ಟೆಹ್ರಾನ್: ಇರಾನ್ ಮೇಲೆ ಇಸ್ರೇಲ್ ಮತ್ತು ಅಮೆರಿಕ ಜಂಟಿಯಾಗಿ ನಡೆಸಿದ ಭೀಕರ ಕ್ಷಿಪಣಿ ದಾಳಿಯಲ್ಲಿ ಇರಾನ್ ನ ಅತ್ಯುನ್ನತ ನಾಯಕ (ಸುಪ್ರೀಂ ಲೀಡರ್) ಆಯತೊಲ್ಲಾ ಅಲಿ ಖಮೇನಿ ಸಾವನ್ನಪ್ಪಿದ್ದಾರೆ. ಈ ದಾಳಿಯೊಂದಿಗೆ ಇರಾನ್ನಲ್ಲಿ ಕಳೆದ 36 ವರ್ಷಗಳಿಂದ ನಡೆದುಬಂದಿದ್ದ ಖಮೇನಿ ಅವರ ಸುದೀರ್ಘ ಆಡಳಿತ ಅಂತ್ಯಗೊಂಡಿದೆ.
ಖಮೇನಿ ಅವರ ನಿಧನದ ಹಿನ್ನೆಲೆಯಲ್ಲಿ ಇರಾನ್ ಸರ್ಕಾರ ದೇಶಾದ್ಯಂತ 40 ದಿನಗಳ ಶೋಕಾಚರಣೆ ಘೋಷಿಸಿದೆ. ಈ ಹಠಾತ್ ಬೆಳವಣಿಗೆಯಿಂದಾಗಿ ಇಡೀ ಪಶ್ಚಿಮ ಏಷ್ಯಾದಲ್ಲಿ ಉದ್ವಿಗ್ನ ಪರಿಸ್ಥಿತಿ ನಿರ್ಮಾಣವಾಗಿದೆ.
ಜೈಲು ವಾಸದಿಂದ ಸುಪ್ರೀಂ ಲೀಡರ್ ಪಟ್ಟದವರೆಗೆ: ಖಮೇನಿ ಹಾದಿ
ಅಲಿ ಖಮೇನಿ ಕೇವಲ ಒಬ್ಬ ಧಾರ್ಮಿಕ ನಾಯಕರಾಗಿರಲಿಲ್ಲ, ಬದಲಿಗೆ ರಾಜತಾಂತ್ರಿಕ ತಂತ್ರಗಳನ್ನು ರೂಪಿಸುವಲ್ಲಿಯೂ ಚತುರರಾಗಿದ್ದರು. ಅವರ ಅಧಿಕಾರದ ಹಾದಿ ಸುಲಭದ್ದಾಗಿರಲಿಲ್ಲ:
ಜೈಲು ಮತ್ತು ಹಿಂಸೆ: 1963ರಲ್ಲಿ ಇರಾನ್ನಲ್ಲಿ ಶಾ ಆಡಳಿತವಿದ್ದಾಗ ಖಮೇನಿ ಅವರನ್ನು ಜೈಲಿಗೆ ಅಟ್ಟಲಾಗಿತ್ತು. ಅಲ್ಲಿ ಅವರು ಭೀಕರ ದೈಹಿಕ ಪ್ರತಾಪನೆಗೆ ಒಳಗಾಗಿದ್ದರು.
ಕ್ರಾಂತಿಯ ನಂತರದ ಬೆಳವಣಿಗೆ: ಇರಾನಿ ಕ್ರಾಂತಿಯ ನಂತರ, ಅಂದಿನ ಸುಪ್ರೀಂ ಲೀಡರ್ ಆಯತೊಲ್ಲಾ ರುಹೊಲ್ಲಾ ಖೊಮೇನಿ ಅವರ ಆಡಳಿತದಲ್ಲಿ ಖಮೇನಿ ಅವರು ಉಪ ರಕ್ಷಣಾ ಸಚಿವರಾಗಿ ನೇಮಕಗೊಂಡರು.
ಯುದ್ಧದ ಗಾಯ ಮತ್ತು ‘ಮಸಿಹಾ’ ಇಮೇಜ್: 1981ರಲ್ಲಿ ಟೆಹ್ರಾನ್ನ ಮಸೀದಿಯೊಂದರಲ್ಲಿ ನಡೆದ ಬಾಂಬ್ ಸ್ಫೋಟದಲ್ಲಿ ಖಮೇನಿ ಗಂಭೀರವಾಗಿ ಗಾಯಗೊಂಡಿದ್ದರು. ಈ ದಾಳಿಯಲ್ಲಿ ಅವರ ಬಲಗೈ ಪಾರ್ಶ್ವವಾಯುವಿಗೆ ತುತ್ತಾಯಿತು ಮತ್ತು ಒಂದು ಕಿವಿಯ ಕೇಳುವ ಸಾಮರ್ಥ್ಯ ಹೋಯಿತು. ಆದರೆ, ಈ ಘಟನೆಯೇ ಅವರನ್ನು ಜನರ ಪಾಲಿಗೆ ‘ಮಸಿಹಾ’ (ರಕ್ಷಕ) ಎಂಬಂತೆ ಬಿಂಬಿಸಿತು.
36 ವರ್ಷಗಳ ಸುದೀರ್ಘ ಆಡಳಿತ
1989ರಲ್ಲಿ ಇರಾನ್ನ ಮೊದಲ ಸುಪ್ರೀಂ ಲೀಡರ್ ಆಯತೊಲ್ಲಾ ರುಹೊಲ್ಲಾ ಖೊಮೇನಿ ನಿಧನರಾದರು. ಆ ಸಮಯದಲ್ಲಿ ಇರಾನ್ನ ‘ಅಸೆಂಬ್ಲಿ ಆಫ್ ಎಕ್ಸ್ಪರ್ಟ್ಸ್’ (ಧಾರ್ಮಿಕ ವಿದ್ವಾಂಸರ ಮಂಡಳಿ) ಅಲಿ ಖಮೇನಿ ಅವರನ್ನು ಹೊಸ ಸುಪ್ರೀಂ ಲೀಡರ್ ಆಗಿ ಆಯ್ಕೆ ಮಾಡಿತು. ಅಂದಿನಿಂದ ಸತತ 36 ವರ್ಷಗಳ ಕಾಲ ಅವರು ಇರಾನ್ನ ಸರ್ವೋಚ್ಚ ಅಧಿಕಾರವನ್ನು ಚಲಾಯಿಸುತ್ತಿದ್ದರು.
ಮುಂದಿನ ಬೆಳವಣಿಗೆ ಏನು?
ಖಮೇನಿ ಅವರ ನಿಧನದ ನಂತರ ಇರಾನ್ನ ಅಧಿಕಾರ ಯಾರ ಕೈಗೆ ಸೇರಲಿದೆ ಎಂಬುದು ಈಗ ಜಾಗತಿಕ ಮಟ್ಟದಲ್ಲಿ ಕುತೂಹಲ ಮೂಡಿಸಿದೆ. ಇಸ್ರೇಲ್ ಮತ್ತು ಅಮೆರಿಕದ ಈ ದಾಳಿಯು ಇರಾನ್ನ ರಾಜಕೀಯ ಭವಿಷ್ಯವನ್ನು ಸಂಪೂರ್ಣವಾಗಿ ಬದಲಿಸುವ ಸಾಧ್ಯತೆ ಇದೆ.
