ನವದೆಹಲಿ: ಅಮೆರಿಕ ಮತ್ತು ಇರಾನ್ ನಡುವೆ ಯುದ್ಧದ ಕಾರ್ಮೋಡ ಕವಿದಿರುವುದು ಮತ್ತು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಎಲ್ಲಾ ಆಮದುಗಳ ಮೇಲೆ ಶೇ. 15ರಷ್ಟು ಜಾಗತಿಕ ಸುಂಕವನ್ನು ಘೋಷಿಸಿರುವುದು ಹೂಡಿಕೆದಾರರಲ್ಲಿ ಆತಂಕ ಮೂಡಿಸಿದೆ. ಸುರಕ್ಷಿತ ಹೂಡಿಕೆಯಾಗಿ ಜನರು ಚಿನ್ನ ಮತ್ತು ಬೆಳ್ಳಿಯತ್ತ ಮುಖ ಮಾಡಿರುವುದರಿಂದ ಬೆಲೆಗಳು ಗಗನಕ್ಕೇರಿವೆ.
ಇಂದಿನ ಬೆಲೆಗಳ ಅಂಕಿ-ಅಂಶ:
ಚಿನ್ನ (MCX Gold): ಇಂದು ಬೆಳಿಗ್ಗೆ MCX ನಲ್ಲಿ ಏಪ್ರಿಲ್ ಗೋಲ್ಡ್ ಫ್ಯೂಚರ್ಸ್ 10 ಗ್ರಾಂಗೆ 1,60,600 ರೂ. ತಲುಪಿದೆ. ಇದು ಶುಕ್ರವಾರದ ದರಕ್ಕಿಂತ ಸುಮಾರು 3,700 ರೂ. (ಶೇ. 2.4) ಹೆಚ್ಚಾಗಿದೆ.
ಬೆಳ್ಳಿ (MCX Silver): ಬೆಳ್ಳಿಯ ಬೆಲೆ ಶೇ. 6ರಷ್ಟು ಅಂದರೆ ಕಿಲೋಗೆ ಬರೋಬ್ಬರಿ 15,200 ರೂ. ಏರಿಕೆಯಾಗಿದ್ದು, 2,68,120 ರೂ. ಆಸುಪಾಸಿನಲ್ಲಿ ವಹಿವಾಟು ನಡೆಸುತ್ತಿದೆ.
ಜಾಗತಿಕ ಮಾರುಕಟ್ಟೆ (COMEX): ಅಂತರಾಷ್ಟ್ರೀಯ ಮಾರುಕಟ್ಟೆಯಲ್ಲೂ ಚಿನ್ನವು ಔನ್ಸ್ಗೆ 5,189.60 ಡಾಲರ್ ಮತ್ತು ಬೆಳ್ಳಿಯು 87.50 ಡಾಲರ್ ತಲುಪಿದೆ.
ಬೆಲೆ ಏರಿಕೆಗೆ ಪ್ರಮುಖ ಕಾರಣಗಳೇನು?
ಅಮೆರಿಕ-ಇರಾನ್ ಯುದ್ಧದ ಭೀತಿ:
ಇರಾನ್ ಪರಮಾಣು ಒಪ್ಪಂದದ ಬಗ್ಗೆ ಸರಿಯಾದ ಮಾತುಕತೆ ನಡೆಸದಿದ್ದರೆ ಯುದ್ಧ ಅನಿವಾರ್ಯ ಎಂದು ಟ್ರಂಪ್ ಎಚ್ಚರಿಸಿದ್ದಾರೆ. ಇದಕ್ಕೆ ಪೂರಕವಾಗಿ ಅಮೆರಿಕ ತನ್ನ ಬೃಹತ್ ಯುದ್ಧನೌಕೆಗಳಾದ ‘ಯುಎಸ್ಎಸ್ ಅಬ್ರಹಾಂ ಲಿಂಕನ್’ ಮತ್ತು ಅತ್ಯಂತ ಅಪಾಯಕಾರಿ ಅಣುಶಕ್ತಿ ಚಾಲಿತ ‘ಯುಎಸ್ಎಸ್ ಗೆರಾಲ್ಡ್ ಆರ್ ಫೋರ್ಡ್’ ಅನ್ನು ಮಧ್ಯಪ್ರಾಚ್ಯದಲ್ಲಿ ನಿಯೋಜಿಸಿದೆ. ಇದು ಜಾಗತಿಕ ಮಾರುಕಟ್ಟೆಯಲ್ಲಿ ಸಂಚಲನ ಮೂಡಿಸಿದೆ.
ಟ್ರಂಪ್ ಅವರ 15% ಸುಂಕದ ಘೋಷಣೆ:
ಜಾಗತಿಕ ವ್ಯಾಪಾರದಲ್ಲಿ ಅಸ್ಥಿರತೆ ಉಂಟಾಗಿದೆ. ಅಮೆರಿಕದ ಸುಪ್ರೀಂ ಕೋರ್ಟ್ ಟ್ರಂಪ್ ಅವರ ಸುಂಕದ ನಿರ್ಧಾರವನ್ನು ಕಾನೂನುಬಾಹಿರ ಎಂದರೂ ಸಹ, ಟ್ರಂಪ್ ಅದನ್ನು ಮೊದಲು ಶೇ. 10ಕ್ಕೆ ಸಹಿ ಮಾಡಿ, ನಂತರ ಶನಿವಾರ ಅದನ್ನು ಶೇ. 15ಕ್ಕೆ ಏರಿಸಿದ್ದಾರೆ. ಇದರಿಂದ ಜಾಗತಿಕ ವ್ಯಾಪಾರದಲ್ಲಿ ಅನಿಶ್ಚಿತತೆ ಮೂಡಿದೆ.
ಸಂಕಷ್ಟದ ಸಮಯದಲ್ಲಿ ಹೂಡಿಕೆದಾರರ ಮೊದಲ ಆಯ್ಕೆ ಚಿನ್ನವೇಕೆ?
ನಂಬಿಕಸ್ತ ಇತಿಹಾಸ: ಯುದ್ಧ ಅಥವಾ ಆರ್ಥಿಕ ಕುಸಿತದ ಸಮಯದಲ್ಲಿ ಕಂಪನಿಗಳು ದಿವಾಳಿಯಾಗಬಹುದು, ಷೇರು ಮಾರುಕಟ್ಟೆ ಕುಸಿಯಬಹುದು. ಆದರೆ, ಚಿನ್ನದ ಮೌಲ್ಯವು ಕುಸಿಯುವ ಬದಲು ಹೆಚ್ಚಾಗುತ್ತದೆ ಎಂಬುದು ಇತಿಹಾಸ ಸಾಬೀತುಪಡಿಸಿದೆ.
ಷೇರು ಮಾರುಕಟ್ಟೆ ವಿರುದ್ಧದ ಸಂಬಂಧ: ಸಾಮಾನ್ಯವಾಗಿ ಷೇರು ಮಾರುಕಟ್ಟೆ ಕುಸಿದಾಗ ಚಿನ್ನದ ಮಾರುಕಟ್ಟೆ ಚೇತರಿಸಿಕೊಳ್ಳುತ್ತದೆ. ಹೂಡಿಕೆದಾರರು ತಮ್ಮ ನಷ್ಟವನ್ನು ಸರಿದೂಗಿಸಲು ಷೇರುಗಳನ್ನು ಮಾರಿ ಚಿನ್ನದ ಮೇಲೆ ಹೂಡಿಕೆ ಮಾಡುತ್ತಾರೆ.
ಹಣದುಬ್ಬರಕ್ಕೆ ರಕ್ಷಣೆ: ಹಣದುಬ್ಬರ ಹೆಚ್ಚಾದಾಗ ಹಣದ ಮೌಲ್ಯ ಕಡಿಮೆಯಾಗುತ್ತದೆ, ಆದರೆ ಚಿನ್ನದ ಬೆಲೆ ಏರುವುದರಿಂದ ಜನರ ಖರೀದಿ ಸಾಮರ್ಥ್ಯ ಹಾಗೆಯೇ ಉಳಿಯುತ್ತದೆ.
ತಕ್ಷಣದ ನಗದು: ಚಿನ್ನವನ್ನು ಯಾವುದೇ ಕ್ಷಣದಲ್ಲಿ ಮಾರಿ ಹಣವನ್ನು ಪಡೆಯಬಹುದು, ಇದು ತುರ್ತು ಸಂದರ್ಭಗಳಲ್ಲಿ ಬಹಳ ಸಹಕಾರಿ.
