ಬೆಂಗಳೂರು: ಸಿಲಿಕಾನ್ ಸಿಟಿಯ ಆಸ್ತಿ ಮಾಲೀಕರು ಇನ್ನು ಮುಂದೆ ಇ-ಖಾತಾ ಪಡೆಯಲು ಕಚೇರಿಗಳಿಗೆ ಅಲೆದಾಡಬೇಕಿಲ್ಲ. ಸಾರ್ವಜನಿಕರ ಅನುಕೂಲಕ್ಕಾಗಿ ಗ್ರೇಟರ್ ಬೆಂಗಳೂರು ಅಥಾರಿಟಿ (GBA) ವತಿಯಿಂದ ಇದೇ ಮೇ 16ರಿಂದ ಬೃಹತ್ ‘ಇ-ಖಾತಾ ಮೇಳ’ ಆಯೋಜಿಸಲಾಗಿದೆ.
50 ಕಡೆಗಳಲ್ಲಿ ಇ-ಖಾತಾ ಮೇಳ
ಜಿಬಿಎ ವ್ಯಾಪ್ತಿಯ ಐದು ನಗರ ಪಾಲಿಕೆಗಳ ಒಟ್ಟು 50 ಕೇಂದ್ರಗಳಲ್ಲಿ ಈ ಮೇಳ ನಡೆಯಲಿದೆ. ಅಂದಾಜು 25 ಲಕ್ಷ ಆಸ್ತಿಗಳನ್ನು ಇ-ಖಾತಾ ವ್ಯಾಪ್ತಿಗೆ ತರುವ ಗುರಿಯನ್ನು ಹೊಂದಲಾಗಿದ್ದು, ಈಗಾಗಲೇ 10 ಲಕ್ಷ ಆಸ್ತಿಗಳ ಇ-ಖಾತಾ ವಿತರಣೆ ಪೂರ್ಣಗೊಂಡಿದೆ. ಮೇ 16ರ ನಂತರ ಪ್ರತಿ ಶನಿವಾರ ಈ ಮೇಳಗಳು ನಡೆಯಲಿದ್ದು, ಸಾರ್ವಜನಿಕರು ಇದರ ಸದುಪಯೋಗ ಪಡಿಸಿಕೊಳ್ಳಬಹುದಾಗಿದೆ.
ಮಧ್ಯವರ್ತಿಗಳ ಕಾಟಕ್ಕೆ ಬ್ರೇಕ್
ಈ ಮೇಳದ ಪ್ರಮುಖ ಉದ್ದೇಶವೇ ಪಾರದರ್ಶಕತೆ. ಸಾರ್ವಜನಿಕರು ನೇರವಾಗಿ ಮೇಳಕ್ಕೆ ಭೇಟಿ ನೀಡಿ ಅರ್ಜಿ ಸಲ್ಲಿಸಬಹುದು. ಇಲ್ಲಿ ಯಾವುದೇ ಮಧ್ಯವರ್ತಿಗಳ ಹಾವಳಿ ಇರುವುದಿಲ್ಲ ಮತ್ತು ಲಂಚದ ಬೇಡಿಕೆಗೂ ಅವಕಾಶವಿರುವುದಿಲ್ಲ. ಡಿಜಿಟಲ್ ವ್ಯವಸ್ಥೆಯ ಮೂಲಕ ನೇರವಾಗಿ ಅರ್ಹರಿಗೆ ಇ-ಖಾತಾ ತಲುಪಲಿದೆ.
ಅಗತ್ಯವಿರುವ ದಾಖಲಾತಿಗಳು ಯಾವುವು?
ಇ-ಖಾತಾ ಪಡೆಯಲು ಇಚ್ಛಿಸುವವರು ಈ ಕೆಳಗಿನ ದಾಖಲೆಗಳೊಂದಿಗೆ ಮೇಳಕ್ಕೆ ಹಾಜರಾಗಬೇಕೆಂದು ಜಿಬಿಎ ಸೂಚಿಸಿದೆ:
ಕ್ರಯ ಪತ್ರ (Sale Deed): ಆಸ್ತಿಯ ಹಕ್ಕು ದೃಢೀಕರಿಸುವ ಮೂಲ ದಾಖಲೆ.
ಆಸ್ತಿ ತೆರಿಗೆ ರಸೀದಿ: ಇತ್ತೀಚಿನ ಆಸ್ತಿ ತೆರಿಗೆ ಪಾವತಿಸಿದ ರಸೀದಿ.
SAS ಪ್ರಾಪರ್ಟಿ ಟ್ಯಾಕ್ಸ್ ಐಡಿ: ತೆರಿಗೆ ಪಾವತಿಗೆ ಸಂಬಂಧಿಸಿದ ಗುರುತಿನ ಸಂಖ್ಯೆ.
ಆಧಾರ್ ಕಾರ್ಡ್: ಮಾಲೀಕರ ಗುರುತಿನ ಚೀಟಿ (ಇ-ಕೆವೈಸಿ ಆಗಿದ್ದರೆ ಪ್ರಕ್ರಿಯೆ ಸುಲಭ).
ಇಸಿ (Encumbrance Certificate): ಆಸ್ತಿಯ ಮೇಲಿನ ಹೊಣೆಗಾರಿಕೆ ಇಲ್ಲದ ಪ್ರಮಾಣಪತ್ರ.
ಬೆಸ್ಕಾಂ ಬಿಲ್: ವಿದ್ಯುತ್ ಬಿಲ್ ಪ್ರತಿಯನ್ನು ಲಗತ್ತಿಸಬೇಕು.
ಜಿಪಿಎಸ್ ಲೊಕೇಶನ್: ಆಸ್ತಿಯ ನಿಖರವಾದ ಜಿಪಿಎಸ್ ಲೊಕೇಶನ್ ಮಾಹಿತಿ.
