ಇಸ್ಲಾಮಾಬಾದ್: ಅಮೆರಿಕ ಮತ್ತು ಇರಾನ್ ನಡುವಿನ ಶಾಂತಿ ಮಾತುಕತೆಗಾಗಿ ಪಾಕಿಸ್ತಾನಕ್ಕೆ ಆಗಮಿಸಿದ ಅತಿಥಿಗಳನ್ನು ಬರಮಾಡಿಕೊಂಡ ಪಾಕ್ ಸೇನಾ ಮುಖ್ಯಸ್ಥ (COAS) ಜನರಲ್ ಅಸಿಮ್ ಮುನೀರ್ ಅವರ ಉಡುಪು ಈಗ ಜಾಗತಿಕ ರಾಜತಾಂತ್ರಿಕ ವಲಯದಲ್ಲಿ ಚರ್ಚೆಗೆ ಕಾರಣವಾಗಿದೆ. ಇರಾನ್ ನಿಯೋಗವನ್ನು ಭೇಟಿಯಾಗುವಾಗ ಮಿಲಿಟರಿ ಸಮವಸ್ತ್ರ ಧರಿಸಿದ್ದ ಮುನೀರ್, ಅಮೆರಿಕದ ಉಪಾಧ್ಯಕ್ಷ ಜೆಡಿ ವ್ಯಾನ್ಸ್ ಅವರನ್ನು ಭೇಟಿಯಾಗುವಾಗ ಮಾತ್ರ ಸಿವಿಲ್ ಉಡುಪು (Suit) ಧರಿಸಿದ್ದರು.
ಇಸ್ಲಾಮಾಬಾದ್ನಲ್ಲಿ ಇರಾನ್ನ ಉನ್ನತ ಅಧಿಕಾರಿಗಳ ಜೊತೆಗಿನ ಮಾತುಕತೆಯ ವೇಳೆ ಜನರಲ್ ಅಸಿಮ್ ಮುನೀರ್ ಅವರು ಪೂರ್ಣ ಪ್ರಮಾಣದ ಸೈನ್ಯದ ಯುನಿಫಾರ್ಮ್ ಮತ್ತು ಪದಕಗಳನ್ನು ಧರಿಸಿದ್ದರು. ಆದರೆ, ಕೆಲವೇ ಗಂಟೆಗಳ ನಂತರ ಅಮೆರಿಕದ ಉಪಾಧ್ಯಕ್ಷ ಜೆಡಿ ವ್ಯಾನ್ಸ್ ಅವರನ್ನು ಭೇಟಿಯಾದಾಗ ಅವರು ಕೋಟ್-ಪ್ಯಾಂಟ್ ಧರಿಸಿ ಕಾಣಿಸಿಕೊಂಡಿದ್ದರು.
ಈ ವ್ಯತ್ಯಾಸವು ಕೇವಲ ಆಕಸ್ಮಿಕವಲ್ಲ, ಇದರ ಹಿಂದೆ ದೊಡ್ಡ ರಾಜತಾಂತ್ರಿಕ ಸಂದೇಶವಿದೆ ಎಂದು ತಜ್ಞರು ವಿಶ್ಲೇಷಿಸುತ್ತಿದ್ದಾರೆ. ಅಮೆರಿಕದಂತಹ ಪ್ರಜಾಪ್ರಭುತ್ವ ದೇಶಗಳ ನಾಯಕರನ್ನು ಭೇಟಿಯಾಗುವಾಗ ಸೇನಾ ನಾಯಕರು ಹೆಚ್ಚಾಗಿ ನಾಗರಿಕ ಉಡುಪನ್ನು (Civilian Attire) ಧರಿಸುವ ಮೂಲಕ ತಾವು ‘ನಾಗರಿಕ ಆಡಳಿತ’ಕ್ಕೆ ಗೌರವ ನೀಡುತ್ತೇವೆ ಎಂಬ ಸಂಕೇತ ನೀಡುತ್ತಾರೆ.
ಇರಾನ್ನೊಂದಿಗೆ ಮಾತುಕತೆ ನಡೆಸುವಾಗ ಯುನಿಫಾರ್ಮ್ ಧರಿಸಿದ್ದು “ಸೇನೆಯಿಂದ ಸೇನೆಗೆ” (Military-to-Military) ಇರುವ ಸಂಬಂಧ ಮತ್ತು ಭದ್ರತಾ ವಿಷಯಗಳ ಮೇಲಿನ ಹಿಡಿತವನ್ನು ತೋರಿಸಲು ಎನ್ನಲಾಗಿದೆ.
ಜೆಡಿ ವ್ಯಾನ್ಸ್ ಅವರು ಚುನಾಯಿತ ಪ್ರತಿನಿಧಿಯಾಗಿದ್ದು, ಅವರ ಮುಂದೆ ಸೌಮ್ಯವಾಗಿ ಕಾಣಿಸಿಕೊಳ್ಳುವ ಮೂಲಕ ಪಾಕಿಸ್ತಾನವು ಅಮೆರಿಕದೊಂದಿಗಿನ ತನ್ನ ಸಂಬಂಧವನ್ನು ಎಷ್ಟು ಗಂಭೀರವಾಗಿ ಪರಿಗಣಿಸಿದೆ ಎಂಬುದನ್ನು ತೋರಿಸಲು ಈ ರೀತಿ ಮಾಡಲಾಗಿದೆ ಎನ್ನಲಾಗುತ್ತಿದೆ.
