₹30,000 ಸಂಬಳದಲ್ಲೂ ಶ್ರೀಮಂತರಾಗಬಹುದು : 50-30-20 ಸೂತ್ರದಿಂದ ಹಣ ಉಳಿಸುವ ಸುಲಭ ಮಾರ್ಗ

ಆರ್ಥಿಕವಾಗಿ ಸ್ಥಿರತೆ ಸಾಧಿಸಲು ನಾವು ಎಷ್ಟು ಸಂಪಾದಿಸುತ್ತಿದ್ದೇವೆ ಎನ್ನುವುದಕ್ಕಿಂತ, ಸಂಪಾದಿಸಿದ್ದರಲ್ಲಿ ಎಷ್ಟು ಉಳಿಸುತ್ತಿದ್ದೇವೆ ಎನ್ನುವುದು ಮುಖ್ಯವಾಗುತ್ತದೆ. ಇಂದಿನ ದಿನಗಳಲ್ಲಿ ಅನೇಕರು ತಿಂಗಳ ಮಧ್ಯದಲ್ಲಿಯೇ ಕೈಯಲ್ಲಿರುವ ಹಣವನ್ನೆಲ್ಲಾ ಖಾಲಿ ಮಾಡಿಕೊಂಡು, ಉಳಿದ ದಿನಗಳನ್ನು ಕಳೆಯಲು ಪರದಾಡುತ್ತಾರೆ. ಇಂತಹ ಆರ್ಥಿಕ ಸಂಕಷ್ಟಗಳಿಗೆ ಬ್ರೇಕ್ ಹಾಕಲು ಆರ್ಥಿಕ ತಜ್ಞರು ಒಂದು ಅದ್ಭುತವಾದ ಸೂತ್ರವನ್ನು ಸೂಚಿಸುತ್ತಾರೆ. ಅದೇ ’50-30-20′ ರೂಲ್.

ಏನಿದು 50-30-20 ಸೂತ್ರ?

ಈ ಫಾರ್ಮುಲಾ ನಿಮ್ಮ ತಿಂಗಳ ಆದಾಯವನ್ನು ಪ್ರಮುಖವಾಗಿ ಮೂರು ಭಾಗಗಳಾಗಿ ವಿಂಗಡಿಸುತ್ತದೆ:

50 ಪ್ರತಿಶತ – ಅಗತ್ಯಗಳು (Needs):

ನಿಮ್ಮ ಸಂಬಳದ ಅರ್ಧದಷ್ಟು ಭಾಗವನ್ನು (ಅಂದರೆ 30,000 ರೂ. ಸಂಬಳದಲ್ಲಿ 15,000 ರೂ.) ಕೇವಲ ಅತ್ಯಗತ್ಯ ಸೌಲಭ್ಯಗಳಿಗೆ ಮಾತ್ರ ಬಳಸಬೇಕು. ಇದರಲ್ಲಿ ಮನೆ ಬಾಡಿಗೆ, ಕರೆಂಟ್ ಬಿಲ್, ದಿನಸಿ ಸಾಮಗ್ರಿಗಳು, ಪ್ರಯಾಣದ ವೆಚ್ಚ ಹಾಗೂ ಆರೋಗ್ಯ ವಿಮೆ (Health Insurance) ಪ್ರೀಮಿಯಂಗಳು ಸೇರಿವೆ. ಇವುಗಳನ್ನು ನಾವು ಯಾವುದೇ ಕಾರಣಕ್ಕೂ ತಪ್ಪಿಸಲು ಸಾಧ್ಯವಿಲ್ಲ.

30 ಪ್ರತಿಶತ – ಆಸೆಗಳು (Wants):
ಮುಂದಿನ 30 ಪ್ರತಿಶತ ಹಣವನ್ನು (ಅಂದರೆ 9,000 ರೂ.) ನಿಮ್ಮ ವೈಯಕ್ತಿಕ ಇಷ್ಟಗಳಿಗಾಗಿ ಬಳಸಬಹುದು. ಹೊರಗಡೆ ಹೋಟೆಲ್ಗಳಲ್ಲಿ ಊಟ ಮಾಡುವುದು, ಸಿನಿಮಾ, ಶಾಪಿಂಗ್, ಒಟಿಟಿ ಸಬ್ಸ್ಕ್ರಿಪ್ಷನ್ಗಳು ಇದಕ್ಕೆ ಸೇರುತ್ತವೆ. ಇವುಗಳಿಲ್ಲದೆಯೂ ಜೀವನ ನಡೆಸಬಹುದು, ಆದರೆ ಇವು ನಮಗೆ ಸಂತೋಷವನ್ನು ನೀಡುತ್ತವೆ. ಒಂದು ವೇಳೆ ನಿಮ್ಮ ಅತ್ಯಗತ್ಯ ಖರ್ಚುಗಳು 50% ಕ್ಕಿಂತ ಹೆಚ್ಚಾದರೆ, ಈ ‘ಆಸೆಗಳ’ ಬಜೆಟ್ನಿಂದ ಹಣವನ್ನು ಕಡಿತಗೊಳಿಸಿ ಅಲ್ಲಿಗೆ ಸರಿದೂಗಿಸಬೇಕು.

20 ಪ್ರತಿಶತ – ಉಳಿತಾಯ ಮತ್ತು ಹೂಡಿಕೆ (Savings & Investments):
ಕೊನೆಯ 20 ಪ್ರತಿಶತ ಭಾಗವನ್ನು (ಅಂದರೆ 6,000 ರೂ.) ಭವಿಷ್ಯಕ್ಕಾಗಿ ಉಳಿಸಬೇಕು. ಈ ಮೊತ್ತವನ್ನು ನಿಮ್ಮ ತುರ್ತು ನಿಧಿ (Emergency Fund), ಮ್ಯೂಚುವಲ್ ಫಂಡ್ಗಳು, ಎಸ್ಐಪಿ (SIP) ಅಥವಾ ಇತರೆ ಸುರಕ್ಷಿತ ಹೂಡಿಕೆಗಳಿಗೆ ಬಳಸಬೇಕು.

30,000 ರೂ. ಸಂಬಳದಲ್ಲಿ ಇದನ್ನು ಜಾರಿಗೆ ತರುವುದು ಹೇಗೆ?
ಬಜೆಟ್ ಟ್ರ್ಯಾಕಿಂಗ್: ತಿಂಗಳ ಆರಂಭದಿಂದಲೇ ನಿಮ್ಮ ಪ್ರತಿಯೊಂದು ಖರ್ಚುಗಳನ್ನು ಒಂದು ಪುಸ್ತಕದಲ್ಲಿ ಅಥವಾ ಮೊಬೈಲ್ ಆಪ್ನಲ್ಲಿ ಬರೆದಿಟ್ಟುಕೊಳ್ಳಿ. ಇದರಿಂದ ಅನಗತ್ಯವಾಗಿ ಎಲ್ಲಿ ಹಣ ವ್ಯಯವಾಗುತ್ತಿದೆ ಎಂಬುದು ತಿಳಿಯುತ್ತದೆ.

ಆಟೊಮೇಷನ್ (Automation): ಸಂಬಳ ಬ್ಯಾಂಕ್ ಖಾತೆಗೆ ಜಮೆಯಾದ ತಕ್ಷಣ, ಮೊದಲ ಕೆಲಸವಾಗಿ 20 ಪ್ರತಿಶತ ಹಣವನ್ನು (6,000 ರೂ.) ಬೇರೆ ಉಳಿತಾಯ ಖಾತೆಗೆ ಅಥವಾ ಹೂಡಿಕೆಗೆ ವರ್ಗಾಯಿಸಿ. ಎಲ್ಲಾ ಖರ್ಚುಗಳು ಮುಗಿದ ನಂತರ ಉಳಿದಿದ್ದನ್ನು ದಾಸ್ತಾನು ಮಾಡೋಣ ಅಂದುಕೊಂಡರೆ ಆರ್ಥಿಕ ಶಿಸ್ತು ಸಾಧ್ಯವಿಲ್ಲ.

ಸಾಲಗಳಿಂದ ದೂರವಿರಿ: ಕ್ರೆಡಿಟ್ ಕಾರ್ಡ್ ಬಿಲ್ಗಳು ಮತ್ತು ಅನಗತ್ಯ ಇಎಂಐ (EMI) ಗಳ ಜಾಲಕ್ಕೆ ಬೀಳದಿರುವುದೇ ಜಾಣತನ.

ನಿಮ್ಮ ಸಂಬಳ 30,000 ರೂ. ಇರಲಿ ಅಥವಾ ಅದಕ್ಕಿಂತ ಹೆಚ್ಚಿರಲಿ, ಈ 50-30-20 ಸೂತ್ರವು ನಿಮ್ಮ ಆರ್ಥಿಕ ಸ್ವಾತಂತ್ರ್ಯಕ್ಕೆ ಗಟ್ಟಿ ಮುನ್ನುಡಿ ಬರೆಯುತ್ತದೆ. ಇಂದಿನ ಸಣ್ಣ ಉಳಿತಾಯವೇ ನಾಳಿನ ದೊಡ್ಡ ಮೊತ್ತದ ಆಸ್ತಿಯಾಗುತ್ತದೆ. ಕಟ್ಟುನಿಟ್ಟಾದ ಆರ್ಥಿಕ ಶಿಸ್ತಿನಿಂದ ಈ ನಿಯಮವನ್ನು ಪಾಲಿಸಿದರೆ, ಯಾವುದೇ ಆರ್ಥಿಕ ಒತ್ತಡವಿಲ್ಲದೆ ನೆಮ್ಮದಿಯ ಜೀವನ ನಡೆಸಬಹುದು.