ವಾಷಿಂಗ್ಟನ್:ಅಮೆರಿಕದಲ್ಲಿ ಕಾನೂನುಬದ್ಧ ದಾಖಲೆಗಳಿಲ್ಲದೆ ನೆಲೆಸಿರುವ ಭಾರತೀಯರು ಸೇರಿದಂತೆ ಎಲ್ಲಾ ಅಕ್ರಮ ವಲಸಿಗರನ್ನು ತೆರವುಗೊಳಿಸಲು ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ನೇತೃತ್ವದ ಸರ್ಕಾರವು ‘ಪ್ರಾಜೆಕ್ಟ್ ಹೋಮ್ಕಮಿಂಗ್’ (Project Homecoming) ಅಡಿಯಲ್ಲಿ ಹೊಸದೊಂದು ಆಕರ್ಷಕ ಯೋಜನೆಯನ್ನು ಘೋಷಿಸಿದೆ. ಅಕ್ರಮ ವಲಸಿಗರು ತಾವಾಗಿಯೇ ದೇಶ ಬಿಟ್ಟು ಹೋಗಲು ನಿರ್ಧರಿಸಿದರೆ, ಅವರಿಗೆ ಉಚಿತ ವಿಮಾನ ಟಿಕೆಟ್ ಜೊತೆಗೆ ಭಾರಿ ಹಣದ ಆಮಿಷವನ್ನೂ ಒಡ್ಡಲಾಗಿದೆ.
ಏನಿದು ‘ಸೆಲ್ಫ್ ಡಿಪೋರ್ಟೇಶನ್’ ಯೋಜನೆ?
ಹಣದ ಆಮಿಷ: ಅಕ್ರಮ ವಲಸಿಗರು ತಾವಾಗಿಯೇ ಭಾರತಕ್ಕೆ (ಅಥವಾ ತಮ್ಮ ಸ್ವದೇಶಕ್ಕೆ) ಮರಳಲು ಒಪ್ಪಿಕೊಂಡರೆ, ಅಮೆರಿಕ ಸರ್ಕಾರವು ಅವರಿಗೆ 2,600 ಡಾಲರ್ (ಸುಮಾರು 2.15 ಲಕ್ಷ ರೂಪಾಯಿ) ‘ಎಕ್ಸಿಟ್ ಬೋನಸ್’ ನೀಡಲಿದೆ.
ಉಚಿತ ವಿಮಾನ ಪ್ರಯಾಣ: ಪ್ರಯಾಣಿಕರು ತಮ್ಮ ಸ್ವಂತ ಖರ್ಚಿನಲ್ಲಿ ಟಿಕೆಟ್ ಬುಕ್ ಮಾಡುವ ಅಗತ್ಯವಿಲ್ಲ. ‘CBP Home’ ಎಂಬ ಮೊಬೈಲ್ ಆಪ್ ಮೂಲಕ ನೋಂದಾಯಿಸಿಕೊಂಡರೆ, ಸರ್ಕಾರವೇ ಉಚಿತ ವಿಮಾನ ಪ್ರಯಾಣದ ವ್ಯವಸ್ಥೆ ಮಾಡಲಿದೆ.
ದಂಡ ಮನ್ನಾ: ವೀಸಾ ಅವಧಿ ಮುಗಿದ ನಂತರವೂ ಅಕ್ರಮವಾಗಿ ನೆಲೆಸಿದ್ದಕ್ಕಾಗಿ ವಿಧಿಸಲಾಗುವ ಭಾರಿ ದಂಡವನ್ನೂ ಈ ಯೋಜನೆಯಡಿ ಮನ್ನಾ ಮಾಡಲಾಗುತ್ತದೆ.
ತಾಜ್ ಮಹಲ್ ಚಿತ್ರದ ಬಳಕೆ: ವಿಶೇಷವೆಂದರೆ, ಭಾರತೀಯ ವಲಸಿಗರನ್ನು ಸೆಳೆಯಲು ಅಮೆರಿಕದ ಹೋಮ್ಲ್ಯಾಂಡ್ ಸೆಕ್ಯೂರಿಟಿ ಇಲಾಖೆಯು ತನ್ನ ಅಧಿಕೃತ ಜಾಹೀರಾತಿನಲ್ಲಿ ತಾಜ್ ಮಹಲ್ ಚಿತ್ರವನ್ನು ಬಳಸಿ, “ಉಚಿತವಾಗಿ ಭಾರತಕ್ಕೆ ಹಾರಿ” (Fly to India for Free) ಎಂಬ ಸಂದೇಶ ನೀಡಿದೆ.
ಸರ್ಕಾರದ ಉದ್ದೇಶವೇನು?
ಒಬ್ಬ ಅಕ್ರಮ ವಲಸಿಗನನ್ನು ಬಂಧಿಸಿ, ಜೈಲಿನಲ್ಲಿಟ್ಟು ನಂತರ ಬಲವಂತವಾಗಿ ಗಡಿಪಾರು ಮಾಡಲು ಅಮೆರಿಕ ಸರ್ಕಾರಕ್ಕೆ ಸುಮಾರು 17,000 ಡಾಲರ್ (ಅಂದಾಜು 14 ಲಕ್ಷ ರೂ.) ಖರ್ಚಾಗುತ್ತದೆ. ಅದರ ಬದಲಿಗೆ, ವಲಸಿಗರಿಗೆ 2,600 ಡಾಲರ್ ಹಣ ನೀಡಿ ಕಳುಹಿಸುವುದು ಸರ್ಕಾರಕ್ಕೆ ಶೇ. 70ರಷ್ಟು ಲಾಭದಾಯಕವಾಗಿದೆ. ಅಲ್ಲದೆ, ಇದು ಅಮೆರಿಕದ ತೆರಿಗೆದಾರರ ಹಣವನ್ನು ಉಳಿಸುತ್ತದೆ ಎಂಬುದು ಟ್ರಂಪ್ ಸರ್ಕಾರದ ವಾದ.
