ಭಾರತದ ನೇರ ತೆರಿಗೆ ಕಾನೂನು ಪ್ರಮುಖ ಕೂಲಂಕಷ ಪರಿಶೀಲನೆಗೆ ಸಜ್ಜಾಗಿದೆ. ಕೇಂದ್ರ ನೇರ ತೆರಿಗೆ ಮಂಡಳಿ (ಸಿಬಿಡಿಟಿ) ಕರಡು ಆದಾಯ ತೆರಿಗೆ ನಿಯಮಗಳು, 2026 ಅನ್ನು ಬಿಡುಗಡೆ ಮಾಡಿದೆ, ಇದು ಆರು ದಶಕಗಳಷ್ಟು ಹಳೆಯದಾದ ಆದಾಯ ತೆರಿಗೆ ನಿಯಮಗಳು, 1962 ಅನ್ನು ಜಾರಿಗೆ ತಂದ ನಂತರ ಬದಲಾಯಿಸುತ್ತದೆ.
ಸಾರ್ವಜನಿಕರ ಅಭಿಪ್ರಾಯಕ್ಕಾಗಿ ಫೆಬ್ರವರಿ 22 ರವರೆಗೆ ಮುಕ್ತವಾಗಿರುವ ಈ ಕರಡು ನಿಯಮಗಳು, ತೆರಿಗೆ ಅನುಸರಣೆಯನ್ನು ಸರಳಗೊಳಿಸುವ ಮತ್ತು ಇಂದಿನ ಆರ್ಥಿಕ ಸ್ಥಿತಿಗತಿಗೆ ಅನುಗುಣವಾಗಿ ವರದಿ ಮಾಡುವಿಕೆಯನ್ನು ಆಧುನೀಕರಿಸುವ ಗುರಿಯನ್ನು ಹೊಂದಿವೆ.
ಸಿಎ ಸುರೇಶ್ ಸುರಾನಾ ಅವರು ಏಪ್ರಿಲ್ 1, 2026 ರಿಂದ ನಿಮ್ಮ ಸಂಬಳ, ಹೂಡಿಕೆ ಮತ್ತು ಬ್ಯಾಂಕಿಂಗ್ ವಹಿವಾಟುಗಳ ಮೇಲೆ ನೇರ ಪರಿಣಾಮ ಬೀರಲಿರುವ 10 ಪ್ರಮುಖ ಬದಲಾವಣೆಗಳನ್ನು ಈ ಕೆಳಗಿನಂತೆ ಪಟ್ಟಿ ಮಾಡಿದ್ದಾರೆ:
1. ಹೆಚ್ಚಿನ ಮೌಲ್ಯದ ವಹಿವಾಟುಗಳಿಗೆ PAN ನಿಯಮಗಳ ಪರಿಷ್ಕರಣೆ
ಹೊಸ ನಿಯಮಗಳ ಪ್ರಕಾರ, ಒಂದು ಹಣಕಾಸು ವರ್ಷದಲ್ಲಿ ಒಟ್ಟು 10 ಲಕ್ಷ ರೂಪಾಯಿ ಅಥವಾ ಅದಕ್ಕಿಂತ ಹೆಚ್ಚಿನ ನಗದು ಜಮೆ ಅಥವಾ ಹಿಂಪಡೆಯುವಿಕೆಗೆ PAN ಕಡ್ಡಾಯವಾಗಿದೆ. ಪ್ರಸ್ತುತ ಜಮೆಗೆ ದಿನಕ್ಕೆ 50,000 ರೂ. ಮಿತಿಯಿದ್ದು, ಹಿಂಪಡೆಯುವಿಕೆಗೆ ನಿರ್ದಿಷ್ಟ ನಿಯಮವಿರಲಿಲ್ಲ.
2. ನಗದು ಜಮೆ ಮತ್ತು ಹಿಂಪಡೆಯುವಿಕೆ: ವಾರ್ಷಿಕ ಮಿತಿ ಜಾರಿ
ದೈನಂದಿನ ಮಿತಿಯ ಬದಲಿಗೆ ಈಗ ವಾರ್ಷಿಕ 10 ಲಕ್ಷ ರೂಪಾಯಿಗಳ ಮಿತಿಯನ್ನು ಅನ್ವಯಿಸಲಾಗುತ್ತದೆ. ಇದು ಸಣ್ಣ ಪ್ರಮಾಣದ ದೈನಂದಿನ ವ್ಯವಹಾರಗಳಿಗೆ ದಾಖಲೆಗಳ ಕಿರಿಕಿರಿ ತಪ್ಪಿಸಿದರೂ, ದೊಡ್ಡ ಮೊತ್ತದ ನಗದು ಚಲಾವಣೆಯ ಮೇಲೆ ಕಟ್ಟುನಿಟ್ಟಿನ ನಿಗಾ ಇಡಲಿದೆ.
3. ಮೆಟ್ರೋ ನಗರಗಳ ಪಟ್ಟಿಗೆ ಹೊಸ ಸೇರ್ಪಡೆ: ಹೆಚ್ಆರ್ಎ (HRA) ಲಾಭ
ಬೆಂಗಳೂರು, ಪುಣೆ, ಅಹಮದಾಬಾದ್ ಮತ್ತು ಹೈದರಾಬಾದ್ ನಗರಗಳನ್ನು ‘ಮೆಟ್ರೋ ನಗರ’ಗಳೆಂದು ಪರಿಗಣಿಸಲು ಪ್ರಸ್ತಾವನೆ ಸಲ್ಲಿಸಲಾಗಿದೆ. ಇದರಿಂದ ಈ ನಗರಗಳಲ್ಲಿ ವಾಸಿಸುವ ಉದ್ಯೋಗಿಗಳ ಮನೆ ಬಾಡಿಗೆ ಭತ್ಯೆಯ (HRA) ತೆರಿಗೆ ವಿನಾಯಿತಿ ಮಿತಿ ಮೂಲ ವೇತನದ 40% ರಿಂದ 50% ಕ್ಕೆ ಏರಿಕೆಯಾಗಲಿದ್ದು, ಲಕ್ಷಾಂತರ ವೃತ್ತಿಪರರಿಗೆ ತೆರಿಗೆ ಉಳಿತಾಯವಾಗಲಿದೆ.
4. ಹೆಚ್ಚಿನ ತೆರಿಗೆ ಮುಕ್ತ ಸೌಲಭ್ಯಗಳು (Perquisites)
ಕಂಪನಿಗಳು ನೀಡುವ ಅಧಿಕೃತ ವಾಹನಗಳು ಮತ್ತು ಉಚಿತ ಊಟದಂತಹ ಸೌಲಭ್ಯಗಳ ತೆರಿಗೆ ಮುಕ್ತ ಮಿತಿಯನ್ನು ಹೆಚ್ಚಿಸಲಾಗಿದೆ. ಹಳೆಯ ನಿಯಮಗಳನ್ನು ಪ್ರಸ್ತುತ ಜೀವನ ವೆಚ್ಚಕ್ಕೆ ಅನುಗುಣವಾಗಿ ಸುಧಾರಿಸಲಾಗಿದೆ.
5. ಆಸ್ತಿ ವಹಿವಾಟು ಮಿತಿ ಏರಿಕೆ
ಸ್ಥಿರ ಆಸ್ತಿ ವಹಿವಾಟುಗಳಿಗೆ PAN ವರದಿ ಮಾಡುವ ಮಿತಿಯನ್ನು 10 ಲಕ್ಷದಿಂದ 20 ಲಕ್ಷ ರೂಪಾಯಿಗೆ ಏರಿಸಲಾಗಿದೆ. ಇದು ಉಡುಗೊರೆ (Gifts) ಮತ್ತು ಜಂಟಿ ಅಭಿವೃದ್ಧಿ ಒಪ್ಪಂದಗಳಿಗೂ (JDA) ಅನ್ವಯಿಸುತ್ತದೆ.
6. ಇನ್ಶೂರೆನ್ಸ್ ಪ್ರೀಮಿಯಂ: ಎಲ್ಲರಿಗೂ PAN ಕಡ್ಡಾಯ
ಹಿಂದೆ ವಾರ್ಷಿಕ 50,000 ರೂ.ಗಿಂತ ಹೆಚ್ಚಿನ ಪ್ರೀಮಿಯಂಗೆ ಮಾತ್ರ PAN ಬೇಕಿತ್ತು. ಆದರೆ ಈಗ ವಿಮೆಯ ಮೊತ್ತ ಎಷ್ಟೇ ಇರಲಿ, ಪ್ರೀಮಿಯಂ ಪಾವತಿಸಲು PAN ಕಡ್ಡಾಯಗೊಳಿಸಲಾಗಿದೆ.
7. ವಾಹನ ಖರೀದಿ: ದ್ವಿಚಕ್ರ ವಾಹನಗಳೂ ಸೇರ್ಪಡೆ
5 ಲಕ್ಷ ರೂಪಾಯಿ ಅಥವಾ ಅದಕ್ಕಿಂತ ಹೆಚ್ಚಿನ ಮೌಲ್ಯದ ದ್ವಿಚಕ್ರ ವಾಹನಗಳೂ ಸೇರಿದಂತೆ ಎಲ್ಲಾ ವಾಹನಗಳ ಖರೀದಿಗೆ ಈಗ PAN ಕಡ್ಡಾಯ. ಪ್ರಸ್ತುತ ದ್ವಿಚಕ್ರ ವಾಹನಗಳಿಗೆ ಈ ನಿಯಮವಿರಲಿಲ್ಲ.
8. ಕ್ರಿಪ್ಟೋ ಎಿನಿಮಯ ಕೇಂದ್ರಗಳಿಗೆ ಕಟ್ಟುನಿಟ್ಟಿನ ನಿಯಮ
ಡಿಜಿಟಲ್ ಆಸ್ತಿಗಳ ಮೇಲಿನ ನಿಗಾ ಹೆಚ್ಚಿಸಲು ಕ್ರಿಪ್ಟೋ ಎಿನಿಮಯ ಕೇಂದ್ರಗಳು ಹೆಚ್ಚಿನ ಮಾಹಿತಿ ಹಂಚಿಕೊಳ್ಳುವುದನ್ನು ಕಡ್ಡಾಯಗೊಳಿಸಲಾಗಿದೆ. ಇದರಿಂದ ಕ್ರಿಪ್ಟೋ ವ್ಯವಹಾರಗಳಲ್ಲಿ ತೆರಿಗೆ ವಂಚನೆ ತಡೆಯುವುದು ಸುಲಭವಾಗಲಿದೆ.
9. ಸಿಬಿಡಿಸಿ (CBDC) ಅಧಿಕೃತ ಪಾವತಿ ಮೋಡ್
ಭಾರತೀಯ ರಿಸರ್ವ್ ಬ್ಯಾಂಕ್ ಹೊರತಂದಿರುವ ಡಿಜಿಟಲ್ ರೂಪಾಯಿ (CBDC) ಅನ್ನು ಈಗ ಅಧಿಕೃತ ಎಲೆಕ್ಟ್ರಾನಿಕ್ ಪಾವತಿ ವಿಧಾನವೆಂದು ತೆರಿಗೆ ನಿಯಮಗಳಲ್ಲಿ ಮಾನ್ಯ ಮಾಡಲಾಗಿದೆ.
10. ಬೃಹತ್ ಸಾಂಸ್ಥಿಕ ಸುಧಾರಣೆ: ನಿಯಮ ಮತ್ತು ಫಾರ್ಮ್ಗಳ ಕಡಿತ
ಆಡಳಿತಾತ್ಮಕ ಸುಲಭತೆಗಾಗಿ ದೊಡ್ಡ ಮಟ್ಟದ ಬದಲಾವಣೆ ಮಾಡಲಾಗಿದೆ:
* ನಿಯಮಗಳನ್ನು 511 ರಿಂದ 333 ಕ್ಕೆ ಇಳಿಸಲಾಗಿದೆ.
* ನಿಗದಿಪಡಿಸಿದ ಫಾರ್ಮ್ಗಳನ್ನು 399 ರಿಂದ 190 ಕ್ಕೆ ಇಳಿಸಲಾಗಿದೆ.
“ಚದುರಿ ಹೋಗಿದ್ದ ನಿಯಮಗಳನ್ನು ವಿಷಯಾಧಾರಿತವಾಗಿ ಒಂದೆಡೆ ಕ್ರೋಢೀಕರಿಸಿರುವುದು ಈ ಕರಡಿನ ವಿಶೇಷ. ಇದು ತೆರಿಗೆದಾರರಿಗೆ ನಿಯಮಗಳನ್ನು ಅರ್ಥಮಾಡಿಕೊಳ್ಳಲು ಮತ್ತು ಪಾಲಿಸಲು ಹೆಚ್ಚು ಸುಲಭವಾಗಲಿದೆ,” ಎಂದು ಸುರಾನಾ ತಿಳಿಸಿದ್ದಾರೆ.
