ಬೆಂಗಳೂರು: ಸ್ವಂತ ಉದ್ಯೋಗ ಮಾಡಬಯಸುವ ಗ್ರಾಮೀಣ ಭಾಗದ ಯುವಕ-ಯುವತಿಯರಿಗೆ ಕರ್ನಾಟಕ ಸರ್ಕಾರವು ಸುವರ್ಣಾವಕಾಶ ನೀಡುತ್ತಿದೆ. ನಿಮ್ಮದೇ ಗ್ರಾಮದಲ್ಲಿ ‘ಗ್ರಾಮ ಒನ್’ (Gram One) ಕೇಂದ್ರವನ್ನು ಆರಂಭಿಸುವ ಮೂಲಕ ಸಾರ್ವಜನಿಕರಿಗೆ ಸರ್ಕಾರದ ವಿವಿಧ ಸೇವೆಗಳನ್ನು ತಲುಪಿಸಬಹುದು. ಈ ಕೇಂದ್ರವನ್ನು ತೆರೆಯಲು ಬೇಕಾದ ಅರ್ಹತೆಗಳು, ದಾಖಲೆಗಳು ಮತ್ತು ಅರ್ಜಿ ಸಲ್ಲಿಸುವ ವಿಧಾನದ ಸಂಪೂರ್ಣ ವಿವರ ಇಲ್ಲಿದೆ.
ಅರ್ಹತಾ ಮಾನದಂಡಗಳು
ಗ್ರಾಮ ಒನ್ ಫ್ರಾಂಚೈಸಿ ಪಡೆಯಲು ಆಸಕ್ತರು ಈ ಕೆಳಗಿನ ಅರ್ಹತೆಗಳನ್ನು ಹೊಂದಿರಬೇಕು:
ವಿದ್ಯಾರ್ಹತೆ: ಕನಿಷ್ಠ ದ್ವಿತೀಯ ಪಿಯುಸಿ ಉತ್ತೀರ್ಣರಾಗಿರಬೇಕು. (ಡಿಪ್ಲೊಮಾ, ಐಟಿಐ, ಪದವಿ ಅಥವಾ ಸ್ನಾತಕೋತ್ತರ ಪದವೀಧರರಿಗೂ ಅವಕಾಶವಿದೆ).
ತಾಂತ್ರಿಕ ಜ್ಞಾನ: ಅಭ್ಯರ್ಥಿಗಳಿಗೆ ಕಂಪ್ಯೂಟರ್ ನಿರ್ವಹಣೆಯ ಜ್ಞಾನವಿರಬೇಕು.
ನಿವಾಸಿ: ಕರ್ನಾಟಕದ ಖಾಯಂ ನಿವಾಸಿಯಾಗಿರಬೇಕು.
ಹೂಡಿಕೆ: ಕೇಂದ್ರ ಸ್ಥಾಪಿಸಲು ಸುಮಾರು ₹1 ರಿಂದ ₹2 ಲಕ್ಷ ಬಂಡವಾಳ ಹೂಡುವ ಸಾಮರ್ಥ್ಯವಿರಬೇಕು.
ಅಗತ್ಯವಿರುವ ದಾಖಲೆಗಳು
ಅರ್ಜಿ ಸಲ್ಲಿಸುವಾಗ ಈ ಕೆಳಗಿನ ದಾಖಲೆಗಳನ್ನು ಸಿದ್ಧವಾಗಿಟ್ಟುಕೊಳ್ಳಿ:
ಆಧಾರ್ ಕಾರ್ಡ್ ಮತ್ತು ಪ್ಯಾನ್ ಕಾರ್ಡ್.
ಶೈಕ್ಷಣಿಕ ಅಂಕಪಟ್ಟಿಗಳು (PUC/Degree).
ಬ್ಯಾಂಕ್ ಪಾಸ್ ಬುಕ್ ಅಥವಾ ರದ್ದಾದ ಚೆಕ್ (Cancelled Cheque).
ವಿಳಾಸದ ಪುರಾವೆ.
ಪೊಲೀಸ್ ತಪಾಸಣಾ ಪ್ರಮಾಣ ಪತ್ರ (Police Verification Certificate).
ಇತ್ತೀಚಿನ ಭಾವಚಿತ್ರ.
ಅಗತ್ಯ ಮೂಲಸೌಕರ್ಯಗಳು
ಕೇಂದ್ರವನ್ನು ನಡೆಸಲು ನಿಮ್ಮ ಬಳಿ ಈ ಕೆಳಗಿನ ಉಪಕರಣಗಳು ಇರಬೇಕಾಗುತ್ತದೆ:
ಡೆಸ್ಕ್ ಟಾಪ್ ಅಥವಾ ಲ್ಯಾಪ್ ಟಾಪ್.
ಪ್ರಿಂಟರ್ ಮತ್ತು ಬಯೋಮೆಟ್ರಿಕ್ ಸ್ಕ್ಯಾನರ್.
ವೇಗದ ಇಂಟರ್ನೆಟ್ ಸೌಲಭ್ಯ.
ಕಚೇರಿ ವಿನ್ಯಾಸ: ಕೌಂಟರ್, ಆಪರೇಟರ್ ಕುರ್ಚಿ, ಗ್ರಾಹಕರಿಗಾಗಿ 4-5 ಕುರ್ಚಿಗಳು, ಉತ್ತಮ ಬೆಳಕು/ಗಾಳಿ, ಸಿಸಿಟಿವಿ ಮತ್ತು ಎಲ್ಸಿಡಿ ಟಿವಿ ಸೌಲಭ್ಯವಿರಬೇಕು.
ಅರ್ಜಿ ಸಲ್ಲಿಸುವುದು ಹೇಗೆ?
ಆಸಕ್ತರು ಆನ್ ಲೈನ್ ಮೂಲಕ ಈ ಕೆಳಗಿನ ಹಂತಗಳಲ್ಲಿ ಅರ್ಜಿ ಸಲ್ಲಿಸಬಹುದು:
ವೆಬ್ ಸೈಟ್: ಗ್ರಾಮ ಒನ್ ಅಧಿಕೃತ ವೆಬ್ಸೈಟ್ https://www.karnatakaone.gov.in/Public/GramOneFranchiseeTermsKn
ನೋಂದಣಿ: ‘ಈಗಲೇ ನೋಂದಾಯಿಸಿ’ (Register Now) ಮೇಲೆ ಕ್ಲಿಕ್ ಮಾಡಿ, ಮೊಬೈಲ್ ಸಂಖ್ಯೆ ನೀಡಿ OTP ಮೂಲಕ ಲಾಗಿನ್ ಆಗಿ.
ಮಾಹಿತಿ ಭರ್ತಿ: ವೈಯಕ್ತಿಕ ವಿವರ, ವಿಳಾಸ ಮತ್ತು ಶೈಕ್ಷಣಿಕ ಮಾಹಿತಿಯನ್ನು ನಿಖರವಾಗಿ ನಮೂದಿಸಿ.
ದಾಖಲೆ ಅಪ್ ಲೋಡ್: ಸ್ಕ್ಯಾನ್ ಮಾಡಿದ ಆಧಾರ್, ಪ್ಯಾನ್, ಅಂಕಪಟ್ಟಿ ಮತ್ತು ಫೋಟೋಗಳನ್ನು ಅಪ್ ಲೋಡ್ ಮಾಡಿ.
ಶುಲ್ಕ ಪಾವತಿ: ಅರ್ಜಿ ಶುಲ್ಕವಾಗಿ ₹100 ಪಾವತಿಸಬೇಕು (ಇದು ಮರುಪಾವತಿ ಮಾಡಲಾಗುವುದಿಲ್ಲ).
ಠೇವಣಿ: ನಿಮ್ಮ ಅರ್ಜಿ ಆಯ್ಕೆಯಾದಲ್ಲಿ, ₹5,000 ಭದ್ರತಾ ಠೇವಣಿಯನ್ನು (Refundable Security Deposit) ಪಾವತಿಸಬೇಕಾಗುತ್ತದೆ.
ಗಮನಿಸಿ: ಕೇಂದ್ರವು ಗ್ರಾಮದ ಪ್ರಮುಖ ಸ್ಥಳದಲ್ಲಿದ್ದು, ಸಾರ್ವಜನಿಕರಿಗೆ ಸುಲಭವಾಗಿ ತಲುಪುವಂತಿರಬೇಕು. ಹೆಚ್ಚಿನ ಮಾಹಿತಿಗಾಗಿ ನಿಮ್ಮ ತಾಲೂಕು ಕಚೇರಿ ಅಥವಾ ಜಿಲ್ಲಾಡಳಿತವನ್ನು ಸಂಪರ್ಕಿಸಬಹುದು.
