ಕೋಲ್ಕತ್ತಾ: ಎರಡು ವಾರಗಳ ಹಿಂದೆ ಕಿಡ್ನ್ಯಾಪ್‌ ಆಗಿದ್ದ ಇಬ್ಬರು ವಿದ್ಯಾರ್ಥಿಗಳಿಬ್ಬರು ಕೋಲ್ಕತ್ತಾ ಬಳಿ ರಸ್ತೆ ಬದಿಯ ಹಳ್ಳದಲ್ಲಿ ಶವವಾಗಿ ಪತ್ತೆಯಾಗಿದ್ದಾರೆ.
ಕೋಲ್ಕತ್ತಾದ ಬಾಗುಹತಿ ಪ್ರದೇಶದಿಂದ ಆಗಸ್ಟ್ 22 ರಿಂದ ಈ ಇಬ್ಬರು ವಿದ್ಯಾರ್ಥಿಗಳು ನಾಪತ್ತೆಯಾಗಿದ್ದರು. ಇದೀಗ ಅವರು ಶವವಾಗಿ ಪತ್ತೆಯಾಗಿದ್ದಾರೆ. ಈ ಸಂಬಂಧ ಪೊಲೀಸರು ನಾಲ್ವರನ್ನು ಬಂಧಿಸಿದ್ದಾರೆ.
ಪೊಲೀಸರ ಪ್ರಕಾರ, ಮೃತರನ್ನು ಅತಾನು ಡೇ ಮತ್ತು ಅಭಿಷೇಕ್ ನಸ್ಕರ್ ಎಂದು ಗುರುತಿಸಲಾಗಿದ್ದು, ಅವರ ಸಹಚರರೊಂದಿಗೆ ಹಣಕಾಸಿನ ವಿವಾದ ನಡೆದಿತ್ತು. ಇದರಿಂದಾಗಿ ಅವರನ್ನು ಕತ್ತು ಹಿಸುಕಿ ಕೊಂದಿದ್ದಾರೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಏನಿದು ಘಟನೆ?
ಪ್ರಾಥಮಿಕ ತನಿಖೆಯ ಪ್ರಕಾರ, ಆರೋಪಿ ಚೌಧರಿಗೆ ಮೋಟಾರ್ ಸೈಕಲ್ ಖರೀದಿಸಲು ಅತಾನು 50,000 ರೂಪಾಯಿ ನೀಡಿದ್ದ. ಆದ್ರೆ, ಹಲವು ತಿಂಗಳು ಕಳೆದರೂ ಆರೋಪಿ ದ್ವಿಚಕ್ರ ವಾಹನ ಖರೀದಿಸಿಲ್ಲ, ಹಣ ವಾಪಸ್ ನೀಡಿಲ್ಲ. ಈ ವೇಳೆ ಅತಾನು ಹಣ ವಾಪಸ್ ಬೇಕು ಎಂದು ಕೇಳಿದಾಗ ಸಮಸ್ಯೆ ಶುರುವಾಗಿದೆ.
ಈ ವೇಳೆ ಆರೋಪಿಗಳು ಅತಾನು ಡೇ ಮತ್ತು ಅಭಿಷೇಕ್ ನಸ್ಕರ್ ಇಬ್ಬರನ್ನೂ ಬೈಕ್‌ ಖರೀದಿಸುವುದಾಗಿ ಹೇಳಿ ಕಾರಿನಲ್ಲಿ ಆಗಸ್ಟ್ 22ರಂದು ಕರೆದುಕೊಂಡು ಹೋಗಿದ್ದಾರೆ. ಆದ್ರೆ, ಮಕ್ಕಳು ಸಂಜೆಯಾದ್ರೂ ಮನೆಗೆ ಬರಲ್ಲಿಲ್ಲ. ಈ ವೇಳೆ ಆರೋಪಿಗಳು ಪೋಷಕರಿಗೆ ಕರೆ ಮಾಡಿದ್ದಾರೆ. ನಿಮ್ಮ ಮಕ್ಕಳನ್ನು ಅಪಹರಿಸಲಾಗಿದೆ ಎಂದಿರುವ ಅವರು ಬೈಕ್‌ ಖರೀದಿಸಲು ಹಣಕ್ಕಾಗಿ ಬೇಡಿಕೆ ಇಟ್ಟಿದ್ದಾರೆ. ಈ ವೇಳೆ ಪೋಷಕರು ಪೊಲೀಸರಿಗೆ ಈ ಸಂಬಂಧ ದೂರು ನೀಡಿದ್ದರು. ಆದ್ರೆ, ಇದೀಗ ಮಕ್ಕಳು ಶವವಾಗಿ ಪತ್ತೆಯಾಗಿದ್ದಾರೆ.
ಇನ್ನೂ, ಸಿಕ್ಕಿಬಿದ್ದ ಆರೋಪಿಗಳು ಅತಾನು ಡೇ ಮತ್ತು ಅಭಿಷೇಕ್ ನಸ್ಕರ್ ಅನ್ನು ಕಾರಿನಲ್ಲೇ ಕತ್ತುಹಿಸುಕಿ ಕೊಂದು ಹಳ್ಳಕ್ಕೆ ಎಸೆದಿರುವುದಾಗಿ ತಮ್ಮ ತಪ್ಪನ್ನು ಒಪ್ಪಿಕೊಂಡಿದ್ದಾರೆ.
