ನವದೆಹಲಿ: ಭಾರತದ ಮೋಸ್ಟ್ ವಾಂಟೆಡ್ ಉಗ್ರ, ಜೈಶ್-ಎ-ಮೊಹಮ್ಮದ್ ಸಂಘಟನೆಯ ಮುಖ್ಯಸ್ಥ ಮಸೂದ್ ಅಜರ್ನ ಹಿರಿಯ ಸಹೋದರ ಮೊಹಮ್ಮದ್ ತಾಹಿರ್ ಅನ್ವರ್ ಪಾಕಿಸ್ತಾನದ ಬಹಾವಲ್ಪುರದಲ್ಲಿ ನಿಗೂಢ ಸಂದರ್ಭದಲ್ಲಿ ಸಾವನ್ನಪ್ಪಿದ್ದಾನೆ. ಈತನ ಸಾವಿನ ಬಗ್ಗೆ ಜೈಶ್ ಸಂಘಟನೆಯ ಅಧಿಕೃತ ಚಾನೆಲ್ಗಳ ಮೂಲಕ ಮಾಹಿತಿ ಹೊರಬಿದ್ದಿದ್ದು, ಸಾವಿಗೆ ನಿಖರ ಕಾರಣವೇನು ಎಂಬುದು ಇನ್ನು ತಿಳಿದುಬಂದಿಲ್ಲ.
ತಾಹಿರ್ ಅನ್ವರ್ನ ಸಾವಿನ ಬಗ್ಗೆ ಸಂಘಟನೆಯು ಅಧಿಕೃತವಾಗಿ ಘೋಷಣೆ ಮಾಡಿದ್ದರೂ, ಆತ ಯಾವುದಾದರೂ ಕಾಯಿಲೆಯಿಂದ ಮೃತಪಟ್ಟಿದ್ದಾನೆಯೇ ಅಥವಾ ಹತ್ಯೆಗೀಡಾಗಿದ್ದಾನೆಯೇ ಎಂಬ ಬಗ್ಗೆ ಯಾವುದೇ ಸ್ಪಷ್ಟನೆ ನೀಡಿಲ್ಲ. ಸೋಮವಾರ ರಾತ್ರಿ ಬಹಾವಲ್ಪುರದ ಜಾಮಿಯಾ ಮಸೀದಿಯಲ್ಲಿ ಈತನ ಅಂತ್ಯಕ್ರಿಯೆ ನಡೆದಿದೆ ಎಂದು ವರದಿಯಾಗಿದೆ.
ಮಸೂದ್ ಅಜರ್ನ ಐವರು ಸಹೋದರರಲ್ಲಿ ತಾಹಿರ್ ಅನ್ವರ್ ಒಬ್ಬನಾಗಿದ್ದು, ಜೈಶ್ ಸಂಘಟನೆಯ ಸಶಸ್ತ್ರ ಕೆಡರ್ಗಳನ್ನು ಮುನ್ನಡೆಸುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತಿದ್ದ. ಬಹಾವಲ್ಪುರದಲ್ಲಿರುವ ಜೈಶ್ನ ಪ್ರಮುಖ ಕೇಂದ್ರವಾದ ‘ಮರ್ಕಜ್ ಉಸ್ಮಾನ್-ಒ-ಅಲಿ’ಯ ಮುಖ್ಯಸ್ಥನಾಗಿಯೂ ಈತ ಕಾರ್ಯನಿರ್ವಹಿಸುತ್ತಿದ್ದ.
ಕಳೆದ ವರ್ಷ (2025) ಭಾರತೀಯ ಸೇನೆಯು ನಡೆಸಿದ್ದ ‘ಆಪರೇಷನ್ ಸಿಂದೂರ್’ ವೈಮಾನಿಕ ದಾಳಿಯಲ್ಲಿ ಮಸೂದ್ ಅಜರ್ನ ಕುಟುಂಬದ ಸುಮಾರು 10 ಮಂದಿ ಸದಸ್ಯರು ಹತರಾಗಿದ್ದರು. ಆ ದಾಳಿಯ ನಂತರ ಸಂಘಟನೆಯಲ್ಲಿ ಉಳಿದಿದ್ದ ಪ್ರಮುಖ ನಾಯಕರಲ್ಲಿ ತಾಹಿರ್ ಅನ್ವರ್ ಕೂಡ ಒಬ್ಬನಾಗಿದ್ದ.
ಮಸೂದ್ ಅಜರ್ನ ಕುಟುಂಬದ ಸದಸ್ಯರು ಮತ್ತು ಆತನ ಆಪ್ತರು ಒಬ್ಬೊಬ್ಬರಾಗಿ ಹತರಾಗುತ್ತಿರುವುದು ಜೈಶ್ ಸಂಘಟನೆಯ ನಾಯಕತ್ವದಲ್ಲಿ ದೊಡ್ಡ ಶೂನ್ಯವನ್ನು ಸೃಷ್ಟಿಸಿದೆ.
