ನವದೆಹಲಿ:ಪ್ರಮುಖ ಮೆಸೇಜಿಂಗ್ ಆಪ್ ಆದ ಟೆಲಿಗ್ರಾಂ (Telegram), ಭಯೋತ್ಪಾದನೆ, ಸೈಬರ್ ಅಪರಾಧ, ಮಾದಕ ದ್ರವ್ಯ ದಂಧೆ, ಮಕ್ಕಳ ಶೋಷಣೆ ಮತ್ತು ಆರ್ಥಿಕ ವಂಚನೆ ಸೇರಿದಂತೆ ವ್ಯಾಪಕ ಶ್ರೇಣಿಯ ಕಾನೂನುಬಾಹಿರ ಚಟುವಟಿಕೆಗಳಿಗೆ ದೊಡ್ಡ ಮಟ್ಟದಲ್ಲಿ ದುರುಪಯೋಗವಾಗುತ್ತಿದೆ ಎಂದು ಕೇಂದ್ರ ಸರ್ಕಾರವು ಗುರುವಾರ ದೆಹಲಿ ಹೈಕೋರ್ಟ್ಗೆ ತಿಳಿಸಿದೆ. ಅಷ್ಟೇ ಅಲ್ಲದೆ, ಅಪರಾಧಿಗಳು ತನಿಖಾ ಸಂಸ್ಥೆಗಳಿಗೆ ಸಿಕ್ಕಿಬೀಳದಂತೆ ತಪ್ಪಿಸಿಕೊಳ್ಳಲು ಬಳಸುತ್ತಿರುವ ಟೆಲಿಗ್ರಾಂ ವೇದಿಕೆಯನ್ನು “ಹೊಸ ಡಾರ್ಕ್ ವೆಬ್” (New Dark Web) ಎಂದು ಸರ್ಕಾರ ಬಣ್ಣಿಸಿದೆ.
ಜೂನ್ 21 ರಂದು ನಡೆಯಲಿರುವ ನೀಟ್-ಯುಜಿ 2026 (NEET-UG 2026) ಮರು-ಪರೀಕ್ಷೆಯ ಹಿನ್ನೆಲೆಯಲ್ಲಿ, ಭಾರತದಲ್ಲಿ ಟೆಲಿಗ್ರಾಂ ಕಾರ್ಯಾಚರಣೆಯನ್ನು ತಾತ್ಕಾಲಿಕವಾಗಿ ನಿರ್ಬಂಧಿಸಲು ಸರ್ಕಾರ ಕೈಗೊಂಡಿದ್ದ ತೀರ್ಮಾನದ ವಿರುದ್ಧ ಕಾನೂನು ಹೋರಾಟ ನಡೆಯುತ್ತಿದ್ದು, ಈ ಸಂದರ್ಭದಲ್ಲಿ ಸರ್ಕಾರವು ಕೋರ್ಟ್ಗೆ ಈ ಆತಂಕಕಾರಿ ವಿಷಯಗಳನ್ನು ಪ್ರಸ್ತಾಪಿಸಿದೆ.
ತನ್ನ ಸಲ್ಲಿಕೆಗಳಲ್ಲಿ ಸರ್ಕಾರವು, ಟೆಲಿಗ್ರಾಂ ಇಂದು ಅಪರಾಧಿಗಳ ಪ್ರಮುಖ ಅಸ್ತ್ರವಾಗಿ ಮಾರ್ಪಟ್ಟಿದೆ. ಇದರ ಚಾನೆಲ್ಗಳ ಮೂಲಕ ಬಳಕೆದಾರರನ್ನು ಡಾರ್ಕ್ ವೆಬ್ ಫೋರಂಗಳು ಮತ್ತು ಪ್ರತ್ಯೇಕ ವೆಬ್ ನೆಟ್ವರ್ಕ್ಗಳಿಗೆ ಲಿಂಕ್ ಮಾಡಲಾಗುತ್ತಿದ್ದು, ಇದು ಅಧಿಕಾರಿಗಳಿಗೆ ಅಪರಾಧಿಗಳ ಗುರುತು ಪತ್ತೆಹಚ್ಚಲು ಮತ್ತು ಅಪರಾಧ ಕೃತ್ಯಗಳನ್ನು ಪತ್ತೆಹಚ್ಚಲು ಭಾರಿ ಸವಾಲಾಗಿ ಪರಿಣಮಿಸಿದೆ ಎಂದು ಹೇಳಿದೆ.
”ಟೆಲಿಗ್ರಾಂ ಅಪರಾಧಿಗಳನ್ನು ಪರಸ್ಪರ ಜೋಡಿಸುವ ಹೊಸ ಡಾರ್ಕ್ ವೆಬ್ ಆಗಿ ಮಾರ್ಪಟ್ಟಿದೆ. ಅಪರಾಧಿಗಳು ತಮ್ಮ ಚಾನೆಲ್ಗಳಲ್ಲಿ ಡೀಪ್ ವೆಬ್ ಲಿಂಕ್ಗಳ ಮೂಲಕ ಡಾರ್ಕ್ ವೆಬ್ ಫೋರಮ್ಗಳಿಗೆ ಸಂಪರ್ಕಿಸುವ ಲಿಂಕ್ಗಳನ್ನು ಪೋಸ್ಟ್ ಮಾಡಲು ಟೆಲಿಗ್ರಾಂ ಅನ್ನು ವೇಗವಾಗಿ ಅಳವಡಿಸಿಕೊಂಡಿದ್ದಾರೆ. ಇದು ಅಧಿಕಾರಿಗಳಿಗೆ ಅಪರಾಧಿಗಳನ್ನು ಪತ್ತೆಹಚ್ಚಲು ಕಷ್ಟಕರವಾಗಿಸಿದೆ,” ಎಂದು ಕೇಂದ್ರ ಸರ್ಕಾರ ಹೇಳಿದೆ.
ಇದರ ಪ್ರೈವಸಿ ಫೀಚರ್ಗಳ (ಗೌಪ್ಯತೆಯ ನಿಯಮಗಳು) ಕಾರಣದಿಂದಾಗಿಯೇ ಇದು ಮಾದಕ ದ್ರವ್ಯ ದಂಧೆ, ಸೈಬರ್ ಅಪರಾಧ, ಉಗ್ರವಾದ, ಭಯೋತ್ಪಾದನೆ, ಮಕ್ಕಳ ಶೋಷಣೆ ಮತ್ತು ಸೈಬರ್ ವಂಚನೆಗಳಂತಹ ಬಹುಸಂಖ್ಯೆಯ ಸೈಬರ್ ಆಧಾರಿತ ಅಪರಾಧಗಳಿಗೆ ದುರುಪಯೋಗವಾಗುತ್ತಿರುವುದು ಕಂಡುಬಂದಿದೆ ಎಂದು ಕೇಂದ್ರವು ಸಲ್ಲಿಕೆ ಮಾಡಿದೆ.
ಹಿಂಸಾತ್ಮಕ ಮತ್ತು ಉಗ್ರಗಾಮಿ ವಿಷಯಗಳ ಪ್ರಸಾರ
ಪ್ಲಾಟ್ಫಾರ್ಮ್ನಲ್ಲಿ ಉಗ್ರಗಾಮಿ ಮತ್ತು ತೀವ್ರಗಾಮಿ ವಿಷಯಗಳ ಪ್ರಸಾರದ ಬಗ್ಗೆಯೂ ಸರ್ಕಾರ ಕಳವಳ ವ್ಯಕ್ತಪಡಿಸಿದೆ. ಭಯೋತ್ಪಾದಕ ಸಂಸ್ಥೆಗಳಿಗೆ ನಂಟಿರುವ ಗುಂಪುಗಳು ಸಾರ್ವಜನಿಕ ಸುವ್ಯವಸ್ಥೆಯನ್ನು ಕದಡುವ ಉದ್ದೇಶದಿಂದ ಭೀಕರ ಪ್ರಚಾರ ಮತ್ತು ತಪ್ಪು ಮಾಹಿತಿಯನ್ನು ಹರಡಲು ಟೆಲಿಗ್ರಾಂ ಚಾನೆಲ್ಗಳನ್ನು ಬಳಸಿಕೊಳ್ಳುತ್ತಿವೆ ಎಂದು ಆರೋಪಿಸಿದೆ.
ಪೈರಸಿ ಮತ್ತು ಮಕ್ಕಳ ಮೇಲಿನ ಲೈಂಗಿಕ ಶೋಷಣೆಯ ಕಂಟೆಂಟ್
ಬಾಲ ಲೈಂಗಿಕ ಶೋಷಣೆ ಮತ್ತು ನಿಂದನೆಯ ಕಂಟೆಂಟ್ಗಳನ್ನು (CSEAM) ಟೆಲಿಗ್ರಾಂ ಚಾನೆಲ್ಗಳು ಮತ್ತು ಗ್ರೂಪ್ಗಳ ಮೂಲಕ ಕಾನೂನುಬಾಹಿರವಾಗಿ ಹಂಚಿಕೊಳ್ಳಲಾಗುತ್ತಿದೆ ಎಂದು ಕೇಂದ್ರವು ಕಳವಳ ವ್ಯಕ್ತಪಡಿಸಿದೆ.
ಇದಲ್ಲದೆ, ಟೆಲಿಗ್ರಾಂ ಅನ್ನು ಪೈರಸಿಗಾಗಿ (Piracy) ವ್ಯಾಪಕವಾಗಿ ಬಳಸಲಾಗುತ್ತಿದ್ದು, ಹೆಚ್ಚಿನ ಸಂಖ್ಯೆಯ ಚಾನೆಲ್ಗಳು ಪೈರೇಟೆಡ್ ಚಲನಚಿತ್ರಗಳು, ವೆಬ್ ಸರಣಿಗಳು ಮತ್ತು ಹಕ್ಕುಸ್ವಾಮ್ಯ ಹೊಂದಿರುವ (Copyrighted) ವಿಷಯಗಳನ್ನು ವಿತರಿಸುತ್ತಿವೆ. ಇದು ಭಾರಿ ಆದಾಯದ ನಷ್ಟ ಮತ್ತು ಬೌದ್ಧಿಕ ಆಸ್ತಿ ಹಕ್ಕುಗಳ ಉಲ್ಲಂಘನೆಗೆ ಕಾರಣವಾಗುತ್ತಿದೆ ಎಂದು ಕೋರ್ಟ್ಗೆ ತಿಳಿಸಲಾಗಿದೆ.
ಸೈಬರ್ ಅಪರಾಧಗಳ ಕಾರ್ಯಾಚರಣೆಯ ಬಗ್ಗೆ ಮಾತನಾಡಿದ ಸರ್ಕಾರ, ಸೈಬರ್ ಅಪರಾಧಿಗಳು ತಮ್ಮ ಗುರುತನ್ನು ಮರೆಮಾಚಲು ಟೆಲಿಗ್ರಾಂನ ‘ಅನಾಮಧೇಯತೆ’ (Anonymity) ಫೀಚರ್ಗಳನ್ನು ಬಳಸಿಕೊಂಡು ನಕಲಿ ಗುರುತುಗಳ ಮೂಲಕ ನಕಲಿ ಖಾತೆಗಳನ್ನು ಸೃಷ್ಟಿಸುತ್ತಿದ್ದಾರೆ ಮತ್ತು ಆರ್ಥಿಕ ವಂಚನೆಗಳನ್ನು ಎಸಗುತ್ತಿದ್ದಾರೆ. ಅಲ್ಲದೆ ಹ್ಯಾಕ್ ಮಾಡಲಾದ ಡೇಟಾಗಳನ್ನು ಇಲ್ಲಿನ ಗ್ರೂಪ್ಗಳಲ್ಲಿ ಪ್ರಕಟಿಸುತ್ತಿದ್ದಾರೆ ಎಂದು ಹೇಳಿದೆ.
ವರದಿಗಳ ಪ್ರಕಾರ, ಹ್ಯಾಕರ್ ಗ್ರೂಪ್ಗಳು ಮತ್ತು ದೇಶದ ವಿರೋಧಿ ಶಕ್ತಿಗಳು ದಾಳಿಗಳನ್ನು ಸಂಘಟಿಸಲು ಮತ್ತು ಕಳವು ಮಾಡಿದ ಡೇಟಾವನ್ನು ಪ್ರಕಟಿಸಲು ಟೆಲಿಗ್ರಾಂ ಅನ್ನು ಬಳಸುತ್ತಿವೆ. ಜೊತೆಗೆ ಆರ್ಥಿಕ ಅಪರಾಧಗಳಿಗೆ ಬಳಸಲಾಗುವ ಮ್ಯೂಲ್ ಬ್ಯಾಂಕ್ ಖಾತೆಗಳ (Mule Bank Accounts) ಮಾರಾಟಕ್ಕೂ ಇದು ಸಹಕರಿಸುತ್ತಿದೆ.
ಇಷ್ಟೇ ಅಲ್ಲದೆ, ಭಾರತದ ಆರ್ಥಿಕ ವ್ಯವಸ್ಥೆಯಾದ ಬ್ಯಾಂಕುಗಳು, ಫಿಂಟೆಕ್ ಪ್ಲಾಟ್ಫಾರ್ಮ್ಗಳು, ಯುಪಿಐ (UPI) ಹ್ಯಾಂಡಲ್ಗಳು ಮತ್ತು ಕ್ರಿಪ್ಟೋ ಕರೆನ್ಸಿ ವೇದಿಕೆಗಳನ್ನು ದುರುಪಯೋಗಪಡಿಸಿಕೊಂಡು ಅಕ್ರಮ ಹಣವನ್ನು ವರ್ಗಾವಣೆ ಮಾಡಲು ಮತ್ತು ಲಾಂಡರಿಂಗ್ ಮಾಡಲು ಟೆಲಿಗ್ರಾಂ ಚಾನೆಲ್ಗಳನ್ನು ಬಳಸಲಾಗುತ್ತಿದೆ. ಅಲ್ಲದೆ, ಟೆಲಿಗ್ರಾಂ ಬಾಟ್ಗಳನ್ನು (Bots) ಬಳಸಿಕೊಂಡು ಈ ಹಿಂದಿನ ಸೈಬರ್ ದಾಳಿಗಳಿಂದ ಸೋರಿಕೆಯಾಗಿದ್ದ ಮೊಬೈಲ್ ಸಂಖ್ಯೆಗಳು, ಗುರುತಿನ ಚೀಟಿಗಳ ವಿವರಗಳು (Aadhaar details) ಮತ್ತು ಇತರ ಸೂಕ್ಷ್ಮ ವೈಯಕ್ತಿಕ ಮಾಹಿತಿಗಳನ್ನು ಪ್ರವೇಶಿಸಲಾಗುತ್ತಿದೆ ಮತ್ತು ಹರಡಲಾಗುತ್ತಿದೆ ಎಂದು ಸರ್ಕಾರ ಸಲ್ಲಿಕೆ ಮಾಡಿದೆ.
ಟೆಲಿಗ್ರಾಂ ವರ್ಸಸ್ ಕೇಂದ್ರ ಸರ್ಕಾರ
ಕೇಂದ್ರ ಸರ್ಕಾರದ ತಾತ್ಕಾಲಿಕ ನಿಷೇಧದ ಆದೇಶವನ್ನು ಪ್ರಶ್ನಿಸಿ ಟೆಲಿಗ್ರಾಂ ಸಂಸ್ಥೆಯು ದೆಹಲಿ ಹೈಕೋರ್ಟ್ ಮೆಟ್ಟಿಲೇರಿದ ನಂತರ ಈ ವಿಷಯವು ವಿಚಾರಣೆಗೆ ಬಂದಿದೆ.
ಜೂನ್ 21 ರಂದು ನಡೆಯಲಿರುವ ನೀಟ್ (ಯುಜಿ) 2026 ರ ಮರು-ಪರೀಕ್ಷೆಯ ಮುನ್ನ, ಪರೀಕ್ಷಾ ಸಾಮಗ್ರಿಗಳನ್ನು ಸೋರಿಕೆ ಮಾಡುವ ಅಥವಾ ದುರುಪಯೋಗಪಡಿಸಿಕೊಳ್ಳುವ ಯಾವುದೇ ಪ್ರಯತ್ನವನ್ನು ತಡೆಯಲು ಕೇಂದ್ರ ಸರ್ಕಾರವು ಜೂನ್ 22 ರವರೆಗೆ ಭಾರತದಲ್ಲಿ ಈ ಇನ್ಸ್ಟಂಟ್ ಮೆಸೇಜಿಂಗ್ ಪ್ಲಾಟ್ಫಾರ್ಮ್ ಅನ್ನು ತಾತ್ಕಾಲಿಕವಾಗಿ ನಿರ್ಬಂಧಿಸಿದೆ. ರಾಷ್ಟ್ರೀಯ ಪರೀಕ್ಷಾ ಸಂಸ್ಥೆಯ (NTA) ಶಿಫಾರಸಿನ ಮೇರೆಗೆ ಈ ಕ್ರಮ ಕೈಗೊಳ್ಳಲಾಗಿದ್ದು, ಈ ನಿರ್ಬಂಧವು ಪರೀಕ್ಷೆಯ ಅವಧಿ ಮತ್ತು ಅದರ ತಕ್ಷಣದ ದಿನಗಳಿಗೆ ಮಾತ್ರ ಸೀಮಿತವಾಗಿರುತ್ತದೆ ಎಂದು ಹೇಳಲಾಗಿದೆ.
ಅಲ್ಲದೆ, ಜೂನ್ 30 ರವರೆಗೆ ಭಾರತದಲ್ಲಿ ತನ್ನ ‘ಮೆಸೇಜ್ ಎಡಿಟಿಂಗ್’ (Message-editing) ಫೀಚರ್ ಅನ್ನು ನಿಷ್ಕ್ರಿಯಗೊಳಿಸುವಂತೆ ಸರ್ಕಾರ ಟೆಲಿಗ್ರಾಂಗೆ ನಿರ್ದೇಶಿಸಿದೆ. ಎನ್ಟಿಎ (NTA) ಪ್ರಕಾರ, ಈ ಹಿಂದೆ ಅಡ್ಮಿನ್ಗಳು ಹಳೆಯ ಸಂದೇಶಗಳನ್ನು ಎಡಿಟ್ ಮಾಡಿ, ಅಸಲಿ ತಾರೀಖು ಮತ್ತು ಸಮಯವನ್ನು ಹಾಗೆಯೇ ಉಳಿಸಿಕೊಂಡು ಅದರ ಜಾಗದಲ್ಲಿ ಹೊಸ ಫೈಲ್ಗಳನ್ನು ಅಟ್ಯಾಚ್ ಮಾಡುವ ಮೂಲಕ “ಪ್ರಶ್ನೆ ಪತ್ರಿಕೆ ಸೋರಿಕೆ”ಯ ನಕಲಿ ಪುರಾವೆಗಳನ್ನು ಸೃಷ್ಟಿಸಲು ಈ ಫೀಚರ್ ಅನ್ನು ದುರುಪಯೋಗಪಡಿಸಿಕೊಂಡಿದ್ದರು.
ನೀಟ್ ಯುಜಿ 2026 ಪ್ರಶ್ನೆ ಪತ್ರಿಕೆ ಸೋರಿಕೆ ವಿವಾದದ ಹಿನ್ನೆಲೆಯಲ್ಲಿ ಟೆಲಿಗ್ರಾಂ ತೀವ್ರ ನಿಗಾದಲ್ಲಿದೆ. ಹಲವು ಚಾನೆಲ್ಗಳು ಹಣದ ಬದಲಾಗಿ ಪರೀಕ್ಷೆಯ ಪ್ರಶ್ನೆ ಪತ್ರಿಕೆ ಅಥವಾ ಇತರ ರಹಸ್ಯ ಸಾಮಗ್ರಿಗಳನ್ನು ನೀಡುವುದಾಗಿ ಕ್ಲೈಮ್ ಮಾಡಿದ್ದು, ಈ ಕುರಿತು ಅಧಿಕಾರಿಗಳು ತನಿಖೆ ನಡೆಸುತ್ತಿದ್ದಾರೆ.
