ಟೆಹ್ರಾನ್/ವಾಷಿಂಗ್ಟನ್: ಮಧ್ಯಪ್ರಾಚ್ಯದಲ್ಲಿ ಯುದ್ಧದ ಜ್ವಾಲೆ ಭೀಕರ ಸ್ವರೂಪ ಪಡೆದುಕೊಂಡಿದೆ. ಅಮೆರಿಕ ಮತ್ತು ಇಸ್ರೇಲ್ ನಡೆಸಿದ ಸರಣಿ ದಾಳಿಗಳಿಗೆ ಪ್ರತಿಯಾಗಿ ಇರಾನ್ ಈಗ ವಿಶ್ವದ ಅತ್ಯಂತ ಪ್ರಮುಖ ತೈಲ ಸಾರಿಗೆ ಮಾರ್ಗವಾದ ‘ಹಾರ್ಮುಜ್ ಜಲಸಂಧಿ’ಯನ್ನು (Strait of Hormuz) ಬಂದ್ ಮಾಡಿರುವುದಾಗಿ ಘೋಷಿಸಿದೆ. ಈ ಮಾರ್ಗದಲ್ಲಿ ಚಲಿಸಲು ಪ್ರಯತ್ನಿಸುವ ಯಾವುದೇ ಹಡಗನ್ನು ಸುಟ್ಟು ಭಸ್ಮ ಮಾಡುವುದಾಗಿ ಇರಾನ್ನ ಹಿರಿಯ ಸೇನಾ ಅಧಿಕಾರಿಗಳು ಎಚ್ಚರಿಸಿದ್ದಾರೆ.
ಇರಾನ್ ನೀಡಿದ ಎಚ್ಚರಿಕೆ ಏನು?
“ಹಾರ್ಮುಜ್ ಜಲಸಂಧಿ ಈಗ ಅಧಿಕೃತವಾಗಿ ಮುಚ್ಚಲ್ಪಟ್ಟಿದೆ. ಯಾರಾದರೂ ಈ ಮಾರ್ಗವನ್ನು ದಾಟಲು ಪ್ರಯತ್ನಿಸಿದರೆ, ಇರಾನ್ನ ಕ್ರಾಂತಿಕಾರಿ ಪಡೆ (Revolutionary Guards) ಮತ್ತು ನೌಕಾಪಡೆಯ ವೀರರು ಆ ಹಡಗುಗಳಿಗೆ ಬೆಂಕಿ ಹಚ್ಚಲಿದ್ದಾರೆ” ಎಂದು ಕ್ರಾಂತಿಕಾರಿ ಪಡೆಯ ಕಮಾಂಡರ್ ಇನ್ ಚೀಫ್ ಅವರ ಹಿರಿಯ ಸಲಹೆಗಾರ ಎಬ್ರಾಹಿಂ ಜಬ್ಬಾರಿ ಗುಡುಗಿದ್ದಾರೆ. ಯುರೋಪಿಯನ್ ಯೂನಿಯನ್ನ ನೌಕಾ ಮಿಷನ್ ಪ್ರಕಾರ, ಈ ಭಾಗದಲ್ಲಿ ಚಲಿಸುವ ಹಡಗುಗಳಿಗೆ ಇರಾನ್ನಿಂದ “ಯಾವುದೇ ಹಡಗು ಸಾಗಲು ಅನುಮತಿಯಿಲ್ಲ” ಎಂಬ ಸಂದೇಶಗಳು ರವಾನೆಯಾಗುತ್ತಿವೆ.
ಅಮೆರಿಕದ ಪ್ರತಿಕ್ರಿಯೆ:
ಇರಾನ್ ಈ ರೀತಿಯ ಎಚ್ಚರಿಕೆ ನೀಡಿದ್ದರೂ, ಅಮೆರಿಕದ ಹಿರಿಯ ಮಿಲಿಟರಿ ಅಧಿಕಾರಿಯೊಬ್ಬರು ಇದನ್ನು ನಿರಾಕರಿಸಿದ್ದಾರೆ. ಇರಾನ್ ಕೇವಲ ಹೇಳಿಕೆ ನೀಡುತ್ತಿದೆಯೇ ಹೊರತು, ಪ್ರಾಯೋಗಿಕವಾಗಿ ಜಲಸಂಧಿಯನ್ನು ಬಂದ್ ಮಾಡಿ ಹಡಗುಗಳನ್ನು ತಡೆಯುವ ಯಾವುದೇ ಕಾರ್ಯಾಚರಣೆ ನಡೆಸುತ್ತಿಲ್ಲ ಎಂದು ಫಾಕ್ಸ್ ನ್ಯೂಸ್ ವರದಿ ಮಾಡಿದೆ.
ಹಾರ್ಮುಜ್ ಜಲಸಂಧಿ ಏಕೆ ಇಷ್ಟೊಂದು ಮುಖ್ಯ?
-
ಸ್ಥಳ: ಇದು ಇರಾನ್ ಮತ್ತು ಓಮನ್ ದೇಶಗಳ ನಡುವೆ ಇದ್ದು, ಪರ್ಷಿಯನ್ ಗಲ್ಫ್ ಅನ್ನು ಓಮನ್ ಗಲ್ಫ್ ಮತ್ತು ಅರಬ್ಬಿ ಸಮುದ್ರದೊಂದಿಗೆ ಸಂಪರ್ಕಿಸುತ್ತದೆ.
-
ತೈಲ ಮಾರ್ಗ: ಜಗತ್ತಿನ ಒಟ್ಟು ತೈಲ ಬಳಕೆಯ ಶೇ. 20ರಷ್ಟು (ಐದನೇ ಒಂದು ಭಾಗ) ತೈಲವು ಇದೇ ಮಾರ್ಗದ ಮೂಲಕ ಸಾಗುತ್ತದೆ. ಸೌದಿ ಅರೇಬಿಯಾ, ಯುಎಇ, ಇರಾನ್ ಮತ್ತು ಇರಾಕ್ನಂತಹ ದೊಡ್ಡ ತೈಲ ಉತ್ಪಾದಕ ರಾಷ್ಟ್ರಗಳಿಗೆ ಇದು ಪ್ರಮುಖ ರಫ್ತು ದಾರಿಯಾಗಿದೆ.
-
ದೊಡ್ಡ ಹಡಗುಗಳು: ವಿಶ್ವದ ಬೃಹತ್ ಕಚ್ಚಾ ತೈಲ ಟ್ಯಾಂಕರ್ಗಳು ಸಾಗಲು ಅನುಕೂಲವಾಗುವಷ್ಟು ಈ ಜಲಸಂಧಿ ಆಳ ಮತ್ತು ಅಗಲವಾಗಿದೆ.
ನೂರಾರು ಹಡಗುಗಳು ಟ್ರ್ಯಾಪ್: ಯುದ್ಧದ ಎಫೆಕ್ಟ್
ಈ ಬಿಕ್ಕಟ್ಟಿನಿಂದಾಗಿ ಹಾರ್ಮುಜ್ ಜಲಸಂಧಿಯಲ್ಲಿ ಹಡಗುಗಳ ಸಂಚಾರ ಸಂಪೂರ್ಣ ಸ್ಥಗಿತಗೊಂಡಿದೆ.
-
ಸುಮಾರು 750 ಹಡಗುಗಳು (ಅದರಲ್ಲಿ 100 ಕಂಟೈನರ್ ಹಡಗುಗಳು) ಈ ಮಾರ್ಗದಲ್ಲಿ ಸಿಲುಕಿಕೊಂಡಿವೆ.
-
ಜಗತ್ತಿನ ಒಟ್ಟು ಕಂಟೈನರ್ ಹಡಗುಗಳ ಪೈಕಿ ಶೇ. 10ರಷ್ಟು ಭಾಗ ಈ ಸಂಘರ್ಷದಿಂದಾಗಿ ಸ್ಥಗಿತಗೊಂಡಿದೆ ಎಂದು ರಾಯಿಟರ್ಸ್ ವರದಿ ಮಾಡಿದೆ.
ಅಮೆರಿಕದ ಟ್ಯಾಂಕರ್ ಮೇಲೆ ಡ್ರೋನ್ ದಾಳಿ?
ಅಮೆರಿಕದೊಂದಿಗೆ ಸಂಬಂಧ ಹೊಂದಿರುವ ‘ಎಥೆ ನೋವಾ’ (ATHE NOVA) ಎಂಬ ತೈಲ ಟ್ಯಾಂಕರ್ ಮೇಲೆ ಎರಡು ಡ್ರೋನ್ ದಾಳಿಗಳನ್ನು ನಡೆಸಿರುವುದಾಗಿ ಇರಾನ್ನ ಕ್ರಾಂತಿಕಾರಿ ಪಡೆ ಹೇಳಿಕೊಂಡಿದೆ. ದಾಳಿಯ ನಂತರ ಹಡಗು ಇನ್ನೂ ಹೊತ್ತಿ ಉರಿಯುತ್ತಿದೆ ಎಂದು ಇರಾನ್ ತಿಳಿಸಿದೆ. ಆದರೆ, ಈ ಬಗ್ಗೆ ಅಮೆರಿಕ ಈವರೆಗೆ ಯಾವುದೇ ಅಧಿಕೃತ ಹೇಳಿಕೆ ನೀಡಿಲ್ಲ.
ಯುದ್ಧದ ಈ ಬೆಳವಣಿಗೆಯಿಂದಾಗಿ ಜಾಗತಿಕ ಇಂಧನ ಭದ್ರತೆಗೆ ದೊಡ್ಡ ಅಪಾಯ ಎದುರಾಗಿದ್ದು, ತೈಲ ಮತ್ತು ಅನಿಲ ಬೆಲೆಗಳಲ್ಲಿ ಭಾರಿ ಏರಿಕೆಯಾಗುವ ಸಾಧ್ಯತೆ ಇದೆ.
ಗಲ್ಫ್ ರಾಷ್ಟ್ರಗಳಲ್ಲಿ ಸಿಬಿಎಸ್ಇ 10, 12ನೇ ತರಗತಿ ಪರೀಕ್ಷೆಗಳು ಮತ್ತೆ ಮುಂದೂಡಿಕೆ | CBSE Exams Postpone
