ಕೆಎನ್‍ಎನ್‍ಡಿಜಿಟಲ್ ಡೆಸ್ಕ್ : ಯುಕೆಯ ಮುಂದಿನ ಪ್ರಧಾನಿಯಾಗಿ ಭಾರತೀಯ ಮೂಲದ ರಿಷಿ ಸುನಕ್ ಆಯ್ಕೆಯಾಗಿದ್ದಾರೆ. 185ಕ್ಕೂ ಹೆಚ್ಚು ಸಂಸದರು ರಿಷಿ ಸುನಕ್ ಪರವಾಗಿದ್ದು, ರೇಸ್‍ನಲ್ಲಿ ಭರ್ಜರಿ ಗೆಲವು ಸಾಧಿಸಿದ್ದಾರೆ.
ಅಂದ್ಹಾಗೆ, ಪ್ರಧಾನಿ ಅಭ್ಯರ್ಥಿ ಪೆನ್ನಿ ಮೊರ್ಡಾಂಟ್ ಟೋರಿ ಸಂಸದರನ್ನ ಬೆಂಬಲಕ್ಕಾಗಿ ಮನವೊಲಿಸಲು ಹೆಣಗಾಡಿದ್ರು. ನಂತ್ರ ಬ್ರಿಟನ್ ನಾಯಕತ್ವ ಸ್ಪರ್ಧೆಯಿಂದ ಪೆನ್ನಿ ಹೊರ ಬಂದರು. ಇನ್ನು ಪ್ರಧಾನಿ ಹುದ್ದೆಗೆ ತಮ್ಮ ಬಿಡ್ ಘೋಷಿಸಬೇಕಿದ್ದ ಬೋರಿಸ್ ಜಾನ್ಸನ್ ಕಳೆದ ರಾತ್ರಿ ಮತ್ತೆ ಸ್ಪರ್ಧೆಯಿಂದ ಹಿಂದೆ ಸರಿದರು.
ಭಗವದ್ಗೀತೆ ಮೇಲೆ ಕೈಯಿಟ್ಟು ಪ್ರಮಾಣ ವಚನ ಸ್ವೀಕರಿಸಿದ ಮೊದಲ ಕ್ಯಾಬಿನೆಟ್ ಸಚಿವರು.!
ರಿಷಿ ಸುನಕ್ ಹಣಕಾಸು ಸಚಿವ ಹುದ್ದೆಯಲ್ಲಿದ್ದು, 2015ರಲ್ಲಿ ರಿಷಿ ಬ್ರಿಟನ್ ಸಂಸತ್ತನ್ನ ಪ್ರವೇಶಿಸಿದರು. 2020ರಲ್ಲಿ ಬ್ರಿಟನ್ ಸಚಿವ ಸಂಪುಟದ ಪ್ರಮುಖ ಹುದ್ದೆಗಳಲ್ಲಿ ಒಂದಾದ ಹಣಕಾಸು ಸಚಿವರಾದ್ರು. ಅಂದ್ಹಾಗೆ, ಸುನಕ್ಈ ಹುದ್ದೆಗೇರಿದ ಭಾರತ ಮೂಲದ ಮೊದಲ ವ್ಯಕ್ತಿಯಾಗಿದ್ದಾರೆ.
ರಿಷಿ ಸುನಕ್ ಅವರನ್ನ ಬ್ರಿಟನ್ನಿನ ಹಣಕಾಸು ಸಚಿವರನ್ನಾಗಿ ಮಾಡಿದಾಗ ಅವರು ಭಗವದ್ಗೀತೆಯ ಮೇಲೆ ಕೈಯಿಟ್ಟು ಪ್ರಮಾಣ ವಚನ ಸ್ವೀಕರಿಸಿದ್ದರಿಂದ ಅವರ ಪರಂಪರೆಯನ್ನ ಅಪ್ಪಿಕೊಳ್ಳಲು ಹಿಂಜರಿಯಲಿಲ್ಲ. “ನಾನು ಈಗ ಬ್ರಿಟನ್ ಪ್ರಜೆಯಾಗಿದ್ದೇನೆ. ಆದ್ರೆ, ನನ್ನ ಧರ್ಮ ಹಿಂದೂ. ನನ್ನ ಧಾರ್ಮಿಕ ಮತ್ತು ಸಾಂಸ್ಕೃತಿಕ ಪರಂಪರೆ ಭಾರತೀಯವಾಗಿದೆ. ನಾನು ಹಿಂದೂ ಮತ್ತು ನನ್ನ ಅಸ್ಮಿತೆಯೂ ಹಿಂದೂ ಎಂದು ನಾನು ಹೆಮ್ಮೆಯಿಂದ ಹೇಳುತ್ತೇನೆ” ಎಂದು ಸುನಕ್ ಹೇಳಿದ್ದರು.
ವಿಶೇಷವೆಂದ್ರೆ, ಕೋವಿಡ್ 19 ಸಾಂಕ್ರಾಮಿಕದಿಂದ ಬ್ರಿಟನ್ ತತ್ತರಿಸುತ್ತಿದ್ದ ವೇಳೆ ಆರ್ಥಿಕತೆಯನ್ನ ನಿಭಾಯಿಸುವಲ್ಲಿ ರಿಷಿ ಯಶಸ್ವಿಯಾಗಿದ್ದು, ಕೊರೊನಾ ವೇಳೆ ನಷ್ಟದಿಂದ ತತ್ತರಿಸಿದ್ದ ಉದ್ಯಮಗಳಿಗೆ ಅನುಕೂಲಕರವಾದ ಯೋಜನೆಗಳನ್ನ ಜಾರಿಗೆ ತಂದಿದ್ದರು.
ಯುಕೆಯನ್ನು ಮುನ್ನಡೆಸಿದ ಮೊದಲ ಬಿಳಿಯೇತರ ವ್ಯಕ್ತಿ.!
ಬ್ರಿಟಿಷ್ ರಾಜಕೀಯದಲ್ಲಿ ಅತ್ಯಂತ ಗಮನಾರ್ಹ ರಾಜಕೀಯ ಪುನರಾಗಮನಗಳಲ್ಲಿ ಒಂದಾದ ರಿಷಿ ಸುನಕ್ ಅವರು ಉನ್ನತ ಹುದ್ದೆಯನ್ನು ವಹಿಸಿಕೊಂಡ ಬ್ರಿಟನ್’ನ ಮೊದಲ ಬಿಳಿಯೇತರ ನಾಯಕರಾಗಿದ್ದಾರೆ. ಅವರು ಬ್ರಿಟನ್ನಿನ ಮೊದಲ ಹಿಂದೂ ಪ್ರಧಾನ ಮಂತ್ರಿಯೂ ಆಗಿದ್ದಾರೆ.
ಯುನೈಟೆಡ್ ಕಿಂಗ್ ಡಮ್’ನ ಅತ್ಯಂತ ಕಿರಿಯ ಪ್ರಧಾನಿ.!
42ನೇ ವಯಸ್ಸಿನಲ್ಲಿ, ಅವರು 200ಕ್ಕೂ ಹೆಚ್ಚು ವರ್ಷಗಳಲ್ಲೇ ಅತ್ಯಂತ ಕಿರಿಯ ಪ್ರಧಾನಿಯಾಗಲಿದ್ದಾರೆ, ಅವರ ಯೌವನದ ನೋಟ, ತೀಕ್ಷ್ಣವಾದ ಸೂಟ್ಗಳು ಮತ್ತು ನಯವಾದ, ಆತ್ಮವಿಶ್ವಾಸದ ನಡವಳಿಕೆಯನ್ನ ಹೊಂದಿರುವ ರಾಜಕೀಯ ಮೇಧಾವಿಯಾಗಿದ್ದು, ಬ್ರಿಟಿಷ್ ಮಾಧ್ಯಮಗಳು ಅವರನ್ನ “ಡಿಶಿ ರಿಷಿ” ಎಂದು ಕರೆದವು.
ವಿಲಿಯಂ ಪಿಟ್ ‘ದಿ ಯಂಗರ್’ ತನ್ನ 24ನೇ ವಯಸ್ಸಿನಲ್ಲಿ ಯುಕೆಯ ಅತ್ಯಂತ ಕಿರಿಯ ಪ್ರಧಾನಿಯಾಗಿದ್ದರು.
ಇನ್ನು ಪ್ರತಿಷ್ಠಿತ ವಿಂಚೆಸ್ಟರ್‌ ಕಾಲೇಜಿನಲ್ಲಿ ಅಧ್ಯಯನ ನಡೆಸಿರುವ ಸುನಕ್, ಆಕ್ಸ್‌ಫರ್ಡ್‌ ವಿವಿಯಲ್ಲಿ ರಾಜಕೀಯ, ಫಿಲಾಸಫಿ ಮತ್ತು ಅರ್ಥಶಾಸ್ತ್ರದಲ್ಲಿ ಉನ್ನತ ಶಿಕ್ಷಣ ಪಡೆದುಕೊಂಡಿದ್ದಾರೆ. ಅಮೆರಿಕಾ ಸ್ಟಾನ್‌ಫರ್ಡ್‌ ವಿವಿಯಿಂದ ಎಂಬಿಎ ಪದವಿಯನ್ನೂ ಪಡೆದುಕೊಂಡಿದ್ದಾರೆ.
ಸುನಕ್ ತಂದೆ ವೈದ್ಯರಾಗಿದ್ದು, ತಾಯಿ ರಾಸಾಯನಿಕ ವಸ್ತುಗಳ ಅಂಗಡಿ ನಡೆಸುತ್ತಿದ್ದರು. ಇನ್ನು ರಿಷಿ ಇನ್ಫೋಸಿಸ್ ನಾರಾಣಮೂರ್ತಿ ಅಳಿಯ. ಹೌದು, ರಿಷಿ ಸುನಾಕ್ ನಾರಾಯಣ ಮೂರ್ತಿ ಮತ್ತು ಸುಧಾಮೂರ್ತಿ ದಂಪತಿ ಮಗಳು ಅಕ್ಷತಾರನ್ನ ವಿವಾಹವಾಗಿ ಬ್ರಿಟನ್‌ನಲ್ಲಿ ನೆಲೆಸಿದ್ದಾರೆ. ಇವರಿಗೆ ಕೃಷ್ಣ ಮತ್ತು ಅನುಷ್ಕಾ ಎಂಬ ಇಬ್ಬರು ಮಕ್ಕಳಿದ್ದಾರೆ.
