ಟೊರೊಂಟೊ: ನಿಮಗೆ ವಿಪರೀತ ಒತ್ತಡ ಅಥವಾ ಆತಂಕ (Anxiety) ಕಾಡುತ್ತಿದೆಯೇ? ಹಾಗಿದ್ದರೆ ಹೆಡ್ಫೋನ್ ಹಾಕಿ ಕೇವಲ 24 ನಿಮಿಷಗಳ ಕಾಲ ಸಂಗೀತ ಆಲಿಸಿ! ಹೌದು, ಕೇವಲ 24 ನಿಮಿಷಗಳ ಕಾಲ ವಿಶೇಷವಾಗಿ ವಿನ್ಯಾಸಗೊಳಿಸಿದ ಸಂಗೀತವನ್ನು ಕೇಳುವುದರಿಂದ ಮನಸ್ಸಿನ ಆತಂಕ ಮತ್ತು ದೈಹಿಕ ಒತ್ತಡವನ್ನು ಗಣನೀಯವಾಗಿ ಕಡಿಮೆ ಮಾಡಬಹುದು ಎಂದು ಇತ್ತೀಚಿನ ಸಂಶೋಧನೆಯೊಂದು ಸಾಬೀತುಪಡಿಸಿದೆ.
ಕೆನಡಾದ ಟೊರೊಂಟೊ ಮೆಟ್ರೋಪಾಲಿಟನ್ ವಿಶ್ವವಿದ್ಯಾಲಯದ ಸಂಶೋಧಕರು ನಡೆಸಿದ ಕ್ಲಿನಿಕಲ್ ಪ್ರಯೋಗದಲ್ಲಿ 12, 24 ಮತ್ತು 36 ನಿಮಿಷಗಳ ಕಾಲ ಸಂಗೀತ ಕೇಳುವವರ ಮೇಲೆ ಅಧ್ಯಯನ ನಡೆಸಲಾಗಿತ್ತು. ಇದರಲ್ಲಿ 24 ನಿಮಿಷಗಳ ಕಾಲ ಸಂಗೀತ ಆಲಿಸಿದವರಲ್ಲಿ ಅತ್ಯಂತ ವೇಗವಾಗಿ ಮತ್ತು ಪರಿಣಾಮಕಾರಿಯಾಗಿ ಆತಂಕ ಕಡಿಮೆಯಾಗಿರುವುದು ಕಂಡುಬಂದಿದೆ. ಇದನ್ನು ಸಂಶೋಧಕರು ‘ಸ್ವೀಟ್ ಸ್ಪಾಟ್’ (Sweet Spot) ಎಂದು ಕರೆದಿದ್ದಾರೆ.
ವಿಶೇಷ ತಂತ್ರಜ್ಞಾನ: ಈ ಅಧ್ಯಯನದಲ್ಲಿ ಸಂಗೀತದ ಜೊತೆಗೆ ‘ಆಡಿಟರಿ ಬೀಟ್ ಸ್ಟಿಮ್ಯುಲೇಶನ್’ (Auditory Beat Stimulation – ABS) ಎಂಬ ಸೌಂಡ್ ಪ್ಯಾಟರ್ನ್ ಬಳಸಲಾಗಿತ್ತು. ಇದು ಮೆದುಳಿನ ಅಲೆಗಳನ್ನು ಶಾಂತಗೊಳಿಸಲು ನೆರವಾಗುತ್ತದೆ.
ಸಂಗೀತ ಕೇಳುವುದರಿಂದ ಕೇವಲ ಮನಸ್ಸು ಮಾತ್ರವಲ್ಲದೆ, ಆತಂಕದ ವೇಳೆ ಉಂಟಾಗುವ ಎದೆಬಡಿತದ ಏರಿಳಿತ ಮತ್ತು ಸ್ನಾಯುಗಳ ಬಿಗಿತದಂತಹ ದೈಹಿಕ ಲಕ್ಷಣಗಳೂ ಸಹ ಕಡಿಮೆಯಾಗುತ್ತವೆ.
ಔಷಧ ರಹಿತ ಚಿಕಿತ್ಸೆ: ಮಾತ್ರೆ ಅಥವಾ ಸುದೀರ್ಘ ಚಿಕಿತ್ಸೆ ಪಡೆಯಲು ಸಮಯವಿಲ್ಲದವರಿಗೆ ಅಥವಾ ಅಡ್ಡಪರಿಣಾಮಗಳ ಭೀತಿ ಇರುವವರಿಗೆ ಸಂಗೀತವು ಒಂದು ಅತ್ಯುತ್ತಮ ಮತ್ತು ಕಡಿಮೆ ವೆಚ್ಚದ ಪರ್ಯಾಯ ಮಾರ್ಗವಾಗಿದೆ ಎಂದು ಸಂಶೋಧಕ ಫ್ರಾಂಕ್ ರುಸ್ಸೋ ತಿಳಿಸಿದ್ದಾರೆ.
