ಬೆಂಗಳೂರು : ಕನ್ನಡ ಚಿತ್ರರಂಗದ ಹಿರಿಯ ನಟ ಎಂಎಸ್ ಉಮೇಶ್ ಕೊನೆಯುಸಿರೆಳೆದಿದ್ದಾರೆ. ಅವರು ಲಿವರ್ ಕ್ಯಾನ್ಸರ್ನಿಂದ ಬಳಲುತ್ತಿದ್ದರು. ಅವರು ಕಳೆದ ತಿಂಗಳು ಮನೆಯಲ್ಲಿ ಕಾಲು ಜಾರಿ ಬಿದ್ದ ಕಾರಣ ಅವರನ್ನು ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಬಳಿಕ ಎಂಆರ್ಐ ಹಾಗೂ ಸಿಟಿ ಸ್ಕ್ಯಾನ್ ಮಾಡಿದ ಬಳಿಕ ಲಿವರ್ನಲ್ಲಿ ದೊಡ್ಡ ಗಾತ್ರದ ಗಡ್ಡೆ ಇರುವುದು ಪತ್ತೆಯಾಗಿತ್ತು. ಲಿವರ್ ಕ್ಯಾನ್ಸರ್ ಆಗಿ ಅದು ಬೇರೆ ಬೇರೆ ಅಂಗಗಳಿಗೆ ಹರಡಿದೆ ಎಂಬುದು ತಿಳಿದುಬಂದಿತ್ತು. ಇಂದು ಅವರು ಕೊನೆಯುಸಿರೆಳೆದಿದ್ದಾರೆ.
ಕಿದ್ವಾಯಿ ಆಸ್ಪತ್ರೆಯಿಂದ ಅವರ ಪಾರ್ಥಿವ ಶರೀರವನ್ನು ಬೆಂಗಳೂರಿನ ಜೆಪಿ ನಗರಕ್ಕೆ ಸ್ಥಳಾಂತರಿಸಲಾಯಿತು. ಅಲ್ಲಿ ಕೆಲಕಾಲ ಅಂತಿಮ ದರ್ಶನಕ್ಕೆ ವ್ಯವಸ್ಥೆ ಕಲ್ಪಿಸಲಾಯಿತು. ಬಳಿಕ ಬೆಂಗಳೂರಿನ ರವೀಂದ್ರ ಕಲಾಕ್ಷೇತ್ರದಲ್ಲಿ ಸಾರ್ವಜನಿಕ ಅಂತಿಮ ದರ್ಶನಕ್ಕೆ ಅವಕಾಶ ಕಲ್ಪಿಸಲಾಯಿತು. ಈ ವೇಳೆ ಸಿಎಂ ಸಿದ್ದರಾಮಯ್ಯ ಡಿಸಿಎಂ ಡಿಕೆ ಶಿವಕುಮಾರ್ ಸೇರಿದಂತೆ ಹಲವು ಗಣ್ಯರು ಉಮೇಶ್ ಅವರ ಅಂತಿಮ ದರ್ಶನ ಪಡೆದರು. ಬಳಿಕ ಬನಶಂಕರಿ ಚಿತಾಗಾರದಲ್ಲಿ ಬ್ರಾಹ್ಮಣ ಸಂಪ್ರದಾಯದಂತೆ ಅಂತ್ಯಕ್ರಿಯೆ ನೆರವೇರಿತು.
ಚಿತ್ರರಂಗಕ್ಕೆ ಕಾಲಿಟ್ಟದ್ದೆಗೆ?
ಉಮೇಶ್ ಅವರು 1945 ಏಪ್ರಿಲ್ 24 ರಂದು ಎ.ಎಲ್ ಶ್ರೀಕಂಠಯ್ಯ ಮತ್ತು ನಂಜಮ್ಮ ದಂಪತಿಗೆ ಜನಿಸಿದರು.ಅವರ ಪ್ರಾಥಮಿಕ ಶಿಕ್ಷಣ ಮೈಸೂರಿನಲ್ಲಿ ನಡೆಯಿತು , ಅಲ್ಲಿ ಅವರು ರಂಗಭೂಮಿ ಮತ್ತು ರಂಗ ಪ್ರದರ್ಶನಗಳತ್ತ ಆಕರ್ಷಿತರಾದರು.4 ನೇ ವಯಸ್ಸಿನಲ್ಲಿ, ಅವರು ಕೆ. ಹಿರಣ್ಣಯ್ಯ ನಡೆಸುತ್ತಿದ್ದ ಜನಪ್ರಿಯ ರಂಗಭೂಮಿ ತಂಡವನ್ನು ಸೇರಿದರು.
ಹೆಚ್ಚು ಪ್ರಸಿದ್ಧವಾದ ಗುಬ್ಬಿ ವೀರಣ್ಣ ಅವರ ಕಂಪನಿಯನ್ನು ಸೇರಿದರು ಮತ್ತು ಬಾಲ ಕಲಾವಿದರಾಗಿ ವಿವಿಧ ಪಾತ್ರಗಳನ್ನು ನಿರ್ವಹಿಸಿದರು. ಅಂತಹ ರಂಗ ನಾಟಕಗಳಲ್ಲಿ ಒಂದರಲ್ಲಿ ಆಗಿನ ಸಹಾಯಕ ನಿರ್ದೇಶಕ ಪುಟ್ಟಣ್ಣ ಕಣಗಾಲ್ ಅವರನ್ನು ಗಮನಿಸಿ ಬಿ.ಆರ್. ಪಂಥುಲು ಅವರ ಮುಂದಿನ ಚಿತ್ರಕ್ಕೆ ಅವರ ಹೆಸರನ್ನು ಶಿಫಾರಸು ಮಾಡಿದ್ದರು.
1960 ರಲ್ಲಿ ಹಿರಿಯ ನಟ-ನಿರ್ದೇಶಕ ಬಿ.ಆರ್. ಪಂಥುಲು ತಮ್ಮ ಪದ್ಮಿನಿ ಫಿಲ್ಮ್ಸ್ ಬ್ಯಾನರ್‌ಗಾಗಿ ನಿರ್ದೇಶಿಸಿದ ಮಕ್ಕಳ ರಾಜ್ಯ ಚಿತ್ರದಲ್ಲಿ ಉಮೇಶ್ ಮೊದಲ ಬಾರಿಗೆ ಬೆಳ್ಳಿತೆರೆಯ ಮೇಲೆ ಕಾಣಿಸಿಕೊಂಡರು . ಇದು ಎಂ.ವಿ. ರಾಜಮ್ಮ ನಿರ್ಮಿಸಿದ ಎರಡನೇ ಚಿತ್ರವೂ ಆಗಿತ್ತು .ಈ ಚಿತ್ರದಲ್ಲಿ ಹಿರಿಯ ತಮಿಳು ನಟ ಶಿವಾಜಿ ಗಣೇಶನ್ ಕೂಡ ಅತಿಥಿ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು.
ಪ್ರಸಿದ್ದ ಸಿನೆಮಾಗಳು
1980 ರಿಂದ 2000 ರವರೆಗಿನ ಸಾಕಷ್ಟು ಚಲನಚಿತ್ರಗಳಲ್ಲಿ ಉಮೇಶ್ ಬಣ್ಣಹಚ್ಚಿದರು. ನಾಗರ ಹೊಳೆ (1978), ಗುರು ಶಿಷ್ಯರು (1981), ಅನುಪಮ (1981), ಕಾಮನ ಬಿಲ್ಲು (1983), ಅಪೂರ್ವ ಸಂಗಮ (1984), ಶ್ರುತಿ ಸೇರಿದಾಗ (1987), ಶ್ರವಣ ಬಂತು (1984), ಮಲಯ ಮರುತ ( 1986), ಅವರ ನೆನಪಿನಲ್ಲಿ ಉಳಿಯುವ ಕೆಲವು ಉತ್ತಮ ಚಿತ್ರಗಳು. ಹಾಲು ಸಕ್ಕರೆ (1993), ಸಂಕಟದಲ್ಲಿ ವೆಂಕಟ (2007) ಕೂಡ ಉತ್ತಮ ಚಿತ್ರವೆನಿಸಿಕೊಂಡಿತು.
