ತಮಿಳುನಾಡಿನ ಪಶುಸಂಗೋಪನೆ, ಹೈನುಗಾರಿಕೆ ಮತ್ತು ಮೀನುಗಾರಿಕೆ ಇಲಾಖೆಯು ಕೋಳಿ, ಕಾಡು ಪಕ್ಷಿಗಳು ಮತ್ತು ಮನುಷ್ಯರಲ್ಲಿ ಹಕ್ಕಿ ಜ್ವರ ಹರಡುವುದನ್ನು ತಡೆಗಟ್ಟಲು ಜೈವಿಕ ಸುರಕ್ಷತೆ ಮತ್ತು ಮುನ್ನೆಚ್ಚರಿಕೆ ಕ್ರಮಗಳನ್ನು ವಿವರಿಸುವ ಸಲಹೆಯನ್ನು ನೀಡಿದೆ.
ಹಲವೆಡೆ ಕಾಗೆಗಳು ಹೆಚ್ಚಿನ ಸಂಖ್ಯೆಯಲ್ಲಿ ಸಾವನ್ನಪ್ಪುತ್ತಿರುವುದು ‘ಏವಿಯನ್ ಇನ್ಫ್ಲುಯೆಂಜಾ’ (ಹಕ್ಕಿ ಜ್ವರ) ಇರಬಹುದು ಎಂಬ ವರದಿಗಳ ಬೆನ್ನಲ್ಲೇ ಈ ಮುನ್ನೆಚ್ಚರಿಕೆ ಕ್ರಮಗಳು ಬಂದಿವೆ. ನಿವಾಸಿಗಳು ಜಾಗರೂಕರಾಗಿರಬೇಕು ಮತ್ತು ಸುರಕ್ಷತಾ ನಿಯಮಗಳನ್ನು ಪಾಲಿಸಬೇಕು ಎಂದು ಅಧಿಕಾರಿಗಳು ಒತ್ತಾಯಿಸಿದ್ದಾರೆ.
ತಮಿಳುನಾಡಿನ ಆರೋಗ್ಯ ಅಧಿಕಾರಿಗಳು, ವಿಶೇಷವಾಗಿ ಪಕ್ಷಿಗಳ ಸಂಪರ್ಕಕ್ಕೆ ಬಂದವರಲ್ಲಿ ಕೆಮ್ಮು, ಶೀತ, ಜ್ವರ ಅಥವಾ ಉಸಿರಾಟದ ತೊಂದರೆಯಂತಹ ಲಕ್ಷಣಗಳು ಕಂಡುಬಂದಲ್ಲಿ ತಕ್ಷಣ ವೈದ್ಯಕೀಯ ಚಿಕಿತ್ಸೆ ಪಡೆಯುವಂತೆ ಸಲಹೆ ನೀಡಿದ್ದಾರೆ.
ಹಕ್ಕಿ ಜ್ವರ ಎಂದರೇನು?
ಸಾಮಾನ್ಯವಾಗಿ ‘ಬರ್ಡ್ ಫ್ಲೂ’ ಎಂದು ಕರೆಯಲ್ಪಡುವ ಇದು ಒಂದು ರೀತಿಯ ಇನ್ಫ್ಲುಯೆಂಜಾ ವೈರಸ್ ಸೋಂಕಾಗಿದ್ದು, ಸಾಮಾನ್ಯವಾಗಿ ಪಕ್ಷಿಗಳು ಮತ್ತು ಇತರ ಪ್ರಾಣಿಗಳಲ್ಲಿ ಹರಡುತ್ತದೆ. ಕ್ಲೀವ್ಲ್ಯಾಂಡ್ ಕ್ಲಿನಿಕ್ ಪ್ರಕಾರ, ಸೋಂಕಿತ ಪ್ರಾಣಿಗಳಿಂದ ಮನುಷ್ಯರಿಗೆ ಹಕ್ಕಿ ಜ್ವರ ಹರಡಬಹುದು. ಸಾಮಾನ್ಯ ಜ್ವರದಂತೆ ಇದು ಕೂಡ ಮನುಷ್ಯರನ್ನು ತೀವ್ರವಾಗಿ ಅಸ್ವಸ್ಥಗೊಳಿಸಬಹುದು. ಆದರೆ, ಇದು ಮನುಷ್ಯರಿಂದ ಮನುಷ್ಯರಿಗೆ ಹರಡುವುದು ಅತ್ಯಂತ ವಿರಳ.
ಹಕ್ಕಿ ಜ್ವರದ ಹಿನ್ನೆಲೆಯಲ್ಲಿ, ಮೊಟ್ಟೆ ಮತ್ತು ಚಿಕನ್ನಂತಹ ದೈನಂದಿನ ಆಹಾರದ ಮೂಲಕ ವೈರಸ್ ಹರಡಬಹುದೇ ಎಂಬ ಆತಂಕ ಸಾರ್ವಜನಿಕರಲ್ಲಿದೆ. ಆದರೆ, ವಿಶ್ವದಾದ್ಯಂತದ ಆರೋಗ್ಯ ಸಂಸ್ಥೆಗಳು ಸರಿಯಾಗಿ ಬೇಯಿಸುವುದರಿಂದ ಈ ಅಪಾಯವನ್ನು ತಪ್ಪಿಸಬಹುದು ಮತ್ತು ಇವು ಸೇವನೆಗೆ ಸುರಕ್ಷಿತ ಎಂದು ಖಚಿತಪಡಿಸಿವೆ.
ಹಕ್ಕಿ ಜ್ವರ ಹೇಗೆ ಹರಡುತ್ತದೆ?
ಇನ್ಫ್ಲುಯೆಂಜಾ ಎ (Influenza A) ವೈರಸ್ಗಳಿಂದ ಈ ರೋಗ ಬರುತ್ತದೆ, ಅದರಲ್ಲಿ H5N1 ತಳಿಯು ಕೋಳಿಗಳಲ್ಲಿ ಹೆಚ್ಚು ಅಪಾಯಕಾರಿ. ಸೋಂಕಿತ ಪಕ್ಷಿಗಳ ಲಾಲಾರಸ, ಲೋಳೆ ಅಥವಾ ಮಲದೊಂದಿಗೆ ನೇರ ಸಂಪರ್ಕಕ್ಕೆ ಬಂದಾಗ ಇದು ಹರಡುತ್ತದೆ. ಕೋಳಿ ಫಾರ್ಮ್ಗಳಲ್ಲಿ ಕೆಲಸ ಮಾಡುವವರು ಅಥವಾ ಅನಾರೋಗ್ಯ ಪೀಡಿತ ಪಕ್ಷಿಗಳನ್ನು ನಿರ್ವಹಿಸುವವರು ದೀರ್ಘಕಾಲದವರೆಗೆ ಇವುಗಳ ಸಂಪರ್ಕಕ್ಕೆ ಬಂದಾಗ ಸೋಂಕಿಗೆ ಒಳಗಾಗುವ ಸಾಧ್ಯತೆ ಇರುತ್ತದೆ.
ಮಾರುಕಟ್ಟೆಯಲ್ಲಿ ದೊರೆಯುವ ಸಂಸ್ಕರಿಸಿದ ಕೋಳಿ ಉತ್ಪನ್ನಗಳಲ್ಲಿ ಈ ವೈರಸ್ ಬದುಕುಳಿಯುವುದಿಲ್ಲ. ಭಾರತದ ಆಹಾರ ಸುರಕ್ಷತೆ ಮತ್ತು ಗುಣಮಟ್ಟ ಪ್ರಾಧಿಕಾರ (FSSAI) ನಂತಹ ಸಂಸ್ಥೆಗಳು ಮಾರಾಟಕ್ಕೂ ಮುನ್ನ ಕೋಳಿಗಳನ್ನು ಕಟ್ಟುನಿಟ್ಟಾಗಿ ಪರೀಕ್ಷಿಸುತ್ತವೆ. ಬೇಯಿಸಿದ ಮೊಟ್ಟೆ ಅಥವಾ ಚಿಕನ್ ಸೇವನೆಯಿಂದ ಮನುಷ್ಯರಿಗೆ ಸೋಂಕು ತಗುಲಿದ ಯಾವುದೇ ಪ್ರಕರಣಗಳು ವರದಿಯಾಗಿಲ್ಲ.
ಚಿಕನ್ ಸೇವನೆಯಲ್ಲಿನ ಅಪಾಯ ಮತ್ತು ಸುರಕ್ಷತೆ
ಆರೋಗ್ಯವಂತ ಕೋಳಿಗಳ ಮಾಂಸದಿಂದ ಹಕ್ಕಿ ಜ್ವರದ ಭೀತಿ ಇರುವುದಿಲ್ಲ. ವೈರಸ್ ಮುಖ್ಯವಾಗಿ ಪಕ್ಷಿಗಳ ಉಸಿರಾಟ ಮತ್ತು ಜೀರ್ಣಾಂಗವ್ಯೂಹದಲ್ಲಿ ಇರುತ್ತದೆ. ಒಂದು ವೇಳೆ ಸೋಂಕಿತ ಮಾಂಸವಿದ್ದರೂ ಸಹ, ಚಿಕನ್ ಅನ್ನು ಕನಿಷ್ಠ 165 ಡಿಗ್ರಿ ಫ್ಯಾರನ್ಹೀಟ್ (74 ಡಿಗ್ರಿ ಸೆಲ್ಸಿಯಸ್) ತಾಪಮಾನದಲ್ಲಿ ಬೇಯಿಸಿದರೆ ವೈರಸ್ ಸಂಪೂರ್ಣವಾಗಿ ನಾಶವಾಗುತ್ತದೆ.
ಮುನ್ನೆಚ್ಚರಿಕೆಗಳು:
* ಮಾಂಸದ ಒಳಗಿನ ಭಾಗವು ಸಂಪೂರ್ಣವಾಗಿ ಬೆಂದಿದೆಯೇ ಎಂದು ಖಚಿತಪಡಿಸಿಕೊಳ್ಳಿ (ಕೆಂಪು ಅಥವಾ ಗುಲಾಬಿ ಬಣ್ಣ ಇರಬಾರದು).
* ಫ್ರೀಜರ್ನಿಂದ ತೆಗೆದ ಚಿಕನ್ ಅನ್ನು ಕೋಣೆಯ ತಾಪಮಾನದಲ್ಲಿ ಬಿಡುವ ಬದಲು ಫ್ರಿಡ್ಜ್ನಲ್ಲಿಯೇ ಕರಗಿಸಿ (Thaw), ಇದು ಬ್ಯಾಕ್ಟೀರಿಯಾ ಬೆಳವಣಿಗೆಯನ್ನು ತಡೆಯುತ್ತದೆ.
ಮೊಟ್ಟೆ ಸೇವನೆಯಲ್ಲಿನ ಅಪಾಯ ಮತ್ತು ಸುರಕ್ಷತೆ
ಸೋಂಕಿತ ಕೋಳಿಗಳು ಇಟ್ಟ ಮೊಟ್ಟೆಗಳ ಚಿಪ್ಪಿನ ಮೇಲೆ ಅಥವಾ ಅಪರೂಪಕ್ಕೆ ಒಳಗಿನ ಭಾಗದಲ್ಲಿ ವೈರಸ್ ಇರಬಹುದು. ಆದರೆ, ವಾಣಿಜ್ಯ ಬಳಕೆಯ ಮೊಟ್ಟೆಗಳನ್ನು ತೊಳೆಯುವ ಮತ್ತು ಪಾಶ್ಚರೀಕರಣ (Pasteurisation) ಪ್ರಕ್ರಿಯೆಗೆ ಒಳಪಡಿಸುವುದರಿಂದ ಅಪಾಯ ಕಡಿಮೆ ಇರುತ್ತದೆ. ಮೊಟ್ಟೆಯ ಹಳದಿ ಲೋಳೆಯು ಗಟ್ಟಿಯಾಗುವವರೆಗೆ ಬೇಯಿಸುವುದರಿಂದ (165 ಡಿಗ್ರಿ ಫ್ಯಾರನ್ಹೀಟ್) ಯಾವುದೇ ಲೈವ್ ವೈರಸ್ ಬದುಕುಳಿಯುವುದಿಲ್ಲ.
ಮುನ್ನೆಚ್ಚರಿಕೆಗಳು:
* ರನ್ನಿ ಯೋಕ್ (ಅರ್ಧಂಬರ್ಧ ಬೇಯಿಸಿದ) ಅಥವಾ ಹಸಿ ಮೊಟ್ಟೆಗಳನ್ನು ಬಳಸಿ ಮಾಡುವ ಮಯೋನೇಸ್ ಇವುಗಳನ್ನು ತಪ್ಪಿಸುವುದು ಉತ್ತಮ.
* ಮೊಟ್ಟೆಯ ಹಳದಿ ಮತ್ತು ಬಿಳಿ ಭಾಗ ಗಟ್ಟಿಯಾಗುವವರೆಗೆ ಫ್ರೈ ಮಾಡಿ ಅಥವಾ ಬೇಯಿಸಿ.
* ಒಡೆದ ಚಿಪ್ಪಿನ ಮೊಟ್ಟೆಗಳನ್ನು ಬಳಸಬೇಡಿ.
ಗ್ರಾಹಕರಿಗೆ ತಡೆಗಟ್ಟುವ ಕ್ರಮಗಳು
* ನೈರ್ಮಲ್ಯ: ಹಸಿ ಮಾಂಸ ಅಥವಾ ಮೊಟ್ಟೆಗಳನ್ನು ಮುಟ್ಟಿದ ನಂತರ 20 ಸೆಕೆಂಡುಗಳ ಕಾಲ ಕೈಗಳನ್ನು ಚೆನ್ನಾಗಿ ತೊಳೆಯಿರಿ.
* ಸರಿಯಾಗಿ ಬೇಯಿಸಿ: ಅರೆಬರೆ ಬೇಯಿಸಿದ ಚಿಕನ್ ಅಥವಾ ಸಾಫ್ಟ್ ಬೋಯಿಲ್ಡ್ ಮೊಟ್ಟೆಗಳನ್ನು ತಿನ್ನಬೇಡಿ.
* ಮೂಲವನ್ನು ಪರಿಶೀಲಿಸಿ: ಸರ್ಕಾರದ ಮಾರ್ಗಸೂಚಿಗಳನ್ನು ಪಾಲಿಸುವ ಅಂಗಡಿಗಳಿಂದ ಮಾತ್ರ ಮಾಂಸ ಖರೀದಿಸಿ.
* ಹಸಿ ಆಹಾರ ಬೇಡ: ರೋಗನಿರೋಧಕ ಶಕ್ತಿ ಕಡಿಮೆ ಇರುವವರು ಹಸಿ ಹಿಟ್ಟು ಅಥವಾ ಪಾಶ್ಚರೀಕರಿಸದ ಆಹಾರಗಳನ್ನು ಸೇವಿಸಬೇಡಿ.
