ಬೆಂಗಳೂರು : ಸಾಮಾನ್ಯವಾಗಿ ಮೊಣಕಾಲಿನ ಕೆಳಗಿನಿಂದ ಕಾಲಿಗೆ ಹಾನಿಯಾದ್ರೆ, ಅದರ ಜಾಗದಲ್ಲಿ ಮೊಣಕಾಲು ಅಳವಡಿಸಲಾಗುತ್ತದೆ. ಆದ್ರೆ, ಮಾರುಕಟ್ಟೆಯಲ್ಲಿ ಒಂದೇ ಒಂದು ಕೃತಕ ಅಂಗಕ್ಕೆ 10 ರಿಂದ 60 ಲಕ್ಷ ರೂ.ವರೆಗೆ ಬೆಲೆ ಬರುವುದರಿಂದ ಹಣವಿದ್ದವರಿಗೆ ಮಾತ್ರ ಇದು ಸಾಧ್ಯ. ಆದಾಗ್ಯೂ, ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ (ಇಸ್ರೋ) ಈ ಕೃತಕ ಮೊಣಕಾಲನ್ನು ಅತ್ಯಂತ ಅಗ್ಗದ ಬೆಲೆಯಲ್ಲಿ ಲಭ್ಯವಾಗುವಂತೆ ಮಾಡಲು ಸಜ್ಜಾಗಿದೆ, ಇದರ ಭಾಗವಾಗಿ ಅದು ಈಗಾಗಲೇ ಮೈಕ್ರೋಪ್ರೊಸೆಸರ್‍ನಿಂದ ಚಾಲಿತ ಕೃತಕ ಮೊಣಕಾಲುಗಳನ್ನ ಅಭಿವೃದ್ಧಿಪಡಿಸಿದೆ. ಆದ್ರೆ, ಇದರ ವಾಣಿಜ್ಯ ಉತ್ಪಾದನೆ ಆರಂಭವಾಗಬೇಕಿದೆ. ಅದು ನಡೆದರೆ 4 ಲಕ್ಷದಿಂದ 5 ಲಕ್ಷದೊಳಗೆ ಕೃತಕ ಮಂಡಿಗಳನ್ನ ಖರೀದಿಸಬಹುದಾಗಿದೆ .
ಇಸ್ರೋ ಈ ಕೃತಕ ಮೊಣಕಾಲುಗಳಿಗೆ ಮೈಕ್ರೋ ಪ್ರೊಸೆಸರ್ ಕಂಟ್ರೋಲರ್ ನೀಸ್ (MPK) ಎಂದು ಹೆಸರಿಸಿದೆ. ಅತ್ಯಂತ ಕಡಿಮೆ ತೂಕದ ಈ ಕೃತಕ ಅಂಗವು ಕೇವಲ 1.6 ಕೆಜಿ ಎಂದು ಇಸ್ರೋ ಬಹಿರಂಗಪಡಿಸಿದೆ. ಈ ಎಂಪಿಕೆ ಸಾಧನವು ಕಾಲುಗಳಿಲ್ಲದ ಅಂಗವಿಕಲರಿಗೆ ಸಹಾಯ ಮಾಡುತ್ತದೆ ಎಂದು ಇಸ್ರೋ ಹೇಳಿದೆ.
ಇದಲ್ಲದೆ, ಮಾರುಕಟ್ಟೆಯಲ್ಲಿ ಕೃತಕ ಕೈಕಾಲುಗಳಿಗೆ ಹೋಲಿಸಿದರೆ ಈ ಎಲೆಕ್ಟ್ರಾನಿಕ್ ಮೊಣಕಾಲಿನ ಬೆಲೆ 10 ಪಟ್ಟುಅಗ್ಗವಾಗಿದೆ ಎಂದು ಇಸ್ರೋ ಹೇಳಿಕೊಂಡಿದೆ. ಇದರ ಸಹಾಯದಿಂದ ಅಂಗವಿಕಲರು ಯಾವುದೇ ಬೆಂಬಲವಿಲ್ಲದೆ 100 ಮೀಟರ್ ನಡೆಯಬಹುದು ಎಂದು ಇಸ್ರೋ ಹೇಳುತ್ತದೆ.
ಇದರಿಂದ ವಿಕಲಚೇತನರ ನಡಿಗೆಯ ಕನಸು ನನಸಾಗಲಿದೆ.ಈ MPK ಮೈಕ್ರೊಪ್ರೊಸೆಸರ್, ಹೈಡ್ರಾಲಿಕ್ ಡ್ಯಾಂಪರ್, ಲೋಡ್, ಮೊಣಕಾಲು ಕೋನ ಸಂವೇದಕಗಳು, ಸಂಯೋಜಿತ ಮೊಣಕಾಲು-ಕೇಸ್, ಲಿ-ಐಯಾನ್ ಬ್ಯಾಟರಿ, ವಿದ್ಯುತ್ ಸರಂಜಾಮು, ಇಂಟರ್ಫೇಸ್ ಅಂಶಗಳನ್ನು ಒಳಗೊಂಡಿದೆ. ಇವೆಲ್ಲವುಗಳ ಸಹಾಯದಿಂದ ಕೃತಕ ಮೊಣಕಾಲು ನಡೆಯುವಾಗ ಉತ್ತಮ ಅನುಭವವನ್ನ ನೀಡುತ್ತದೆ.
