ಮುರ್ಶಿದಾಬಾದ್ (ಪಶ್ಚಿಮ ಬಂಗಾಳ):ಭಾರತೀಯ ಸೇನೆಯಲ್ಲಿ ಹವಲ್ದಾರ್ ಆಗಿ 21 ವರ್ಷಗಳ ಕಾಲ ಸೇವೆ ಸಲ್ಲಿಸಿದ, 1999ರ ಕಾರ್ಗಿಲ್ ಯುದ್ಧದಲ್ಲಿ ಪಾಲ್ಗೊಂಡಿದ್ದ ನಿವೃತ್ತ ಯೋಧ ಮೊಹಮ್ಮದ್ ದೌದ್ ಅಲಿ ಅವರ ಹೆಸರು ಪಶ್ಚಿಮ ಬಂಗಾಳದ ಮತದಾರರ ಪಟ್ಟಿಯಿಂದ ನಾಪತ್ತೆಯಾಗಿದೆ. ಈ ಘಟನೆಯಿಂದ ಮನನೊಂದಿರುವ 64 ವರ್ಷದ ನಿವೃತ್ತ ಯೋಧ, “ದೇಶಕ್ಕಾಗಿ ಪ್ರಾಣ ಪಣಕ್ಕಿಟ್ಟು ಹೋರಾಡಿದ ನನಗೆ ಈಗ ಪೌರತ್ವ ಸಾಬೀತುಪಡಿಸುವ ಪರಿಸ್ಥಿತಿ ಬಂದಿದೆ” ಎಂದು ಅಳಲು ತೋಡಿಕೊಂಡಿದ್ದಾರೆ.
ಪಶ್ಚಿಮ ಬಂಗಾಳದಲ್ಲಿ ನಡೆದ ಮತದಾರರ ಪಟ್ಟಿ ಪರಿಷ್ಕರಣೆ ವೇಳೆ, ತಂದೆಯ ಹೆಸರಿನಲ್ಲಿನ ಕಾಗುಣಿತ ದೋಷದ (Spelling mistake) ಕಾರಣ ನೀಡಿ ದೌದ್ ಅಲಿ ಅವರ ಹೆಸರನ್ನು ಪಟ್ಟಿಯಿಂದ ತೆಗೆದುಹಾಕಲಾಗಿದೆ.ಕೇವಲ ದೌದ್ ಅಲಿ ಮಾತ್ರವಲ್ಲದೆ, ಅವರ ಪುತ್ರ ಮತ್ತು ಇಬ್ಬರು ಪುತ್ರಿಯರ ಹೆಸರನ್ನೂ ಮತದಾರರ ಪಟ್ಟಿಯಿಂದ ಡಿಲೀಟ್ ಮಾಡಲಾಗಿದೆ. ಸದ್ಯ ಅವರ ಪತ್ನಿಯ ಹೆಸರು ಮಾತ್ರ ಪಟ್ಟಿಯಲ್ಲಿದೆ.
ಬಹರಾಂಪುರದಲ್ಲಿ ನಡೆದ ವಿಚಾರಣೆ ವೇಳೆ ತಾವು ಸೇನೆಯಲ್ಲಿ ಸಲ್ಲಿಸಿದ ಸೇವಾ ದಾಖಲೆಗಳು ಮತ್ತು ಇತರ ಪೌರತ್ವ ಪುರಾವೆಗಳನ್ನು ಸಲ್ಲಿಸಿದರೂ, ಅಧಿಕಾರಿಗಳು ಹೆಸರನ್ನು ಕೈಬಿಟ್ಟಿರುವುದು ಯೋಧನ ಆಕ್ರೋಶಕ್ಕೆ ಕಾರಣವಾಗಿದೆ.
2001ರಲ್ಲಿ ಗಡಿಯಲ್ಲಿ ನಡೆದ ಸ್ಫೋಟವೊಂದರಲ್ಲಿ ದೌದ್ ಅಲಿ ಅವರ ಕಿವಿಗೆ ತೀವ್ರ ಪೆಟ್ಟಾಗಿತ್ತು. ಇಂದಿಗೂ ಆ ಗಾಯದ ಗುರುತು ಅವರ ದೇಶಸೇವೆಯ ಸಾಕ್ಷಿಯಾಗಿ ಉಳಿದಿದೆ.
20 ವರ್ಷಗಳಿಗೂ ಹೆಚ್ಚು ಕಾಲ ಗಡಿಯಲ್ಲಿ ದೇಶ ಕಾಯ್ದ ವ್ಯಕ್ತಿಯನ್ನು ‘ಅನುಮಾನಾಸ್ಪದ ಮತದಾರ’ನಂತೆ ಕಾಣುತ್ತಿರುವುದು ಸಾರ್ವಜನಿಕ ವಲಯದಲ್ಲಿ ತೀವ್ರ ಚರ್ಚೆಗೆ ಗ್ರಾಸವಾಗಿದೆ.
