ಟೆಹ್ರಾನ್: ಹೋರ್ಮುಜ್ ಜಲಸಂಧಿಯ ಬಳಿ ಅಮೆರಿಕದ ನೌಕಾಪಡೆಯು ತನ್ನ ಸರಕು ಸಾಗಣೆ ಹಡಗನ್ನು ಬಲವಂತವಾಗಿ ವಶಪಡಿಸಿಕೊಂಡಿರುವುದನ್ನು ಇರಾನ್ ಅಧಿಕೃತವಾಗಿ ಖಚಿತಪಡಿಸಿದೆ. ಅಮೆರಿಕದ ಈ ಕ್ರಮವನ್ನು “ಶಸ್ತ್ರಸಜ್ಜಿತ ಸಮುದ್ರ ದರೋಡೆ” (Armed Piracy) ಎಂದು ಕರೆದಿರುವ ಇರಾನ್, ಇದಕ್ಕೆ ತಕ್ಕ ರೀತಿಯಲ್ಲಿ ಪ್ರಬಲ ಪ್ರತಿಕಾರ ತೀರಿಸಿಕೊಳ್ಳುವುದಾಗಿ ಎಚ್ಚರಿಕೆ ನೀಡಿದೆ.
ಇರಾನ್ನ ವಿದೇಶಾಂಗ ಸಚಿವಾಲಯವು ಸೋಮವಾರ ಹೇಳಿಕೆ ಬಿಡುಗಡೆ ಮಾಡಿದ್ದು, ಅಮೆರಿಕದ ಪಡೆಗಳು ಇರಾನ್ ಧ್ವಜ ಹೊಂದಿದ್ದ ‘ಟೌಸ್ಕಾ’ (TOUSKA) ಹಡಗನ್ನು ಅಂತರರಾಷ್ಟ್ರೀಯ ಜಲಪ್ರದೇಶದಲ್ಲಿ ಅಕ್ರಮವಾಗಿ ತಡೆದಿದೆ ಎಂದು ದೂರಿದೆ.
“ಯಾವುದೇ ಕಾನೂನುಬದ್ಧ ಕಾರಣವಿಲ್ಲದೆ ಅಮೆರಿಕವು ನಮ್ಮ ವಾಣಿಜ್ಯ ಹಡಗಿನ ಮೇಲೆ ದಾಳಿ ನಡೆಸಿದೆ. ಇದು ಅಂತರರಾಷ್ಟ್ರೀಯ ಸಮುದ್ರ ಕಾನೂನುಗಳ ಉಲ್ಲಂಘನೆ ಮತ್ತು ನೇರ ದರೋಡೆಯಾಗಿದೆ,” ಎಂದು ಇರಾನ್ ಕಿಡಿಕಾರಿದೆ.
ಅಮೆರಿಕದ ಈ ಕೃತ್ಯಕ್ಕೆ ಶೀಘ್ರದಲ್ಲೇ ಉತ್ತರ ನೀಡಲಾಗುವುದು. ಈ ರಕ್ಕಸತನಕ್ಕೆ ಅಮೆರಿಕ ಭಾರಿ ಬೆಲೆ ತೆರಬೇಕಾಗುತ್ತದೆ ಎಂದು ಇರಾನ್ನ ಕ್ರಾಂತಿಕಾರಿ ದಳ (IRGC) ಗುಡುಗಿದೆ.
ಅಮೆರಿಕದ ನೌಕಾಪಡೆಯು ಹಡಗಿನ ಎಂಜಿನ್ ರೂಮ್ಗೆ ಹಾನಿ ಮಾಡಿ ಹಡಗನ್ನು ತನ್ನ ನಿಯಂತ್ರಣಕ್ಕೆ ತೆಗೆದುಕೊಂಡಿರುವುದು ಈಗ ಎರಡು ದೇಶಗಳ ನಡುವೆ ನೇರ ಯುದ್ಧಕ್ಕೆ ಕಾರಣವಾಗುವ ಸಾಧ್ಯತೆಯಿದೆ.
