ನವದೆಹಲಿ: ನೌಕರರ ಭವಿಷ್ಯ ನಿಧಿಯಲ್ಲಿ (ಇಪಿಎಫ್) ನಿಷ್ಕ್ರಿಯ ಖಾತೆಗಳು 2018-19ರಲ್ಲಿ 1,638.37 ಕೋಟಿ ರೂ.ಗಳಿಂದ 2023-24ರಲ್ಲಿ 8,505.23 ಕೋಟಿ ರೂ.ಗೆ ಐದು ಪಟ್ಟು ಹೆಚ್ಚಾಗಿದೆ ಎಂದು ಕಾರ್ಮಿಕ ಮತ್ತು ಉದ್ಯೋಗ ಸಚಿವಾಲಯ ಸೋಮವಾರ ಲೋಕಸಭೆಗೆ ಮಾಹಿತಿ ನೀಡಿದೆ.
ಕಾಂಗ್ರೆಸ್ ಸಂಸದ ಮನೀಶ್ ತಿವಾರಿ ಮತ್ತು ಎಐಎಂಐಎಂನ ಅಸಾದುದ್ದೀನ್ ಒವೈಸಿ ಅವರ ಪ್ರಶ್ನೆಗಳಿಗೆ ಲಿಖಿತ ಉತ್ತರ ನೀಡಿದ ರಾಜ್ಯ ಸಚಿವೆ ಶೋಭಾ ಕರಂದ್ಲಾಜೆ, ಇಪಿಎಫ್ನಲ್ಲಿ ಯಾವುದೇ ವಾರಸುದಾರರಿಲ್ಲದ ಖಾತೆಗಳಿಲ್ಲ ಅಂತ ತಿಳಿಸಿದ್ದಾರೆ.
2023-24ರಲ್ಲಿ 8,505.23 ಕೋಟಿ ರೂ.ಗಳ 21,55,387 ನಿಷ್ಕ್ರಿಯ ಖಾತೆಗಳನ್ನು ಪತ್ತೆಹಚ್ಚಲಾಗಿದ್ದು, 6,91,774 ನಿಷ್ಕ್ರಿಯ ಖಾತೆಗಳು 1,638.37 ಕೋಟಿ ರೂ.ಗಳನ್ನು ಹೊಂದಿವೆ ಎಂದು ಸಚಿವಾಲಯದ ಅಂಕಿ ಅಂಶಗಳು ತಿಳಿಸಿವೆ. ಖಾತೆಗಳ ಸಂಖ್ಯೆ ಮತ್ತು ಆ ಖಾತೆಗಳಲ್ಲಿನ ಮೊತ್ತವು ವರ್ಷಗಳಲ್ಲಿ ಹೆಚ್ಚಾಗಿದೆ. 2019-20ರಲ್ಲಿ 9,77,763 ಖಾತೆಗಳಲ್ಲಿ 2,827.29 ಕೋಟಿ ರೂ.ಗಳಿದ್ದರೆ, ಮುಂದಿನ ಹಣಕಾಸು ವರ್ಷದಲ್ಲಿ 3,930.85 ಕೋಟಿ ರೂ.ಗಳೊಂದಿಗೆ 11,72,923 ಖಾತೆಗಳಿಗೆ ಏರಿದೆ.
2021-22ರಲ್ಲಿ 13,41,848 ಖಾತೆಗಳಲ್ಲಿ 4,962.70 ಕೋಟಿ ರೂ.ಗಳಿದ್ದರೆ, 2022-23ರಲ್ಲಿ ಇದು 6,804.88 ಕೋಟಿ ರೂ.ಗಳೊಂದಿಗೆ 17,44,518 ಕ್ಕೆ ಏರಿದೆ.
“ಇಪಿಎಫ್ಒ (ನೌಕರರ ಭವಿಷ್ಯ ನಿಧಿ ಸಂಸ್ಥೆ) ನಿಷ್ಕ್ರಿಯ ಖಾತೆಗಳಲ್ಲಿ ಹೊಂದಿರುವ ಮೊತ್ತವನ್ನು ಸಂಬಂಧಪಟ್ಟ ಫಲಾನುಭವಿಗಳಿಗೆ ಹಿಂದಿರುಗಿಸುತ್ತದೆ” ಎಂದು ಕರಂದ್ಲಾಜೆ ಹೇಳಿದರು.
