ಭಾರತದಲ್ಲಿ ಭಾರೀ ಸದ್ದು ಮಾಡುತ್ತಿರುವ ‘ಕಾಕ್ರೋಚ್ ಜನತಾ ಪಾರ್ಟಿ’ (CJP) ಯ ಜನಪ್ರಿಯತೆ ಈಗ ಗಡಿ ದಾಟಿದ್ದು, ಪಾಕಿಸ್ತಾನದಲ್ಲೂ ಇದರ ಹಲವು ಆವೃತ್ತಿಗಳು ಹುಟ್ಟಿಕೊಳ್ಳಲು ಪ್ರೇರಣೆಯಾಗಿದೆ. ಅವುಗಳಲ್ಲಿ ‘ಕಾಕ್ರೋಚ್ ಅವಾಮಿ ಪಾರ್ಟಿ’ (CAP) ಮತ್ತು ‘ಕಾಕ್ರೋಚ್ ಅವಾಮಿ ಲೀಗ್’ (CAL) ಪ್ರಮುಖವಾಗಿವೆ.
ಆರಂಭದಲ್ಲಿ ಕೇವಲ ಒಂದು ವ್ಯಂಗ್ಯಚಿತ್ರ ಅಥವಾ ತಮಾಷೆಯಾಗಿ (Satire) ಆರಂಭವಾದ ಕಾಕ್ರೋಚ್ ಜನತಾ ಪಾರ್ಟಿ, ನೋಡನೋಡುತ್ತಿದ್ದಂತೆಯೇ ಇನ್ಸ್ಟಾಗ್ರಾಮ್ನಲ್ಲಿ 19 ದಶಲಕ್ಷಕ್ಕೂ (1.9 ಕೋಟಿ) ಹೆಚ್ಚು ಫಾಲೋವರ್ಸ್ಗಳನ್ನು ಸಂಪಾದಿಸಿ ಒಂದು ರಾಜಕೀಯ ಚಳವಳಿಯಾಗಿ ರೂಪಾಂತರಗೊಂಡಿದೆ.
ಇದರ ಹೆಜ್ಜೆಯನ್ನೇ ಅನುಸರಿಸಿ ಪಾಕಿಸ್ತಾನದ ಯುವಕರು ಕೂಡ ‘ಕಾಕ್ರೋಚ್ ಅವಾಮಿ ಪಾರ್ಟಿ’ (CAP) ಮತ್ತು ‘ಕಾಕ್ರೋಚ್ ಅವಾಮಿ ಲೀಗ್’ (CAL) ನಂತಹ ಹಲವು ಗುಂಪುಗಳನ್ನು ಸಾಮಾಜಿಕ ಜಾಲತಾಣಗಳಲ್ಲಿ ಸೃಷ್ಟಿಸಿದ್ದಾರೆ. ಆದರೆ, ಭಾರತದಲ್ಲಿ ಸಿಕ್ಕಷ್ಟು ದೊಡ್ಡ ಮಟ್ಟದ ಜನಪ್ರಿಯತೆ ಅಥವಾ ಬೆಂಬಲ ಸದ್ಯಕ್ಕಿನ್ನೂ ಅಲ್ಲಿ ಸಿಕ್ಕಿಲ್ಲ.
ಏನಿದು ‘ಕಾಕ್ರೋಚ್ ಜನತಾ ಪಾರ್ಟಿ’ಯ ಹಿನ್ನೆಲೆ?
ಮೇ ತಿಂಗಳ ಮಧ್ಯಭಾಗದಲ್ಲಿ ಮುಖ್ಯ ನ್ಯಾಯಮೂರ್ತಿ ಸೂರ್ಯಕಾಂತ್ ಅವರದ್ದು ಎನ್ನಲಾದ ಹೇಳಿಕೆಯೊಂದರ ವಿರುದ್ಧ ದೇಶಾದ್ಯಂತ ತೀವ್ರ ಆಕ್ರೋಶ ವ್ಯಕ್ತವಾಗಿತ್ತು. ನಿರುದ್ಯೋಗಿ ಯುವ ಕಾರ್ಯಕರ್ತರನ್ನು ಅವರು “ಜಿರಳೆಗಳು” ಮತ್ತು “ಪರಾವಲಂಬಿಗಳು” ಎಂದು ಕರೆದಿದ್ದಾರೆ ಎಂದು ಆರೋಪಿಸಲಾಗಿತ್ತು. ಇದರ ಬೆನ್ನಲ್ಲೇ ‘ಕಾಕ್ರೋಚ್ ಜನತಾ ಪಾರ್ಟಿ’ ಅಸ್ತಿತ್ವಕ್ಕೆ ಬಂದಿತು.
ಆನಂತರ ಮುಖ್ಯ ನ್ಯಾಯಮೂರ್ತಿಗಳು ತಮ್ಮ ಹೇಳಿಕೆಯ ಕುರಿತು ಸ್ಪಷ್ಟನೆ ನೀಡಿದರಾದರೂ, ಅಷ್ಟರಲ್ಲಾಗಲೇ ಈ ವಿವಾದವು ಅಂತರ್ಜಾಲದಲ್ಲಿ ಕಾಳ್ಗಿಚ್ಚಿನಂತೆ ಹಬ್ಬಿತ್ತು ಮತ್ತು ಈ ವ್ಯಂಗ್ಯಾತ್ಮಕ ಚಳವಳಿಯ ದಿಢೀರ್ ಬೆಳವಣಿಗೆಗೆ ಕಾರಣವಾಗಿತ್ತು.
ಪಾಕಿಸ್ತಾನದ ರಾಜಕೀಯ ವಲಯಕ್ಕೆ ಲಗ್ಗೆ ಇಟ್ಟ ‘ಜಿರಳೆ’ ಪಕ್ಷಗಳು
ಭಾರತದಲ್ಲಿ ಕಾಕ್ರೋಚ್ ಜನತಾ ಪಾರ್ಟಿ ಸ್ಥಾಪನೆಯಾದ ಕೆಲವೇ ದಿನಗಳಲ್ಲಿ ಪಾಕಿಸ್ತಾನಿ ಆವೃತ್ತಿಗಳು ಅಂತರ್ಜಾಲದಲ್ಲಿ ಪ್ರತ್ಯಕ್ಷವಾಗಲು ಆರಂಭಿಸಿದವು.
ಇನ್ಸ್ಟಾಗ್ರಾಮ್ನಲ್ಲಿ ಮೊಟ್ಟಮೊದಲು ಕಾಣಿಸಿಕೊಂಡ ಪೇಜ್ಗಳಲ್ಲಿ ‘ಕಾಕ್ರೋಚ್ ಅವಾಮಿ ಪಾರ್ಟಿ’ ಕೂಡ ಒಂದು. ಇದು ಭಾರತದ ಚಳವಳಿಯಿಂದ ಪ್ರೇರಿತವಾಗಿದೆ ಎಂಬುದನ್ನು ತನ್ನ ಬಯೋದಲ್ಲಿ (Bio) ಸ್ಪಷ್ಟವಾಗಿ ಬರೆದುಕೊಂಡಿದೆ. “ಹೌದು, ನಕಲು ಮಾಡಿದ್ದೇವೆ, ಆದರೆ ಯಾರಿಗೆ ಆಕ್ಷೇಪ? ಧ್ಯೇಯ ಒಂದೇ,” ಎಂದು ಅದು ಬರೆದುಕೊಂಡಿದೆ. ಈ ಖಾತೆಯು ಇದುವರೆಗೆ 1,700 ಕ್ಕೂ ಹೆಚ್ಚು ಫಾಲೋವರ್ಸ್ಗಳನ್ನು ಗಳಿಸಲು ಯಶಸ್ವಿಯಾಗಿದೆ.
ಈ ಪಾಕಿಸ್ತಾನಿ ಖಾತೆಯು ತಾನು “ಯಾವುದೇ ಒಬ್ಬ ವ್ಯಕ್ತಿ ಅಥವಾ ಒಂದೇ ತಂಡಕ್ಕೆ ಸಂಬಂಧಿಸಿದ್ದಲ್ಲ” ಮತ್ತು ಪಾಕಿಸ್ತಾನದ “ಪ್ರತಿಯೊಬ್ಬ ಜೆನ್-ಝೆಡ್ (Gen-Z ಯುವ ಪೀಳಿಗೆಯ) ನಿಜವಾದ ಧ್ವನಿ”ಯಾಗುವುದು ನಮ್ಮ ಗುರಿ ಎಂದು ಘೋಷಿಸಿಕೊಂಡಿದೆ.
