ವಾಷಿಂಗ್ಟನ್/ಟೆಹ್ರಾನ್: ಇರಾನ್ ಮತ್ತು ಅಮೆರಿಕ ನಡುವಿನ ಸಂಘರ್ಷ ತಾರಕಕ್ಕೇರಿರುವ ಬೆನ್ನಲ್ಲೇ, ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಮತ್ತೊಂದು ಮಹತ್ವದ ಮಿಲಿಟರಿ ಹೆಜ್ಜೆ ಇಟ್ಟಿದ್ದಾರೆ. ಅಮೆರಿಕ ಭೂಸೇನೆಯ ಅತ್ಯಂತ ಶಕ್ತಿಶಾಲಿ ಮತ್ತು ತುರ್ತು ಪ್ರತಿಕ್ರಿಯಾ ಪಡೆಯಾದ ’82ನೇ ಏರ್ಬೋರ್ನ್ ಡಿವಿಷನ್’ (82nd Airborne Division) ನ 1,000ಕ್ಕೂ ಹೆಚ್ಚು ಸೈನಿಕರನ್ನು ಪಶ್ಚಿಮ ಏಷ್ಯಾಕ್ಕೆ ನಿಯೋಜಿಸಲಾಗಿದೆ.
82ನೇ ಏರ್ಬೋರ್ನ್ ಡಿವಿಷನ್ ಸೈನಿಕರು ಕೇವಲ 18 ಗಂಟೆಗಳ ಅವಧಿಯಲ್ಲಿ ವಿಶ್ವದ ಯಾವುದೇ ಮೂಲೆಯಲ್ಲಿ ಯುದ್ಧ ಭೂಮಿಗೆ ಧುಮುಕುವ ಸಾಮರ್ಥ್ಯ ಹೊಂದಿದ್ದಾರೆ. ಇವರು ಶತ್ರು ಪ್ರದೇಶಗಳಲ್ಲಿ ಪ್ಯಾರಾಚೂಟ್ ಮೂಲಕ ಇಳಿದು ವಿಮಾನ ನಿಲ್ದಾಣ ಮತ್ತು ಪ್ರಮುಖ ನೆಲೆಗಳನ್ನು ವಶಪಡಿಸಿಕೊಳ್ಳುವಲ್ಲಿ ಪರಿಣಿತರು.
ಇರಾನ್ನ ಇತ್ತೀಚಿನ ದಾಳಿಗಳು ಮತ್ತು ಹಾರ್ಮುಜ್ ಜಲಸಂಧಿಯ ಬಿಕ್ಕಟ್ಟಿನ ಹಿನ್ನೆಲೆಯಲ್ಲಿ ಅಮೆರಿಕ ತನ್ನ ಸೇನಾ ಬಲವನ್ನು ಹೆಚ್ಚಿಸುತ್ತಿದೆ. ಈಗಾಗಲೇ ಸಾವಿರಾರು ಮೆರಿನ್ ಸೈನಿಕರು ಆ ಭಾಗಕ್ಕೆ ತೆರಳಿದ್ದು, ಈಗ ಈ ಗಣ್ಯ ಪಡೆ ಅವರನ್ನು ಸೇರಿಕೊಳ್ಳಲಿದೆ.
ಒಂದು ಕಡೆ ಇರಾನ್ ಜೊತೆ ಶಾಂತಿ ಮಾತುಕತೆಯ ಪ್ರಸ್ತಾಪ ಇಟ್ಟಿರುವ ಟ್ರಂಪ್, ಇನ್ನೊಂದು ಕಡೆ ಬೃಹತ್ ಪ್ರಮಾಣದಲ್ಲಿ ಸೇನೆಯನ್ನು ಜಮಾಯಿಸುವ ಮೂಲಕ “ನಾವು ಯಾವುದಕ್ಕೂ ಸಿದ್ಧ” ಎಂಬ ಬಲವಾದ ಎಚ್ಚರಿಕೆಯನ್ನು ಇರಾನ್ಗೆ ನೀಡಿದ್ದಾರೆ.
