ವಾಷಿಂಗ್ಟನ್: ಪಾಕಿಸ್ತಾನದ ಸೇನಾ ಮುಖ್ಯಸ್ಥ ಜನರಲ್ ಅಸಿಮ್ ಮುನೀರ್ ಅವರು ಟ್ರಂಪ್ ಆಡಳಿತಕ್ಕೆ ‘ರೆಡ್ ಫ್ಲಾಗ್’ (ಅಪಾಯದ ಮುನ್ಸೂಚನೆ) ಆಗುವ ಸಾಧ್ಯತೆಯಿದೆ ಎಂದು ಅಮೆರಿಕದ ಗುಪ್ತಚರ ಇಲಾಖೆಯ ವರದಿಯನ್ನು ಉಲ್ಲೇಖಿಸಿ ‘ಫಾಕ್ಸ್ ನ್ಯೂಸ್’ ವರದಿ ಮಾಡಿದೆ. ಅಮೆರಿಕ ಮತ್ತು ಪಾಕಿಸ್ತಾನದ ನಡುವಿನ ಭದ್ರತಾ ಸಂಬಂಧಗಳಲ್ಲಿ ಮುನೀರ್ ಅವರ ನಡೆಗಳು ಸವಾಲಾಗಬಹುದು ಎಂದು ಗುಪ್ತಚರ ಮೂಲಗಳು ವಿಶ್ಲೇಷಿಸಿವೆ.
ಪಾಕಿಸ್ತಾನದ ಆಂತರಿಕ ರಾಜಕೀಯದಲ್ಲಿ ಸೇನೆಯ ಹಸ್ತಕ್ಷೇಪ ಮತ್ತು ಪ್ರಾದೇಶಿಕ ಭದ್ರತಾ ವಿಷಯಗಳಲ್ಲಿ ಜನರಲ್ ಮುನೀರ್ ಅವರ ಕಠಿಣ ನಿಲುವು ಅಮೆರಿಕದ ಹಿತಾಸಕ್ತಿಗಳಿಗೆ ವಿರುದ್ಧವಾಗಿರುವ ಸಾಧ್ಯತೆಯಿದೆ ಎಂದು ವರದಿಯಲ್ಲಿ ಎಚ್ಚರಿಸಲಾಗಿದೆ.
ದಕ್ಷಿಣ ಏಷ್ಯಾದಲ್ಲಿ ಸ್ಥಿರತೆಯನ್ನು ಬಯಸುವ ಟ್ರಂಪ್ ಸರ್ಕಾರಕ್ಕೆ, ಪಾಕಿಸ್ತಾನದ ಸೇನೆಯ ಪ್ರಭಾವ ಮತ್ತು ಚೀನಾದೊಂದಿಗೆ ಆ ದೇಶಕ್ಕಿರುವ ನಿಕಟ ಸಂಬಂಧವು ಕಳವಳಕಾರಿಯಾಗಿದೆ. ಮುನೀರ್ ಅವರ ಕಾರ್ಯವೈಖರಿಯು ಅಮೆರಿಕದ ವಿದೇಶಾಂಗ ನೀತಿಗೆ ಅಡ್ಡಿಪಡಿಸಬಹುದು ಎಂದು ಅಧಿಕಾರಿಗಳು ಅಭಿಪ್ರಾಯಪಟ್ಟಿದ್ದಾರೆ.
ಗಡಿಯಾಚೆಗಿನ ಭಯೋತ್ಪಾದನೆ ನಿಯಂತ್ರಣದಲ್ಲಿ ಪಾಕ್ ಸೇನೆಯ ವಿಫಲತೆ ಮತ್ತು ಅಫ್ಘಾನಿಸ್ತಾನದ ವಿಷಯದಲ್ಲಿ ಮುನೀರ್ ಅವರ ಪಾತ್ರವನ್ನು ಅಮೆರಿಕದ ರಕ್ಷಣಾ ಇಲಾಖೆ ಸೂಕ್ಷ್ಮವಾಗಿ ಗಮನಿಸುತ್ತಿದೆ.
ರಾಜತಾಂತ್ರಿಕ ಸಂಘರ್ಷ: ಈ ಹಿಂದೆ ಟ್ರಂಪ್ ಅವರು ಪಾಕಿಸ್ತಾನಕ್ಕೆ ನೀಡುತ್ತಿದ್ದ ಬಿಲಿಯನ್ ಡಾಲರ್ ನೆರವನ್ನು ಕಡಿತಗೊಳಿಸಿದ್ದರು. ಈಗ ಜನರಲ್ ಮುನೀರ್ ಅವರ ಬಗ್ಗೆ ಬಂದಿರುವ ಈ ‘ರೆಡ್ ಫ್ಲಾಗ್’ ವರದಿಯು ಉಭಯ ದೇಶಗಳ ನಡುವಿನ ರಾಜತಾಂತ್ರಿಕ ಸಂಬಂಧವನ್ನು ಮತ್ತಷ್ಟು ಹದಗೆಡಿಸುವ ಸಾಧ್ಯತೆಯಿದೆ.
