ನವದೆಹಲಿ : ತಿರುಪತಿಯ ರಾಷ್ಟ್ರೀಯ ಸಂಸ್ಕೃತ ವಿಶ್ವವಿದ್ಯಾಲಯದ ಅಸೋಸಿಯೇಟ್ ಪ್ರೊಫೆಸರ್ ಸೋಮನಾಥ ದಾಸ್ ಬರೆದು ಗುಜರಾತ್‌ನ ವೆರಾವಲ್‌ನ ಸೋಮನಾಥ ಸಂಸ್ಕೃತ ವಿಶ್ವವಿದ್ಯಾಲಯ ಪ್ರಕಟಿಸಿದ 700 ಪುಟಗಳ ಕೃತಿ ‘ನರೇಂದ್ರ ಆರೋಹಣಂ’ ಅನ್ನು ಕಳೆದ ವಾರ ವೆರಾವಲ್‌ನಲ್ಲಿ ನಡೆದ ಯುವಜನೋತ್ಸವದಲ್ಲಿ ಬಿಡುಗಡೆ ಮಾಡಲಾಯಿತು.
ಈ ಪುಸ್ತಕವು 12 ಅಧ್ಯಾಯಗಳಲ್ಲಿ 1,200 ಶ್ಲೋಕಗಳನ್ನು ಹೊಂದಿದ್ದು, ಇಂಗ್ಲಿಷ್ ಮತ್ತು ಹಿಂದಿಯಲ್ಲಿ ವಿವರಣೆಗಳನ್ನು ಹೊಂದಿದೆ. ಇದು ಮೋದಿಯವರ ಬಾಲ್ಯದ ಚಟುವಟಿಕೆಗಳಿಂದ ಹಿಡಿದು, ಗುಜರಾತ್‌ನಲ್ಲಿ ಮುಖ್ಯಮಂತ್ರಿಯಾಗಿದ್ದ ಅವಧಿಯಿಂದ ಹಿಡಿದು ಪ್ರಧಾನಿಯಾಗಿ ಎರಡನೇ ಅವಧಿಯವರೆಗಿನ ಜೀವನ ಪಯಣವನ್ನು ವಿವರಿಸುತ್ತದೆ.
ಗುಜರಾತ್‌ನ ಸರಳ ಕುಟುಂಬದಲ್ಲಿ ಜನಿಸಿದ ಮೋದಿ ತಮ್ಮ ಜೀವನದಲ್ಲಿ ಅನೇಕ ಏರಿಳಿತಗಳನ್ನು ಕಂಡಿದ್ದಾರೆ ಎಂದು 48 ವರ್ಷದ ದಾಸ್ ಹೇಳಿದರು. ಇಂದು ಅವರು ಜಗತ್ತಿನ ಎಲ್ಲಾ ಯುವಕರಿಗೆ ಆರಾಧ್ಯ ದೈವವಾಗಿದ್ದಾರೆ. ಅವರ ರಾಜಕೀಯ ಪ್ರಯಾಣ ಮತ್ತು ಜೀವನ ಹೋರಾಟವು ಇತಿಹಾಸದಲ್ಲಿ ಯಾವಾಗಲೂ ಗುರುತಿಸಲ್ಪಡುತ್ತದೆ. ಆದ್ದರಿಂದ ನಾನು ಅಂತಹ ವ್ಯಕ್ತಿಯ ಜೀವನ ಮತ್ತು ಕೃತಿಗಳನ್ನು ಸಂಸ್ಕೃತದಲ್ಲಿ ಬರೆಯಲು ನಿರ್ಧರಿಸಿದ್ದೇನೆ ಪ್ರೊಫೆಸರ್ ಸೋಮನಾಥ ದಾಸ್ ಹೇಳಿದ್ದಾರೆ.
ಪುಸ್ತಕವನ್ನು ಪೂರ್ಣಗೊಳಿಸಲು ನಾಲ್ಕು ವರ್ಷಗಳು ಬೇಕಾಯಿತು
ಸಂಸ್ಕೃತ ಪ್ರಾಧ್ಯಾಪಕರು ಸೇರಿದಂತೆ ಅನೇಕ ಗಣ್ಯ ವ್ಯಕ್ತಿಗಳು ತಮ್ಮ ಅಭಿಪ್ರಾಯಗಳನ್ನು ವ್ಯಕ್ತಪಡಿಸಿರುವ ಈ ಪುಸ್ತಕವನ್ನು ಪೂರ್ಣಗೊಳಿಸಲು ದಾಸ್ ನಾಲ್ಕು ವರ್ಷಗಳಿಗಿಂತ ಹೆಚ್ಚು ಸಮಯ ತೆಗೆದುಕೊಂಡರು ಎಂದು ಹೇಳಿದರು. ತಾವು ನರೇಂದ್ರ ಮೋದಿಯವರನ್ನು ಎಂದಿಗೂ ಭೇಟಿ ಮಾಡಿಲ್ಲ ಆದರೆ ವಿವಿಧ ಪುಸ್ತಕಗಳು, ನಿಯತಕಾಲಿಕೆಗಳು, ಅವರ ಭಾಷಣಗಳು ಮತ್ತು ಮಾಸಿಕ ರೇಡಿಯೋ ಕಾರ್ಯಕ್ರಮ ಮನ್ ಕಿ ಬಾತ್ ಮತ್ತು ಇತರ ಮೂಲಗಳಿಂದ ಪ್ರಧಾನಿಯವರ ಜೀವನ ಮತ್ತು ಕೃತಿಗಳ ಬಗ್ಗೆ ವಸ್ತುಗಳನ್ನು ಸಂಗ್ರಹಿಸಿದ್ದೇನೆ ಎಂದು ದಾಸ್ ಹೇಳಿದರು.
