ಈ ಚೀನಾ ಕಂಪನಿಗೆ ಒಂದು ಸಾಧಾರಣ ಹಬ್ಬದ ಉಡುಗೊರೆ ಅಥವಾ ರೆಸ್ಟೋರೆಂಟ್ ವೋಚರ್ ನೀಡುವುದು ಸಾಲದಾಗಿತ್ತು; ಬದಲಾಗಿ, ತನ್ನ ಉದ್ಯೋಗಿಗಳ ವರ್ಷಾಂತ್ಯದ ಬೋನಸ್ ಅನ್ನು ಇದು ಒಂದು ಹೊಸ ಮಟ್ಟಕ್ಕೇ ಕೊಂಡೊಯ್ದಿದೆ.
ತನ್ನ ವಿಚಿತ್ರ ಶೈಲಿ ಮತ್ತು ಅಪಾರ ಉದಾರತೆಯಿಂದ ಅಂತರಾಷ್ಟ್ರೀಯ ಮಟ್ಟದಲ್ಲಿ ಗಮನ ಸೆಳೆದಿರುವ ಚೀನಾದ ಕಂಪನಿಯೊಂದರ ಸಂಸ್ಥಾಪಕರು, ತಮ್ಮ ಇತ್ತೀಚಿನ ಆರ್ಥಿಕ ಯಶಸ್ಸನ್ನು ಉದ್ಯೋಗಿಗಳ ಪಾಲಿನ ‘ಹಣದ ಹಬ್ಬ’ವನ್ನಾಗಿ ಪರಿವರ್ತಿಸಿದ್ದಾರೆ. ‘ಹೆನಾನ್ ಕುವಾಂಗ್ಶಾನ್ ಕ್ರೇನ್’ (Henan Kuangshan Crane Co.) ಕಂಪನಿಯ ಸಂಸ್ಥಾಪಕ ಚೂ ಪೀಜುನ್ (Cui Peijun) ಅವರು ಸುಮಾರು 26 ಮಿಲಿಯನ್ ಯುಎಸ್ ಡಾಲರ್ (ಅಂದರೆ 236 ಕೋಟಿ ರೂಪಾಯಿ) ಮೊತ್ತದ ನಗದನ್ನು ಬಾಚಿಕೊಳ್ಳಲು (Cash Dash) ತಮ್ಮ ಉದ್ಯೋಗಿಗಳಿಗೆ ಆಹ್ವಾನ ನೀಡಿದ್ದರು.
’ಸೌತ್ ಚೈನಾ ಮಾರ್ನಿಂಗ್ ಪೋಸ್ಟ್’ ವರದಿಯ ಪ್ರಕಾರ, ಈ ಘಟನೆಯು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದ್ದು, ನೆಟ್ಟಿಗರಲ್ಲಿ ಅಸೂಯೆ ಹುಟ್ಟಿಸಿದೆ. ಕಣ್ಣು ಕೋರೈಸುವ ಈ ಕಾರ್ಯಕ್ರಮದಲ್ಲಿ ಕೋಟಿ ಕೋಟಿ ಹಣವನ್ನು ನಗದು ರೂಪದಲ್ಲೇ ಹಂಚಲಾಯಿತು.
ಕಂಪನಿಯ ಶೇ. 70ರಷ್ಟು ಲಾಭವೇ ಬೋನಸ್!
ಕಂಪನಿಯ ಯಶಸ್ಸನ್ನು ಆಚರಿಸಲು ಆಯೋಜಿಸಲಾಗಿದ್ದ ಈ ಅದ್ಧೂರಿ ಸಮಾರಂಭದಲ್ಲಿ ಸುಮಾರು 7,000 ಉದ್ಯೋಗಿಗಳಿಗೆ ಆಸನದ ವ್ಯವಸ್ಥೆ ಮಾಡಲು 800 ಭೋಜನದ ಮೇಜುಗಳನ್ನು (Banquet tables) ಹಾಕಲಾಗಿತ್ತು.
ಕಂಪನಿಯು ಒಟ್ಟು 180 ಮಿಲಿಯನ್ ಯುವಾನ್ (ಸುಮಾರು 236 ಕೋಟಿ ರೂ.) ಮೊತ್ತವನ್ನು ವರ್ಷಾಂತ್ಯದ ಬೋನಸ್ ಆಗಿ ವಿತರಿಸಿದೆ. ಈ ಬೃಹತ್ ಮೊತ್ತವು ಕಂಪನಿಯ ಒಟ್ಟು ವಾರ್ಷಿಕ ಲಾಭವಾದ 270 ಮಿಲಿಯನ್ ಯುವಾನ್ಗಳಲ್ಲಿ (ಸುಮಾರು 357 ಕೋಟಿ ರೂ.) ಶೇಕಡಾ 70 ರಷ್ಟಿದೆ ಎಂಬುದು ಗಮನಾರ್ಹ!
ಹಣ ಎಣಿಸುವ ಸವಾಲು: ಎಣಿಸಿದಷ್ಟು ನಿಮ್ಮದೇ!
ವರದಿಯ ಪ್ರಕಾರ, ಈ ಕಾರ್ಯಕ್ರಮದ ಪ್ರಮುಖ ಆಕರ್ಷಣೆಯೆಂದರೆ ವೇದಿಕೆಯ ಮೇಲೆ ನಡೆದ ‘ಹಣ ಎಣಿಸುವ ಸ್ಪರ್ಧೆ’. ನಿಯಮದಂತೆ, ನಿಗದಿತ ಸಮಯದೊಳಗೆ ಉದ್ಯೋಗಿಗಳು ಕೈಯಿಂದ ಎಷ್ಟು ಹಣವನ್ನು ಎಣಿಸುತ್ತಾರೋ, ಅಷ್ಟೂ ಹಣವನ್ನು ಅವರು ಮನೆಗೆ ಕೊಂಡೊಯ್ಯಲು ಅನುಮತಿ ನೀಡಲಾಗಿತ್ತು.
ಆನ್ಲೈನ್ನಲ್ಲಿ ಹರಿದಾಡುತ್ತಿರುವ ವೀಡಿಯೊಗಳಲ್ಲಿ, ಉದ್ದನೆಯ ಮೇಜುಗಳ ಮೇಲೆ ರಾಶಿ ಹಾಕಲಾದ ನೋಟುಗಳ ಕಟ್ಟುಗಳನ್ನು ಉದ್ಯೋಗಿಗಳು ತರಾತುರಿಯಲ್ಲಿ ಜೋಡಿಸುತ್ತಿರುವುದು ಮತ್ತು ತಾವು ಗೆದ್ದ ಭಾರೀ ಹಣದ ಬಂಡಲ್ಗಳನ್ನು ಹೊತ್ತೊಯ್ಯಲು ಕಷ್ಟಪಡುತ್ತಿರುವುದು ಕಂಡುಬಂದಿದೆ.
💰 Fou .. !
Une entreprise chinoise de grues a distribué 26 millions $ en cash à ses 7 000 employés lors de son gala annuel.
💸 Le concept : des piles de billets sur 800 tables et un concours de comptage. Ceux qui comptaient juste repartaient avec le butin ! 🇨🇳 pic.twitter.com/wEPmxwnuK2— ONG_la_VIE 🇨🇮 (@ONG_la_VIE) February 25, 2026
