ಗೇಟ್ಸ್ ಫೌಂಡೇಶನ್ ಸಿಬ್ಬಂದಿಯೊಂದಿಗೆ ನಡೆದ ಮುಕ್ತ ಸಂವಾದದಲ್ಲಿ (Town hall), ಬಿಲ್ ಗೇಟ್ಸ್ ಅವರು ಕಳಂಕಿತ ಹಣಕಾಸು ವ್ಯವಹಾರಸ್ಥ ಜೆಫ್ರಿ ಎಪ್ಸ್ಟೀನ್ ಜೊತೆ ಸಂಬಂಧ ಹೊಂದಿದ್ದು ತಾವು ಮಾಡಿದ ‘ದೊಡ್ಡ ತಪ್ಪು’ ಎಂದು ಒಪ್ಪಿಕೊಂಡಿದ್ದಾರೆ. ಇದೇ ವೇಳೆ, ಎಪ್ಸ್ಟೀನ್ ಎಸಗಿದ ಯಾವುದೇ ಅಪರಾಧಗಳಲ್ಲಿ ತಮ್ಮ ಪಾಲ್ಗೊಳ್ಳುವಿಕೆ ಇರುವುದನ್ನು ಅವರು ಸ್ಪಷ್ಟವಾಗಿ ನಿರಾಕರಿಸಿದ್ದಾರೆ.
’ವಾಲ್ ಸ್ಟ್ರೀಟ್ ಜರ್ನಲ್’ ಪರಿಶೀಲಿಸಿದ ಮಂಗಳವಾರದ ಆಂತರಿಕ ಸಭೆಯ ರೆಕಾರ್ಡಿಂಗ್ ಪ್ರಕಾರ, ಎಪ್ಸ್ಟೀನ್ ಜೊತೆಗಿನ ತಮ್ಮ ಹಳೆಯ ಸಂಬಂಧವು ಫೌಂಡೇಶನ್ನ ಕೆಲಸದ ಮೇಲೆ ಕರಿನೆರಳು ಬೀರಿದ್ದಕ್ಕೆ ಗೇಟ್ಸ್ ವಿಷಾದ ವ್ಯಕ್ತಪಡಿಸಿದ್ದಾರೆ. ತಮ್ಮ ಕ್ರಿಯೆಗಳಿಗೆ ತಾವೇ ಜವಾಬ್ದಾರರೆಂದು ಹೇಳಿದ ಮೈಕ್ರೋಸಾಫ್ಟ್ ಸಹ-ಸಂಸ್ಥಾಪಕರು, ಇದರಿಂದ ತೊಂದರೆಗೊಳಗಾದವರಲ್ಲಿ ಕ್ಷಮೆ ಯಾಚಿಸಿದ್ದಾರೆ.
ಅಪ್ರಾಪ್ತ ಬಾಲಕಿಯರ ಲೈಂಗಿಕ ಸಾಗಣೆ ಆರೋಪದ ಮೇಲೆ ವಿಚಾರಣೆ ಎದುರಿಸುತ್ತಿದ್ದಾಗ 2019 ರಲ್ಲಿ ನ್ಯೂಯಾರ್ಕ್ ಜೈಲಿನಲ್ಲಿ ಮೃತಪಟ್ಟ ಜೆಫ್ರಿ ಎಪ್ಸ್ಟೀನ್ ಪ್ರಕರಣದ ತನಿಖೆಯ ಭಾಗವಾಗಿ, ಅಮೆರಿಕದ ನ್ಯಾಯಾಂಗ ಇಲಾಖೆಯು ಇತ್ತೀಚೆಗೆ ಬಿಡುಗಡೆ ಮಾಡಿದ ದಾಖಲೆಗಳಲ್ಲಿ ಹೆಸರು ಉಲ್ಲೇಖವಾಗಿರುವ ಗಣ್ಯರಲ್ಲಿ ಬಿಲ್ ಗೇಟ್ಸ್ ಕೂಡ ಒಬ್ಬರು.
’ನಾನು ಯಾವುದೇ ಅಕ್ರಮಗಳನ್ನು ನೋಡಿಲ್ಲ’
ಸಭೆಯಲ್ಲಿ 70 ವರ್ಷದ ಗೇಟ್ಸ್ ಅವರು ತಮಗೆ ಎರಡು ಅಕ್ರಮ ಸಂಬಂಧಗಳಿದ್ದವು ಎಂದು ಒಪ್ಪಿಕೊಂಡಿದ್ದಾರೆ, ಆದರೆ ಎಪ್ಸ್ಟೀನ್ ಅವರ ಕ್ರಿಮಿನಲ್ ಕೃತ್ಯಗಳಿಗೂ ತಮಗೂ ಯಾವುದೇ ಸಂಬಂಧವಿಲ್ಲ ಎಂದು ದೃಢವಾಗಿ ನಿರಾಕರಿಸಿದ್ದಾರೆ. “ನಾನು ಯಾವುದೇ ಅಕ್ರಮ ಕೆಲಸ ಮಾಡಿಲ್ಲ, ಅಂತಹ ಯಾವುದೇ ಕೃತ್ಯಗಳನ್ನು ನಾನು ನೋಡಿಲ್ಲ,” ಎಂದು ಅವರು ಫೌಂಡೇಶನ್ಗೆ ತಿಳಿಸಿದ್ದಾರೆ.
”ನನಗೆ ಅಕ್ರಮ ಸಂಬಂಧಗಳಿದ್ದವು, ಒಂದು ಬ್ರಿಡ್ಜ್ ಕ್ರೀಡೆಯ ಈವೆಂಟ್ಗಳಲ್ಲಿ ಭೇಟಿಯಾದ ರಷ್ಯಾದ ಬ್ರಿಡ್ಜ್ ಆಟಗಾರ್ತಿಯೊಂದಿಗೆ ಮತ್ತು ಇನ್ನೊಂದು ವ್ಯವಹಾರದ ಸಮಯದಲ್ಲಿ ಭೇಟಿಯಾದ ರಷ್ಯಾದ ಪರಮಾಣು ಭೌತವಿಜ್ಞಾನಿಯೊಂದಿಗೆ,” ಎಂದು ಬಿಲ್ ಗೇಟ್ಸ್ ಹೇಳಿದ್ದಾರೆ.
ಪ್ರಾಪ್ತ ವಯಸ್ಕರಲ್ಲದವರನ್ನು ವೇಶ್ಯಾವಾಟಿಕೆಗೆ ಬಳಸಿಕೊಂಡ ಆರೋಪದ ಮೇಲೆ ಎಪ್ಸ್ಟೀನ್ ತಪ್ಪೊಪ್ಪಿಕೊಂಡ ಮೂರು ವರ್ಷಗಳ ನಂತರ, ಅಂದರೆ 2011 ರಲ್ಲಿ ಅವರೊಂದಿಗೆ ಸಂಪರ್ಕ ಆರಂಭವಾಯಿತು ಎಂದು ಗೇಟ್ಸ್ ಸಿಬ್ಬಂದಿಗೆ ತಿಳಿಸಿದರು. ಎಪ್ಸ್ಟೀನ್ ಅವರ ಪ್ರಯಾಣವನ್ನು ನಿರ್ಬಂಧಿಸಿದ “18 ತಿಂಗಳ ವಿಚಾರ” ತಮಗೆ ತಿಳಿದಿತ್ತು, ಆದರೆ ಆ ಸಮಯದಲ್ಲಿ ಅವರ ಹಿನ್ನೆಲೆಯ ಬಗ್ಗೆ ಹೆಚ್ಚು ತನಿಖೆ ಮಾಡಲಿಲ್ಲ ಎಂದು ಅವರು ಹೇಳಿದರು.
ಮಾಜಿ ಪತ್ನಿ ಮೆಲಿಂಡಾ ಆತಂಕ ವ್ಯಕ್ತಪಡಿಸಿದ್ದರು
ತಮ್ಮ ಮಾಜಿ ಪತ್ನಿ ಮೆಲಿಂಡಾ ಫ್ರೆಂಚ್ ಗೇಟ್ಸ್ ಅವರು 2013 ರಲ್ಲೇ ಎಪ್ಸ್ಟೀನ್ ಬಗ್ಗೆ ಆತಂಕ ವ್ಯಕ್ತಪಡಿಸಿದ್ದರು ಎಂದು ಗೇಟ್ಸ್ ಹೇಳಿದರು. ಆ ಎಚ್ಚರಿಕೆಗಳ ಹೊರತಾಗಿಯೂ, ಅವರು ಕನಿಷ್ಠ ಇನ್ನೊಂದು ವರ್ಷ ಎಪ್ಸ್ಟೀನ್ ಜೊತೆಗಿನ ಒಡನಾಟವನ್ನು ಮುಂದುವರಿಸಿದ್ದರು.
”ಈಗ ನನಗೆ ತಿಳಿದಿರುವ ವಿಷಯಗಳನ್ನು ಗಮನಿಸಿದರೆ, ಇದು ಕೇವಲ ಅವರ ಹಳೆಯ ಅಪರಾಧಗಳ ವಿಷಯದಲ್ಲಿ ಮಾತ್ರವಲ್ಲದೆ, ಅವರು ಸತತವಾಗಿ ಕೆಟ್ಟ ನಡವಳಿಕೆ ಹೊಂದಿದ್ದರು ಎಂಬುದು ಸ್ಪಷ್ಟವಾಗಿರುವುದರಿಂದ ನೂರು ಪಟ್ಟು ಕೆಟ್ಟದಾಗಿ ಕಾಣಿಸುತ್ತಿದೆ,” ಎಂದು ಗೇಟ್ಸ್ ಹೇಳಿದ್ದನ್ನು WSJ ಉಲ್ಲೇಖಿಸಿದೆ.
ಎಪ್ಸ್ಟೀನ್ ಜೊತೆ ಸಮಯ ಕಳೆದಿದ್ದು ಮತ್ತು ಫೌಂಡೇಶನ್ ಅಧಿಕಾರಿಗಳನ್ನು ಸಭೆಗಳಿಗೆ ಕರೆತಂದಿದ್ದು ಒಂದು “ದೊಡ್ಡ ತಪ್ಪು” ಎಂದು ಅವರು ಬಣ್ಣಿಸಿದ್ದಾರೆ. “ನಾನು ಮಾಡಿದ ತಪ್ಪಿನಿಂದಾಗಿ ಈ ವಿಷಯಕ್ಕೆ ಎಳೆಯಲ್ಪಟ್ಟ ಇತರ ಜನರಲ್ಲಿ ನಾನು ಕ್ಷಮೆಯಾಚಿಸುತ್ತೇನೆ,” ಎಂದಿದ್ದಾರೆ.
ಎಪ್ಸ್ಟೀನ್ ಫೈಲ್ಗಳಲ್ಲಿ ಬಿಲ್ ಗೇಟ್ಸ್ ಹೆಸರು
ನ್ಯಾಯಾಂಗ ಇಲಾಖೆಯು ಲಕ್ಷಾಂತರ ಪುಟಗಳ ದಾಖಲೆಗಳನ್ನು ಬಿಡುಗಡೆ ಮಾಡಿದ ನಂತರ, ಎಪ್ಸ್ಟೀನ್ ಫೈಲ್ಗಳಲ್ಲಿರುವ ಗೇಟ್ಸ್ ಅವರ ಫೋಟೋಗಳು ಮತ್ತು ಉಲ್ಲೇಖಗಳು ಮತ್ತೆ ಗಮನ ಸೆಳೆದಿವೆ. ಕಳೆದ ವಾರ, ನವದೆಹಲಿಯಲ್ಲಿ ನಡೆದ ‘ಇಂಡಿಯಾ ಎಐ ಇಂಪ್ಯಾಕ್ಟ್ ಸಮ್ಮಿಟ್’ನ ಮುಖ್ಯ ಭಾಷಣದಿಂದ ಗೇಟ್ಸ್ ಹಿಂದೆ ಸರಿದಿದ್ದರು.
ಎಪ್ಸ್ಟೀನ್ ಪ್ರಕರಣದಲ್ಲಿ ಗೇಟ್ಸ್ ಮೇಲೆ ಅಧಿಕೃತವಾಗಿ ಯಾವುದೇ ತಪ್ಪು ಆರೋಪ ಹೊರಿಸಲಾಗಿಲ್ಲ. ಆದರೆ, ಬಿಡುಗಡೆಯಾದ ಫೈಲ್ಗಳಲ್ಲಿ ಗೇಟ್ಸ್ ಮತ್ತು ಎಪ್ಸ್ಟೀನ್ ನಡುವೆ ನಡೆದ ಇಮೇಲ್ ಸಂಭಾಷಣೆಗಳು, ಸಭೆಗಳ ದಾಖಲೆಗಳು ಮತ್ತು ವಿವಿಧ ಕಾರ್ಯಕ್ರಮಗಳಲ್ಲಿ ಅವರಿಬ್ಬರೂ ಒಟ್ಟಾಗಿರುವ ಫೋಟೋಗಳಿವೆ.
ಬಿಡುಗಡೆಯಾದ ಒಂದು ಕರಡು ಇಮೇಲ್ನಲ್ಲಿ ಎಪ್ಸ್ಟೀನ್ ಆಘಾತಕಾರಿ ಆರೋಪ ಮಾಡಿದ್ದು, “ರಷ್ಯಾದ ಹುಡುಗಿಯರೊಂದಿಗಿನ ಲೈಂಗಿಕ ಸಂಬಂಧದ ಪರಿಣಾಮಗಳನ್ನು ನಿಭಾಯಿಸಲು ಬಿಲ್ಗೆ ಡ್ರಗ್ಸ್ ಪಡೆಯಲು ಸಹಾಯ ಮಾಡುವುದರಿಂದ ಹಿಡಿದು, ವಿವಾಹಿತ ಮಹಿಳೆಯರೊಂದಿಗೆ ಅವರ ಅಕ್ರಮ ಭೇಟಿಗಳಿಗೆ ವ್ಯವಸ್ಥೆ ಮಾಡುವವರೆಗೆ ಗೇಟ್ಸ್ ಜೊತೆಗಿನ ಸಂಬಂಧವಿತ್ತು” ಎಂದು ಹೇಳಿಕೊಂಡಿದ್ದಾರೆ.
