ಭಾರತೀಯ ಅಡುಗೆಗಳಲ್ಲಿ ತುಪ್ಪಕ್ಕೆ ವಿಶೇಷ ಸ್ಥಾನವಿದೆ. ಆರೋಗ್ಯ ಮತ್ತು ರುಚಿಯ ದೃಷ್ಟಿಯಿಂದ ಹೆಚ್ಚಿನವರು ದೇಶಿ ತುಪ್ಪವನ್ನು ಬಳಸಲು ಬಯಸುತ್ತಾರೆ. ಆದರೆ ಮಾರುಕಟ್ಟೆಯಲ್ಲಿ ಕಲಬೆರಕೆ ತುಪ್ಪದ ಹಾವಳಿ ಹೆಚ್ಚಾಗುತ್ತಿದ್ದು, ನಾವು ಬಳಸುತ್ತಿರುವುದು ಅಸಲಿ ತುಪ್ಪವೋ ಅಥವಾ ನಕಲಿಯೋ ಎಂಬ ಆತಂಕ ಎಲ್ಲರನ್ನೂ ಕಾಡುತ್ತಿದೆ. ನಿಮ್ಮ ಅಡುಗೆ ಮನೆಯಲ್ಲಿರುವ ತುಪ್ಪ ಶುದ್ಧವಾಗಿದೆಯೇ ಎಂದು ಪರೀಕ್ಷಿಸಲು ಈ ಕೆಳಗಿನ ಸರಳ ವಿಧಾನಗಳನ್ನು ಅನುಸರಿಸಬಹುದು.
ಹಸ್ತದ ಪರೀಕ್ಷೆ (Palm Test):
ಒಂದು ಚಮಚ ತುಪ್ಪವನ್ನು ನಿಮ್ಮ ಹಸ್ತದ ಮೇಲೆ ಹಾಕಿಕೊಳ್ಳಿ. ತುಪ್ಪವು ಹಸ್ತದ ಶಾಖಕ್ಕೆ ತಾನಾಗಿಯೇ ಕರಗಲು ಶುರುವಾದರೆ ಅದು ಶುದ್ಧ ತುಪ್ಪ ಎಂದರ್ಥ. ಒಂದು ವೇಳೆ ತುಪ್ಪ ಕರಗಲು ಸಮಯ ತೆಗೆದುಕೊಂಡರೆ ಅಥವಾ ಗಟ್ಟಿಯಾಗಿಯೇ ಉಳಿದರೆ ಅದರಲ್ಲಿ ಕಲಬೆರಕೆಯಾಗಿದೆ ಎಂದು ತಿಳಿಯಬಹುದು.
ಬಿಸಿ ಮಾಡುವ ವಿಧಾನ:
ಒಂದು ಪಾತ್ರೆಯಲ್ಲಿ ಸ್ವಲ್ಪ ತುಪ್ಪವನ್ನು ಹಾಕಿ ಬಿಸಿ ಮಾಡಿ. ತುಪ್ಪವು ತಕ್ಷಣವೇ ಕರಗಿ ಕಂದು ಬಣ್ಣಕ್ಕೆ ತಿರುಗಿದರೆ ಅದು ಶುದ್ಧ ತುಪ್ಪ. ಒಂದು ವೇಳೆ ತುಪ್ಪ ಕರಗಲು ತಡವಾಗಿ, ಹಳದಿ ಬಣ್ಣಕ್ಕೆ ತಿರುಗಿದರೆ ಅದರಲ್ಲಿ ಕಲಬೆರಕೆ ಇರುವ ಸಾಧ್ಯತೆ ಇರುತ್ತದೆ.
ಉಪ್ಪಿನ ಪರೀಕ್ಷೆ:
ಒಂದು ಪಾತ್ರೆಯಲ್ಲಿ ಸ್ವಲ್ಪ ತುಪ್ಪವನ್ನು ತೆಗೆದುಕೊಂಡು ಅದಕ್ಕೆ ಸ್ವಲ್ಪ ಉಪ್ಪು ಮತ್ತು ಸ್ವಲ್ಪ ಹೈಡ್ರೋಕ್ಲೋರಿಕ್ ಆಮ್ಲವನ್ನು (ಲಭ್ಯವಿದ್ದರೆ) ಸೇರಿಸಿ. ಐದು ನಿಮಿಷಗಳ ಕಾಲ ಹಾಗೆಯೇ ಬಿಡಿ. ಒಂದು ವೇಳೆ ತುಪ್ಪದ ಬಣ್ಣ ಕೆಂಪಾಗಿ ಬದಲಾದರೆ, ಅದರಲ್ಲಿ ಸಕ್ಕರೆ ಅಂಶ ಅಥವಾ ಇತರ ಕೆಮಿಕಲ್ಗಳನ್ನು ಸೇರಿಸಲಾಗಿದೆ ಎಂದು ಅರ್ಥ.
ಅಯೋಡಿನ್ ಪರೀಕ್ಷೆ:
ಸ್ವಲ್ಪ ಕರಗಿದ ತುಪ್ಪಕ್ಕೆ ಎರಡು ಹನಿ ಅಯೋಡಿನ್ ದ್ರಾವಣವನ್ನು ಸೇರಿಸಿ. ಒಂದು ವೇಳೆ ತುಪ್ಪವು ನೀಲಿ ಬಣ್ಣಕ್ಕೆ ತಿರುಗಿದರೆ, ಆ ತುಪ್ಪದಲ್ಲಿ ಆಲೂಗಡ್ಡೆ ಅಥವಾ ಪಿಷ್ಟವನ್ನು (Starch) ಕಲಬೆರಕೆ ಮಾಡಲಾಗಿದೆ ಎಂದು ಖಚಿತಪಡಿಸಿಕೊಳ್ಳಬಹುದು.
ಅಂಗೈಯಲ್ಲಿ ಉಜ್ಜುವ ವಿಧಾನ:
ಸ್ವಲ್ಪ ತುಪ್ಪವನ್ನು ತೆಗೆದುಕೊಂಡು ಅಂಗೈಯಲ್ಲಿ ಚೆನ್ನಾಗಿ ಉಜ್ಜಿ. ಸ್ವಲ್ಪ ಸಮಯದ ನಂತರ ಅದನ್ನು ಮೂಸಿನೋಡಿ. ಶುದ್ಧ ತುಪ್ಪವಾಗಿದ್ದರೆ ಅದರಿಂದ ಉತ್ತಮವಾದ ಸುವಾಸನೆ ಬರುತ್ತದೆ. ಕಲಬೆರಕೆ ತುಪ್ಪವಾಗಿದ್ದರೆ ಅದರಲ್ಲಿ ಕೆಟ್ಟ ವಾಸನೆ ಬರಬಹುದು ಅಥವಾ ಯಾವುದೇ ಸುವಾಸನೆ ಇರುವುದಿಲ್ಲ.
ಆರೋಗ್ಯವೇ ಭಾಗ್ಯ ಎಂಬಂತೆ, ಕಲಬೆರಕೆ ಆಹಾರ ಸೇವನೆಯಿಂದ ದೂರವಿರಲು ಇಂತಹ ಸಣ್ಣ ಪುಟ್ಟ ಪರೀಕ್ಷೆಗಳನ್ನು ಮಾಡುವುದು ಉತ್ತಮ. ಮಾರುಕಟ್ಟೆಯಿಂದ ತುಪ್ಪ ಖರೀದಿಸುವಾಗ ನಂಬಿಕಸ್ತ ಬ್ರ್ಯಾಂಡ್ ಅಥವಾ ಪರಿಚಿತರಿಂದ ಖರೀದಿಸುವುದು ಸುರಕ್ಷಿತ.
