ನವದೆಹಲಿ: ಮಹಾರಾಷ್ಟ್ರದ ಮುನ್ಸಿಪಲ್ ಕೌನ್ಸಿಲ್ ಕಟ್ಟಡದ ನಾಮಫಲಕದಲ್ಲಿ ಉರ್ದು ಬಳಕೆಯನ್ನು ಎತ್ತಿಹಿಡಿದ ಸುಪ್ರೀಂ ಕೋರ್ಟ್ ಮಂಗಳವಾರ ಭಾಷೆ ಸಂಸ್ಕೃತಿ ಮತ್ತು ಜನರನ್ನು ವಿಭಜಿಸಲು ಕಾರಣವಾಗಬಾರದು ಮತ್ತು ಉರ್ದು “ಗಂಗಾ-ಜಮುನಿ ತೆಹ್ಜೀಬ್ ಅಥವಾ ಹಿಂದೂಸ್ತಾನಿ ತೆಹ್ಜೀಬ್ನ ಅತ್ಯುತ್ತಮ ಮಾದರಿಯಾಗಿದೆ” ಎಂದು ಹೇಳಿದೆ.
ಮಹಾರಾಷ್ಟ್ರ ಸ್ಥಳೀಯ ಪ್ರಾಧಿಕಾರಗಳ (ಅಧಿಕೃತ ಭಾಷೆಗಳು) ಕಾಯ್ದೆ, 2022 ಅಥವಾ ಕಾನೂನಿನ ಯಾವುದೇ ನಿಬಂಧನೆಯಲ್ಲಿ ಉರ್ದು ಬಳಕೆಯನ್ನು ನಿಷೇಧಿಸಲಾಗಿಲ್ಲ ಎಂಬ ಬಾಂಬೆ ಹೈಕೋರ್ಟ್ನ ತೀರ್ಮಾನದಲ್ಲಿ ಹಸ್ತಕ್ಷೇಪ ಮಾಡಲು ನ್ಯಾಯಮೂರ್ತಿಗಳಾದ ಸುಧಾಂಶು ಧುಲಿಯಾ ಮತ್ತು ಕೆ ವಿನೋದ್ ಚಂದ್ರನ್ ಅವರ ನ್ಯಾಯಪೀಠ ನಿರಾಕರಿಸಿತು.
ಮಹಾರಾಷ್ಟ್ರದ ಅಕೋಲಾ ಜಿಲ್ಲೆಯ ಪಾತೂರ್ ಮುನ್ಸಿಪಲ್ ಕೌನ್ಸಿಲ್ ಕಟ್ಟಡದ ನಾಮಫಲಕದಲ್ಲಿ ಉರ್ದು ಬಳಕೆಯನ್ನು ಪ್ರಶ್ನಿಸಿ ಮಾಜಿ ಕೌನ್ಸಿಲರ್ ಅರ್ಜಿ ಸಲ್ಲಿಸಿದ್ದರು.
“ನಮ್ಮ ತಪ್ಪು ಕಲ್ಪನೆಗಳು, ಬಹುಶಃ ಒಂದು ಭಾಷೆಯ ವಿರುದ್ಧದ ನಮ್ಮ ಪೂರ್ವಾಗ್ರಹಗಳು ಸಹ, ನಮ್ಮ ರಾಷ್ಟ್ರದ ಈ ದೊಡ್ಡ ವೈವಿಧ್ಯತೆಯಾದ ವಾಸ್ತವದ ವಿರುದ್ಧ ಧೈರ್ಯದಿಂದ ಮತ್ತು ಸತ್ಯವಾಗಿ ಪರೀಕ್ಷಿಸಬೇಕಾಗಿದೆ: ನಮ್ಮ ಶಕ್ತಿ ಎಂದಿಗೂ ನಮ್ಮ ದೌರ್ಬಲ್ಯವಾಗಲು ಸಾಧ್ಯವಿಲ್ಲ. ನಾವು ಉರ್ದು ಮತ್ತು ಪ್ರತಿಯೊಂದು ಭಾಷೆಯೊಂದಿಗೆ ಸ್ನೇಹ ಬೆಳೆಸೋಣ” ಎಂದು ಸುಪ್ರೀಂ ಕೋರ್ಟ್ ಹೇಳಿದೆ
