ನವದೆಹಲಿ: ಇರಾನ್ ಮತ್ತು ಇಸ್ರೇಲ್ ನಡುವಿನ ಸಂಘರ್ಷದಿಂದಾಗಿ ಪಶ್ಚಿಮ ಏಷ್ಯಾದಲ್ಲಿ ಯುದ್ಧದ ಕಾರ್ಮೋಡಗಳು ಕವಿದಿದ್ದರೂ, ಭಾರತದ ಧ್ವಜ ಹೊಂದಿರುವ ಎರಡು ಪ್ರಮುಖ ಎಲ್ಪಿಜಿ (LPG) ಸರಕು ನೌಕೆಗಳು ಆಯಕಟ್ಟಿನ ಹಾರ್ಮುಜ್ ಜಲಸಂಧಿಯನ್ನು (Strait of Hormuz) ಯಶಸ್ವಿಯಾಗಿ ದಾಟಿವೆ.
ಅಂತರಾಷ್ಟ್ರೀಯ ತೈಲ ಮತ್ತು ಅನಿಲ ಪೂರೈಕೆಯ ದೃಷ್ಟಿಯಿಂದ ಅತ್ಯಂತ ಸೂಕ್ಷ್ಮವೆನಿಸಿರುವ ಈ ಜಲಮಾರ್ಗದಲ್ಲಿ ಭಾರತೀಯ ನೌಕೆಗಳು ಸುರಕ್ಷಿತವಾಗಿ ಸಂಚರಿಸಿರುವುದು ಭಾರತದ ರಾಜತಾಂತ್ರಿಕ ಜಯವೆಂದೇ ಪರಿಗಣಿಸಲಾಗಿದೆ.
ತೈಲ ಮತ್ತು ಅನಿಲ ಹೊತ್ತೊಯ್ಯುವ ನೌಕೆಗಳ ಮೇಲೆ ದಾಳಿ ನಡೆಯುವ ಭೀತಿ ಇದ್ದರೂ, ಭಾರತದ ಈ ಎರಡು ನೌಕೆಗಳು ಯಾವುದೇ ಅಡೆತಡೆಯಿಲ್ಲದೆ ಗುರಿ ತಲುಪಿವೆ. ಪರ್ಷಿಯನ್ ಗಲ್ಫ್ ಪ್ರದೇಶದಲ್ಲಿ ಸಂಚರಿಸುವ ಭಾರತೀಯ ವ್ಯಾಪಾರ ನೌಕೆಗಳಿಗೆ ರಕ್ಷಣೆ ನೀಡಲು ಭಾರತೀಯ ನೌಕಾಪಡೆಯು ಸನ್ನದ್ಧವಾಗಿದ್ದು, ಪರಿಸ್ಥಿತಿಯನ್ನು ಸೂಕ್ಷ್ಮವಾಗಿ ಗಮನಿಸುತ್ತಿದೆ.
ಭಾರತಕ್ಕೆ ಅಗತ್ಯವಿರುವ ಎಲ್ಪಿಜಿ ಪೂರೈಕೆಯಲ್ಲಿ ಈ ಹಾರ್ಮುಜ್ ಜಲಸಂಧಿ ಪ್ರಮುಖ ಪಾತ್ರ ವಹಿಸುತ್ತದೆ. ನೌಕೆಗಳ ಸುರಕ್ಷಿತ ಸಂಚಾರದಿಂದಾಗಿ ದೇಶದಲ್ಲಿ ಅಡುಗೆ ಅನಿಲ ಪೂರೈಕೆಗೆ ಎದುರಾಗಿದ್ದ ಆತಂಕ ಸದ್ಯಕ್ಕೆ ದೂರವಾಗಿದೆ.
ರಾಜತಾಂತ್ರಿಕ ಪ್ರಯತ್ನ: ಸಂಘರ್ಷ ಪೀಡಿತ ದೇಶಗಳೊಂದಿಗೆ ಭಾರತವು ಉತ್ತಮ ಬಾಂಧವ್ಯ ಹೊಂದಿರುವುದು ನಮ್ಮ ನೌಕೆಗಳ ಸುಸೂತ್ರ ಸಂಚಾರಕ್ಕೆ ಹಾದಿ ಮಾಡಿಕೊಟ್ಟಿದೆ.
