ಟೆಹ್ರಾನ್: ಅಮೆರಿಕ ಮತ್ತು ಇಸ್ರೇಲ್ ಜೊತೆಗಿನ ಸಂಘರ್ಷದಿಂದಾಗಿ ಕಳೆದ ಫೆಬ್ರವರಿಯಿಂದ ಹಾರ್ಮುಜ್ ಜಲಸಂಧಿಯಲ್ಲಿ (Strait of Hormuz) ಕಟ್ಟುನಿಟ್ಟಿನ ನಿರ್ಬಂಧ ಹೇರಿದ್ದ ಇರಾನ್, ಈಗ ತನ್ನ ನಿಲುವು ಸಡಿಲಿಸಿದೆ. ಆಹಾರ ಧಾನ್ಯಗಳು ಮತ್ತು ಔಷಧಿಗಳಂತಹ ಅಗತ್ಯ ವಸ್ತುಗಳನ್ನು ಹೊತ್ತ ಹಡಗುಗಳು ತನ್ನ ಬಂದರುಗಳಿಗೆ ತಲುಪಲು ಇರಾನ್ ಸರ್ಕಾರ ಮತ್ತು ಸಶಸ್ತ್ರ ಪಡೆಗಳು ಅಧಿಕೃತವಾಗಿ ಅನುಮತಿ ನೀಡಿವೆ.
ಇರಾನ್ನ ಕೃಷಿ ಸಚಿವಾಲಯದ ವಾಣಿಜ್ಯ ಅಭಿವೃದ್ಧಿ ವಿಭಾಗವು ಹೊರಡಿಸಿರುವ ಆದೇಶದಂತೆ, ಆಹಾರ ಪದಾರ್ಥಗಳು, ಪಶು ಆಹಾರ ಮತ್ತು ವೈದ್ಯಕೀಯ ಸರಕುಗಳನ್ನು ಹೊತ್ತ ಹಡಗುಗಳಿಗೆ ಮಾತ್ರ ಜಲಸಂಧಿಯಲ್ಲಿ ಪ್ರವೇಶ ನೀಡಲಾಗುವುದು.
ಈ ಹಡಗುಗಳು ಇರಾನ್ ಬಂದರು ಮತ್ತು ನೌಕಾ ಸಂಸ್ಥೆಯೊಂದಿಗೆ (PMO) ನಿರಂತರ ಸಂಪರ್ಕದಲ್ಲಿರಬೇಕು ಮತ್ತು ನಿಗದಿಪಡಿಸಿದ ಸುರಕ್ಷತಾ ನಿಯಮಗಳನ್ನು ಕಟ್ಟುನಿಟ್ಟಾಗಿ ಪಾಲಿಸಬೇಕು. ಓಮನ್ ಕೊಲ್ಲಿಯಲ್ಲಿ ಕಾಯುತ್ತಿರುವ ಹಡಗುಗಳು ಇರಾನ್ ಅಧಿಕಾರಿಗಳೊಂದಿಗೆ ಸಮನ್ವಯ ಸಾಧಿಸಿದ ನಂತರವಷ್ಟೇ ಜಲಸಂಧಿಯನ್ನು ದಾಟಲು ಅವಕಾಶ ನೀಡಲಾಗುತ್ತದೆ.
ಹಾರ್ಮುಜ್ ಜಲಸಂಧಿಯು ವಿಶ್ವದ ಒಟ್ಟು ತೈಲ ವ್ಯಾಪಾರದ ಶೇ. 20ರಷ್ಟನ್ನು ನಿಯಂತ್ರಿಸುತ್ತದೆ. ಇರಾನ್ ಈ ಮಾರ್ಗವನ್ನು ಭಾಗಶಃ ಮುಕ್ತಗೊಳಿಸಿರುವುದು ಜಾಗತಿಕ ಮಾರುಕಟ್ಟೆಯಲ್ಲಿ ಅಗತ್ಯ ವಸ್ತುಗಳ ಬೆಲೆ ಏರಿಕೆಯನ್ನು ತಡೆಯಲು ಸಹಕಾರಿಯಾಗಲಿದೆ.
