ಲಂಡನ್: ನಿಮಗೆ ಇಷ್ಟ ಬಂದ ಸಮಯದಲ್ಲಿ ಅಥವಾ ಅಸ್ತವ್ಯಸ್ತವಾದ ವೇಳಾಪಟ್ಟಿಯಲ್ಲಿ ನಿದ್ದೆ ಮಾಡುವ ಅಭ್ಯಾಸವಿದೆಯೇ? ಹಾಗಿದ್ದರೆ ಈ ಸುದ್ದಿ ನಿಮಗಾಗಿ. ಇತ್ತೀಚಿನ ವೈದ್ಯಕೀಯ ಸಂಶೋಧನೆಯೊಂದು “ಅನಿಯಮಿತ ನಿದ್ರೆ” (Irregular Sleep) ಕೇವಲ ಸುಸ್ತಿಗೆ ಮಾತ್ರವಲ್ಲ, ಮಾರಣಾಂತಿಕ ಹೃದಯಾಘಾತ (Heart Attack) ಮತ್ತು ಪಾರ್ಶ್ವವಾಯು (Stroke) ಅಪಾಯವನ್ನು ಗಣನೀಯವಾಗಿ ಹೆಚ್ಚಿಸುತ್ತದೆ ಎಂದು ಎಚ್ಚರಿಸಿದೆ.
ನಮ್ಮ ದೇಹದಲ್ಲಿ ‘ಸರ್ಕಾಡಿಯನ್ ರಿದಮ್’ ಎಂಬ ನೈಸರ್ಗಿಕ ಗಡಿಯಾರವಿರುತ್ತದೆ. ನಾವು ಪ್ರತಿದಿನ ಬೇರೆ ಬೇರೆ ಸಮಯದಲ್ಲಿ ಮಲಗುವುದರಿಂದ ಈ ಗಡಿಯಾರ ಏರುಪೇರಾಗಿ, ರಕ್ತದೊತ್ತಡ (BP) ಮತ್ತು ಕೊಲೆಸ್ಟ್ರಾಲ್ ಮಟ್ಟದ ಮೇಲೆ ಕೆಟ್ಟ ಪರಿಣಾಮ ಬೀರುತ್ತದೆ.
ಸರಿಯಾದ ಸಮಯಕ್ಕೆ ನಿದ್ದೆ ಮಾಡದವರಲ್ಲಿ ರಕ್ತನಾಳಗಳು ಗಟ್ಟಿಯಾಗುವ (Atherosclerosis) ಪ್ರಕ್ರಿಯೆ ವೇಗವಾಗುತ್ತದೆ. ಇದರಿಂದ ಹೃದಯಕ್ಕೆ ರಕ್ತ ಪೂರೈಕೆ ಮಾಡುವ ಧಮನಿಗಳಲ್ಲಿ ಅಡೆತಡೆ ಉಂಟಾಗುವ ಸಾಧ್ಯತೆ ಹೆಚ್ಚು.
ದಿನವೂ ಒಂದೇ ಸಮಯಕ್ಕೆ ಸರಿಯಾಗಿ ನಿದ್ದೆ ಮಾಡುವವರಿಗಿಂತ, ವಾರದಲ್ಲಿ ಪದೇ ಪದೇ ಮಲಗುವ ಸಮಯ ಬದಲಿಸುವವರಲ್ಲಿ ಹೃದಯ ಸಂಬಂಧಿ ಕಾಯಿಲೆಗಳ ಅಪಾಯ ಶೇ. 29ರಷ್ಟು ಹೆಚ್ಚಿದೆ ಎಂದು ಈ ಅಧ್ಯಯನ ತಿಳಿಸಿದೆ.
ವಾರಾಂತ್ಯ (Weekends) ಸೇರಿದಂತೆ ಪ್ರತಿದಿನ ಒಂದೇ ಸಮಯಕ್ಕೆ ಮಲಗುವುದು ಮತ್ತು ಎದ್ದೇಳುವುದನ್ನು ರೂಢಿಸಿಕೊಳ್ಳಿ.ಕೇವಲ ಸರಿಯಾದ ಸಮಯಕ್ಕೆ ಮಲಗುವುದು ಮಾತ್ರವಲ್ಲ, ಕನಿಷ್ಠ 7 ರಿಂದ 8 ಗಂಟೆಗಳ ಕಾಲ ಗಾಢ ನಿದ್ರೆ ಮಾಡುವುದು ಅತ್ಯಗತ್ಯ.ಮಲಗುವ ಕನಿಷ್ಠ 30 ನಿಮಿಷಗಳ ಮೊದಲು ಸ್ಮಾರ್ಟ್ಫೋನ್ ಅಥವಾ ಟಿವಿ ನೋಡುವುದನ್ನು ನಿಲ್ಲಿಸಿ. ಇವುಗಳಿಂದ ಹೊರಬರುವ ನೀಲಿ ಬೆಳಕು ನಿದ್ದೆಗೆ ಅಡ್ಡಿಪಡಿಸುತ್ತದೆ. ಮಧ್ಯಾಹ್ನದ ವೇಳೆ ದೀರ್ಘಕಾಲ ನಿದ್ದೆ ಮಾಡುವುದರಿಂದ ರಾತ್ರಿಯ ನಿದ್ರೆಯ ಗುಣಮಟ್ಟ ಕೆಡುತ್ತದೆ. ಅನಿವಾರ್ಯವಿದ್ದರೆ 20 ನಿಮಿಷಗಳ ಸಣ್ಣ ನಿದ್ದೆ (Power Nap) ಸಾಕು.
