ಒಂದಾನೊಂದು ಕಾಲದಲ್ಲಿ ಬ್ಯಾಂಕ್ ಖಾತೆ ತೆರೆಯುವುದು ಎಂದರೆ ಗಂಟೆಗಟ್ಟಲೆ ಕ್ಯೂ ನಿಲ್ಲಬೇಕಾದ ದೊಡ್ಡ ಸಾಹಸವಾಗಿತ್ತು. ಆದರೆ ಈಗ ಡಿಜಿಟಲ್ ಕ್ರಾಂತಿಯಿಂದಾಗಿ, ನಿಮ್ಮ [Aadhaar Redacted] ಸಂಖ್ಯೆ ಇದ್ದರೆ ಸಾಕು, ಐದೇ ನಿಮಿಷದಲ್ಲಿ ಸ್ಮಾರ್ಟ್ಫೋನ್ ಮೂಲಕ ಖಾತೆ ತೆರೆಯಬಹುದು. ಕೆಲಸ ಬದಲಾದಾಗ ಹೊಸ ಸ್ಯಾಲರಿ ಅಕೌಂಟ್ ತೆರೆಯುವುದು ಅಥವಾ ಆಕರ್ಷಕ ಆಫರ್ಗಳಿಗಾಗಿ ವಿವಿಧ ಬ್ಯಾಂಕುಗಳಲ್ಲಿ ಖಾತೆ ಹೊಂದುವುದು ಇಂದಿನ ಫ್ಯಾಶನ್ ಆಗಿದೆ. ಆದರೆ, ಈ ‘ಮಲ್ಟಿಪಲ್ ಬ್ಯಾಂಕ್ ಅಕೌಂಟ್’ ಸಂಸ್ಕೃತಿ ನಿಮ್ಮ ಆರ್ಥಿಕ ಸ್ಥಿತಿಯನ್ನೇ ಬುಡಮೇಲು ಮಾಡಬಲ್ಲದು ಎಂಬ ಎಚ್ಚರಿಕೆ ನೀಡುತ್ತಿದ್ದಾರೆ ತಜ್ಞರು.
ಹೆಚ್ಚಿನ ಬ್ಯಾಂಕ್ ಖಾತೆಗಳಿಂದ ಆಗುವ ನಷ್ಟಗಳು ಇಲ್ಲಿವೆ:
1. ಕನಿಷ್ಠ ಮೊತ್ತದ (Minimum Balance) ಬಿಸಿ
ಖಾಸಗಿ ಬ್ಯಾಂಕುಗಳು ಕನಿಷ್ಠ ಮೊತ್ತ ಕಾಯ್ದುಕೊಳ್ಳುವ ವಿಷಯದಲ್ಲಿ ಬಹಳ ಕಟ್ಟುನಿಟ್ಟಾಗಿವೆ. ನಗರ ಪ್ರದೇಶಗಳಲ್ಲಿ ಈ ಮಿತಿ 5,000 ರೂ.ನಿಂದ 10,000 ರೂ.ವರೆಗೆ ಇರುತ್ತದೆ. ಉದಾಹರಣೆಗೆ, ನಿಮ್ಮ ಬಳಿ 5 ಖಾತೆಗಳಿದ್ದರೆ, ಕನಿಷ್ಠ ಮೊತ್ತವನ್ನು ಮೇಂಟೇನ್ ಮಾಡಲೆಂದೇ ನಿಮ್ಮ ಬಳಿ 50,000 ರೂ. ಇರಬೇಕಾಗುತ್ತದೆ. ಒಂದು ರೂಪಾಯಿ ಕಡಿಮೆಯಾದರೂ ಬ್ಯಾಂಕುಗಳು ಭಾರಿ ದಂಡ ವಿಧಿಸುತ್ತವೆ. ನಿಮಗೆ ತಿಳಿಯದಂತೆಯೇ ನಿಮ್ಮ ಹಣ ದಂಡದ ರೂಪದಲ್ಲಿ ಕರಗಿ ಹೋಗುತ್ತದೆ.
2. ವಾರ್ಷಿಕ ಶುಲ್ಕಗಳ ಹೊರೆ
ಪ್ರತಿ ಬ್ಯಾಂಕ್ ಖಾತೆಯೊಂದಿಗೆ ಡೆಬಿಟ್ ಕಾರ್ಡ್ ನೀಡಲಾಗುತ್ತದೆ. ಇದಕ್ಕೆ ವಾರ್ಷಿಕ ನಿರ್ವಹಣಾ ಶುಲ್ಕವಿರುತ್ತದೆ. ನೀವು ಕಾರ್ಡ್ ಬಳಸದಿದ್ದರೂ ಪ್ರತಿ ವರ್ಷ 150 ರೂ.ನಿಂದ 500 ರೂ.ವರೆಗೆ ಪಾವತಿಸಬೇಕಾಗುತ್ತದೆ. ಇದರ ಜೊತೆಗೆ ಎಸ್ಎಮ್ಎಸ್ ಅಲರ್ಟ್ ಶುಲ್ಕಗಳು ಹೆಚ್ಚುವರಿ. ಖಾತೆಗಳು ಹೆಚ್ಚಾದಂತೆ ಈ ಅನಗತ್ಯ ವೆಚ್ಚಗಳು ವರ್ಷಕ್ಕೆ ಸಾವಿರಾರು ರೂಪಾಯಿ ತಲುಪುತ್ತವೆ.
3. ಟ್ರ್ಯಾಕಿಂಗ್ ಮಾಡುವುದು ಅತಿ ಕಷ್ಟ
ಹೆಚ್ಚಿನ ಖಾತೆಗಳಿದ್ದಷ್ಟೂ ಪಾಸ್ವರ್ಡ್ಗಳು ಮತ್ತು ವಹಿವಾಟುಗಳ ದಾಖಲೆಗಳನ್ನು ನೆನಪಿಟ್ಟುಕೊಳ್ಳುವುದು ತಲೆನೋವಿನ ಕೆಲಸ. ಆದಾಯ ತೆರಿಗೆ ರಿಟರ್ನ್ಸ್ (ITR) ಸಲ್ಲಿಸುವಾಗ ಎಲ್ಲಾ ಖಾತೆಗಳ ಸ್ಟೇಟ್ಮೆಂಟ್ ಸಂಗ್ರಹಿಸುವುದು ದೊಡ್ಡ ಕಸರತ್ತೇ ಸರಿ. ಇದರಿಂದ ನಿಮ್ಮ ಒಟ್ಟು ಆದಾಯ ಮತ್ತು ಖರ್ಚಿನ ಮೇಲೆ ಸ್ಪಷ್ಟತೆ ಸಿಗದೆ, ಆರ್ಥಿಕ ಯೋಜನೆಗಳು ಹಳಿ ತಪ್ಪಬಹುದು.
4. ಸೈಬರ್ ಕ್ರಿಮಿನಲ್ಗಳಿಗೆ ಸುಲಭ ಗುರಿ
ಬಳಸದೆ ಬಿಟ್ಟಿರುವ ಖಾತೆಗಳು ಸೈಬರ್ ವಂಚಕರಿಗೆ ಪ್ರಿಯವಾದ ತಾಣಗಳು. ಹಳೆಯ ಖಾತೆಗಳ ಮೇಲೆ ನಾವು ನಿಗಾ ಇಟ್ಟಿರುವುದಿಲ್ಲ, ಹಾಗಾಗಿ ಅಲ್ಲಿ ನಡೆಯುವ ಅನುಮಾನಾಸ್ಪದ ವಹಿವಾಟುಗಳು ಕೂಡಲೇ ಗಮನಕ್ಕೆ ಬರುವುದಿಲ್ಲ. ಅಲ್ಲದೆ, ಹಲವಾರು ನೋಟಿಫಿಕೇಶನ್ಗಳ ನಡುವೆ ಅಸಲಿ ಯಾವುದು, ನಕಲಿ ಯಾವುದು ಎಂದು ಗುರುತಿಸುವುದು ಕಷ್ಟವಾಗುತ್ತದೆ.
5. ಸಿಬಿಲ್ (CIBIL) ಸ್ಕೋರ್ ಮೇಲೆ ಪ್ರಭಾವ
ಅನೇಕ ಖಾತೆಗಳಿದ್ದು, ಅವುಗಳಲ್ಲಿ ಕನಿಷ್ಠ ಮೊತ್ತವಿಲ್ಲದೆ ದಂಡ ಬೀಳುತ್ತಿದ್ದರೆ, ಅದು ನಿಮ್ಮ ಬ್ಯಾಂಕಿಂಗ್ ಇತಿಹಾಸದ ಮೇಲೆ ಕೆಟ್ಟ ಪರಿಣಾಮ ಬೀರುತ್ತದೆ. ಇದು ಭವಿಷ್ಯದಲ್ಲಿ ನಿಮ್ಮ ಕ್ರೆಡಿಟ್ ಸ್ಕೋರ್ ಅನ್ನು ಕುಗ್ಗಿಸಿ, ಸಾಲ ಪಡೆಯುವಾಗ ಅಡಚಣೆ ಉಂಟುಮಾಡಬಹುದು.
ನೀವು ಮಾಡಬೇಕಾದ ಆರ್ಥಿಕ ಶಿಸ್ತು ಕ್ರಮಗಳು:
ಪಟ್ಟಿ ಮಾಡಿ: ಪ್ರಸ್ತುತ ನಿಮ್ಮ ಹೆಸರಿನಲ್ಲಿ ಎಷ್ಟು ಬ್ಯಾಂಕ್ ಖಾತೆಗಳಿವೆ ಎಂಬುದನ್ನು ಮೊದಲು ಪಟ್ಟಿ ಮಾಡಿ.
ಅಗತ್ಯವಿರುವ ಖಾತೆ ಮಾತ್ರ ಇರಿಸಿ: ಸದ್ಯದ ಸ್ಯಾಲರಿ ಅಕೌಂಟ್ ಮತ್ತು ಒಂದು ಉಳಿತಾಯ ಖಾತೆ (Savings Account) ಇದ್ದರೆ ಸಾಕು.
ಹಳೆಯ ಖಾತೆಗಳನ್ನು ಮುಚ್ಚಿ: ಅನಗತ್ಯವಾಗಿರುವ ಅಥವಾ ಬಳಸದ ಖಾತೆಗಳನ್ನು ಕೂಡಲೇ ಬ್ಯಾಂಕಿಗೆ ಭೇಟಿ ನೀಡಿ ಮುಚ್ಚಿಸಿ.
ಆಟೋ ಡೆಬಿಟ್ ಪರಿಶೀಲಿಸಿ: ಯಾವುದಾದರೂ ಇನ್ಶೂರೆನ್ಸ್ ಅಥವಾ ಬಿಲ್ಗಳು ಹಳೆಯ ಖಾತೆಯಿಂದ ಕಟ್ ಆಗುತ್ತಿದ್ದರೆ, ಅವುಗಳನ್ನು ನಿಮ್ಮ ಮುಖ್ಯ ಖಾತೆಗೆ ಬದಲಾಯಿಸಿಕೊಳ್ಳಿ.
