ಲಂಡನ್: ಇಂಗ್ಲೆಂಡ್ನ ಸಾಂಪ್ರದಾಯಿಕ ಕ್ರಿಕೆಟ್ ಹಂಗಾಮಿಗೂ ಪಶ್ಚಿಮ ಏಷ್ಯಾದಲ್ಲಿ ನಡೆಯುತ್ತಿರುವ ಸಂಘರ್ಷಕ್ಕೂ ನೇರ ಸಂಬಂಧವಿಲ್ಲ ಎಂದು ನೀವು ಭಾವಿಸಿದ್ದರೆ ಅದು ತಪ್ಪು! ಇರಾನ್ ಮತ್ತು ಅಮೆರಿಕ-ಇಸ್ರೇಲ್ ನಡುವಿನ ಯುದ್ಧದ ಪರಿಣಾಮವಾಗಿ, ಇಂಗ್ಲೆಂಡ್ನ ಮುಂಬರುವ ಕೌಂಟಿ ಕ್ರಿಕೆಟ್ ಮತ್ತು ಟೆಸ್ಟ್ ಪಂದ್ಯಗಳಿಗೆ ಬಳಸಲಾಗುವ ಪ್ರಸಿದ್ಧ ‘ಡ್ಯೂಕ್ಸ್’ (Dukes) ಕ್ರಿಕೆಟ್ ಬಾಲ್ಗಳ ಪೂರೈಕೆಯಲ್ಲಿ ಭಾರಿ ವ್ಯತ್ಯಯ ಉಂಟಾಗಿದೆ.
ಡ್ಯೂಕ್ಸ್ ಬಾಲ್ಗಳನ್ನು ತಯಾರಿಸುವ ಪ್ರಕ್ರಿಯೆ ವಿಶಿಷ್ಟವಾದುದು. ಬ್ರಿಟಿಷ್ ಹಸುಗಳ ಚರ್ಮವನ್ನು ಇಂಗ್ಲೆಂಡ್ನಲ್ಲಿ ಸಂಸ್ಕರಿಸಿ (Tanning), ಕೈಯಿಂದ ಹೊಲಿಯಲು (Hand-stitching) ಭಾರತ ಅಥವಾ ಪಾಕಿಸ್ತಾನದಂತಹ ದಕ್ಷಿಣ ಏಷ್ಯಾ ದೇಶಗಳಿಗೆ ಕಳುಹಿಸಲಾಗುತ್ತದೆ. ಅಲ್ಲಿಂದ ಸಿದ್ಧವಾದ ಬಾಲ್ಗಳನ್ನು ವಿಮಾನದ ಮೂಲಕ ಮರಳಿ ಇಂಗ್ಲೆಂಡ್ಗೆ ತರಬೇಕು.
ಪಶ್ಚಿಮ ಏಷ್ಯಾದಲ್ಲಿ ಕ್ಷಿಪಣಿ ದಾಳಿಗಳು ನಡೆಯುತ್ತಿರುವುದರಿಂದ, ವಿಮಾನಯಾನ ಸಂಸ್ಥೆಗಳು ಈ ಮಾರ್ಗದಲ್ಲಿ ಸರಕು ಸಾಗಿಸಲು ಹಿಂಜರಿಯುತ್ತಿವೆ. ಇದರಿಂದಾಗಿ ಲಕ್ಷಾಂತರ ಬಾಲ್ಗಳು ಕಾರ್ಖಾನೆಗಳಲ್ಲೇ ಉಳಿದುಕೊಂಡಿವೆ.
ಸಾಗಣೆ ವೆಚ್ಚವು ಕೆಜಿಗೆ 5 ಡಾಲರ್ನಿಂದ 15 ಡಾಲರ್ಗೆ (ಮೂರು ಪಟ್ಟು) ಏರಿಕೆಯಾಗಿದೆ. ಇದು ಕ್ರಿಕೆಟ್ ಬಾಲ್ಗಳ ಬೆಲೆ ಮತ್ತು ಲಭ್ಯತೆಯ ಮೇಲೆ ಗಂಭೀರ ಪರಿಣಾಮ ಬೀರಿದೆ.ಏಪ್ರಿಲ್ 3ರಿಂದ ಆರಂಭವಾಗಲಿರುವ ಕೌಂಟಿ ಚಾಂಪಿಯನ್ಶಿಪ್ಗೆ ಕೇವಲ ಶೇಕಡಾ 50ರಷ್ಟು ಬಾಲ್ಗಳು ಮಾತ್ರ ಪೂರೈಕೆಯಾಗಿವೆ. ಹೀಗಾಗಿ ಕ್ಲಬ್ಗಳಿಗೆ ಬಾಲ್ಗಳನ್ನು ‘ರೇಷನ್’ (ಮಿತವಾಗಿ) ನೀಡುವ ಪರಿಸ್ಥಿತಿ ಬಂದಿದೆ.
“ಯುದ್ಧದ ಈ ಅವಾಂತರದಿಂದಾಗಿ ದೊಡ್ಡ ಬಿಕ್ಕಟ್ಟು ಸೃಷ್ಟಿಯಾಗಿದೆ. ನಾನು ಮೊದಲೇ ತಿಳಿದಿದ್ದರೆ ಅಧ್ಯಕ್ಷ ಟ್ರಂಪ್ ಅವರೊಂದಿಗೆ ಮಾತನಾಡುತ್ತಿದ್ದೆ, ಕ್ರಿಕೆಟ್ ಸೀಸನ್ ಮುಗಿಯುವವರೆಗೆ ಯಾರ ಮೇಲೂ ದಾಳಿ ಮಾಡಬೇಡಿ ಎಂದು ಕೇಳಿಕೊಳ್ಳುತ್ತಿದ್ದೆ” ಎಂದು ಡ್ಯೂಕ್ಸ್ ಕಂಪನಿಯ ಮಾಲೀಕ ದಿಲೀಪ್ ಜಜೋಡಿಯಾ ವ್ಯಂಗ್ಯವಾಗಿ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.
