ಮುಂಬೈ: ಐಪಿಎಲ್ ಕ್ರಿಕೆಟಿಗರು ಮೈದಾನಕ್ಕಿಂತ ಸೋಶಿಯಲ್ ಮೀಡಿಯಾದಲ್ಲೇ ಹೆಚ್ಚು ಸಕ್ರಿಯರಾಗುತ್ತಿರುವುದು ಮತ್ತು ತಡರಾತ್ರಿಯವರೆಗೂ ಪಾರ್ಟಿಗಳಲ್ಲಿ ಭಾಗಿಯಾಗುತ್ತಿರುವುದು ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿಯ (BCCI) ಕೆಂಗಣ್ಣಿಗೆ ಗುರಿಯಾಗಿದೆ. ಆಟಗಾರರ ಶಿಸ್ತು ಮತ್ತು ಭದ್ರತೆಯ ದೃಷ್ಟಿಯಿಂದ ಬಿಸಿಸಿಐ ಈಗ ಕಟ್ಟುನಿಟ್ಟಿನ ‘ಕ್ರ್ಯಾಕ್ಡೌನ್’ (Crackdown) ಆರಂಭಿಸಿದೆ.
ಆಟಗಾರರು ಮೈದಾನದ ನಿರ್ಬಂಧಿತ ಪ್ರದೇಶಗಳಲ್ಲಿ (Restricted Zones), ಡ್ರೆಸ್ಸಿಂಗ್ ರೂಮ್ಗಳಲ್ಲಿ ಮತ್ತು ಅಭ್ಯಾಸದ ವೇಳೆ ರೀಲ್ಸ್ಗಳನ್ನು ಮಾಡಿ ಸೋಶಿಯಲ್ ಮೀಡಿಯಾದಲ್ಲಿ ಪೋಸ್ಟ್ ಮಾಡುತ್ತಿರುವುದಕ್ಕೆ ಬಿಸಿಸಿಐ ತೀವ್ರ ಆಕ್ಷೇಪ ವ್ಯಕ್ತಪಡಿಸಿದೆ. ಇದು ತಂಡದ ತಂತ್ರಗಳನ್ನು ಸೋರಿಕೆ ಮಾಡಬಹುದು ಎಂಬ ಆತಂಕ ಮಂಡಳಿಗಿದೆ.
ಆಟಗಾರರು ಭದ್ರತಾ ಅಧಿಕಾರಿಗಳಿಗೆ ಮಾಹಿತಿ ನೀಡದೆ ತಡರಾತ್ರಿಯವರೆಗೆ ಹೊರಗಡೆ ಸುತ್ತಾಡುವುದು ಮತ್ತು ಅನಧಿಕೃತ ವ್ಯಕ್ತಿಗಳನ್ನು ಭೇಟಿಯಾಗುತ್ತಿರುವುದು ಭದ್ರತಾ ನಿಯಮಗಳ ಉಲ್ಲಂಘನೆಯಾಗಿದೆ ಎಂದು ಬಿಸಿಸಿಐ ಎಚ್ಚರಿಸಿದೆ.
ಸೋಶಿಯಲ್ ಮೀಡಿಯಾ ಇನ್ಫ್ಲುಯೆನ್ಸರ್ಸ್ಗಳೊಂದಿಗೆ ಆಟಗಾರರು ಅತಿಯಾದ ನಿಕಟ ಸಂಪರ್ಕ ಹೊಂದಿರುವುದು ಮತ್ತು ಹೋಟೆಲ್ ರೂಮ್ಗಳಿಗೆ ಅವರನ್ನು ಆಹ್ವಾನಿಸುತ್ತಿರುವುದು ‘ಹನಿ ಟ್ರ್ಯಾಪ್’ (Honey Trap) ನಂತಹ ಅಪಾಯಗಳಿಗೆ ದಾರಿ ಮಾಡಿಕೊಡಬಹುದು ಎಂದು ಭ್ರಷ್ಟಾಚಾರ ವಿರೋಧಿ ದಳ (ACU) ಎಚ್ಚರಿಕೆ ನೀಡಿದೆ.
ರಾತ್ರಿ 10ರ ಗಡುವು: ಆಟಗಾರರು ತಮ್ಮ ಹೋಟೆಲ್ ರೂಮ್ಗಳಲ್ಲಿ ಅತಿಥಿಗಳನ್ನು ಭೇಟಿ ಮಾಡಲು ರಾತ್ರಿ 10 ಗಂಟೆಯವರೆಗೆ ಮಾತ್ರ ಅವಕಾಶ ನೀಡಲಾಗಿದೆ. ನಂತರದ ಭೇಟಿಗಳನ್ನು ಹೋಟೆಲ್ ಲಾಬಿಯಲ್ಲಿ ಮಾತ್ರ ಮಾಡಬೇಕು.
ಸೋಶಿಯಲ್ ಮೀಡಿಯಾ ನಿಯಂತ್ರಣ: ಪಂದ್ಯ ನಡೆಯುವ ದಿನಗಳಲ್ಲಿ ಆಟಗಾರರು ಅಥವಾ ಅವರ ಕುಟುಂಬದವರು ಮೈದಾನದ ಒಳಗಿನ ದೃಶ್ಯಗಳನ್ನು ಚಿತ್ರೀಕರಿಸಿ ಹಾಕುವಂತಿಲ್ಲ. ಉಲ್ಲಂಘಿಸಿದರೆ ಭಾರಿ ದಂಡ ವಿಧಿಸಲಾಗುತ್ತದೆ.
ಮಾಜಿ ಕ್ರಿಕೆಟಿಗರಿಗೂ ಎಚ್ಚರಿಕೆ: ಕಾಮೆಂಟೇಟರ್ಗಳಾಗಿ ಕೆಲಸ ಮಾಡುತ್ತಿರುವ ಮಾಜಿ ಕ್ರಿಕೆಟಿಗರು ಕೂಡ ಮೈದಾನದಲ್ಲಿ ರೀಲ್ಸ್ ಮಾಡುವಂತಿಲ್ಲ. ಈಗಾಗಲೇ ಒಬ್ಬ ಮಾಜಿ ಕ್ರಿಕೆಟಿಗನಿಗೆ ಈ ಸಂಬಂಧ ಬಿಸಿಸಿಐ ಕಾನೂನು ನೋಟಿಸ್ ನೀಡಲು ಸಿದ್ಧತೆ ನಡೆಸಿದೆ ಎನ್ನಲಾಗಿದೆ.
