆ ಕೈಜೋಡಿಸಿದ್ದು ಪಾಕಿಸ್ತಾನ ಮಾಡಿದ ದೊಡ್ಡ ತಪ್ಪು ಎಂದು ಕರೆದಿದ್ದಾರೆ. ಈ ತಪ್ಪು ನಿರ್ಧಾರವು ದೇಶವನ್ನು ದುರ್ಬಲಗೊಳಿಸಿದೆ ಮತ್ತು ಅಸ್ಥಿರಗೊಳಿಸಿದೆ ಎಂದು ಅವರು ಕಿಡಿಹಾಯ್ದಿದ್ದಾರೆ.
1999ರ ನಂತರ, ವಿಶೇಷವಾಗಿ ಅಫ್ಘಾನಿಸ್ತಾನ ಸಂಘರ್ಷದ ವಿಚಾರದಲ್ಲಿ ಅಮೆರಿಕದ ಪರವಾಗಿ ನಿಲ್ಲುವ ಪಾಕಿಸ್ತಾನದ ನಿರ್ಧಾರವು ದೇಶಕ್ಕೆ ಆಳವಾದ ಮತ್ತು ಶಾಶ್ವತವಾದ ಹಾನಿಯನ್ನುಂಟು ಮಾಡಿದೆ ಎಂದು ಆಸಿಫ್ ಹೇಳಿದರು. ತನಗೂ ಸಂಬಂಧವೇ ಇಲ್ಲದ ಯುದ್ಧಗಳಲ್ಲಿ ಪಾಕಿಸ್ತಾನವು ಸ್ವತಃ ಎಳೆದಾಡಲ್ಪಟ್ಟಿತು ಎಂದು ಅವರು ಒಪ್ಪಿಕೊಂಡರು.
ಅಫ್ಘಾನಿಸ್ತಾನದಲ್ಲಿ ಪಾಕಿಸ್ತಾನದ ಪಾತ್ರವು ಧಾರ್ಮಿಕ ಕರ್ತವ್ಯದ ಆಧಾರದ ಮೇಲೆ ಇತ್ತು ಎಂಬ ದಶಕಗಳ ಹಿಂದಿನ ವಾದವನ್ನು ಅವರು ತಳ್ಳಿಹಾಕಿದರು. ಅವರ ಪ್ರಕಾರ, ಪಾಕಿಸ್ತಾನದೊಳಗೆ ಉಗ್ರವಾದ ಮತ್ತು ಅರಾಜಕತೆಯನ್ನು ಉತ್ತೇಜಿಸುವ ಒಂದು ದಾರಿ ತಪ್ಪಿಸುವ ನಿರೂಪಣೆಯಡಿಯಲ್ಲಿ “ಜಿಹಾದ್” ಹೆಸರಿನಲ್ಲಿ ಜನರನ್ನು ಎತ್ತಿಕಟ್ಟಲಾಯಿತು. ಒಂದು ಆಘಾತಕಾರಿ ವಿಷಯವನ್ನೂ ಬಹಿರಂಗಪಡಿಸಿದ ಸಚಿವರು, ಈ ಯುದ್ಧಗಳನ್ನು ಬೆಂಬಲಿಸಲು ಪಾಕಿಸ್ತಾನದ ಶಿಕ್ಷಣ ವ್ಯವಸ್ಥೆಯನ್ನೇ ಬದಲಾಯಿಸಲಾಗಿತ್ತು ಎಂದರು.
ವಿದೇಶಿ ಹಿತಾಸಕ್ತಿಗಳಿಂದ ಪ್ರೇರಿತವಾದ ಸಂಘರ್ಷಗಳಲ್ಲಿ ಪಾಕಿಸ್ತಾನದ ಭಾಗವಹಿಸುವಿಕೆಯನ್ನು ಸಮರ್ಥಿಸಿಕೊಳ್ಳಲು ದೇಶದಲ್ಲಿ ವೈಚಾರಿಕ ಬದಲಾವಣೆಗಳನ್ನು ತರಲಾಯಿತು ಎಂಬುದನ್ನು ಅವರು ಒಪ್ಪಿಕೊಂಡರು. 1980ರ ದಶಕದ ಸೋವಿಯತ್ ವಿರೋಧಿ ಯುದ್ಧವು ಧರ್ಮದ ಬಗ್ಗೆ ಇರಲಿಲ್ಲ, ಬದಲಾಗಿ ಅಮೆರಿಕದ ಭೌಗೋಳಿಕ ರಾಜಕೀಯ ಗುರಿಗಳ ಬಗ್ಗೆ ಇತ್ತು ಎಂಬುದನ್ನು ಅವರು ಸ್ಪಷ್ಟಪಡಿಸಿದರು. ಆದರೆ ಇದರ ಬೆಲೆಯನ್ನು ಸಾಮಾಜಿಕವಾಗಿ ಮತ್ತು ಆರ್ಥಿಕವಾಗಿ ತೆತ್ತಿದ್ದು ಮಾತ್ರ ಪಾಕಿಸ್ತಾನ ಎಂದು ಅವರು ಅಸಮಾಧಾನ ವ್ಯಕ್ತಪಡಿಸಿದರು.
