ಬೆಂಗಳೂರು : 2026-27ನೇ ಸಾಲಿಗೆ ಖಾಸಗಿ ಶಾಲೆಗಳಿಗೆ ಹೊಸದಾಗಿ ಶಾಶ್ವತ ಅನುದಾನರಹಿತ ಪೂರ್ವ ಪ್ರಾಥಮಿಕ / ಪ್ರಾಥಮಿಕ ಮತ್ತು ಪ್ರೌಢ ಶಾಲೆಗಳನ್ನು ಪ್ರಾರಂಭಿಸಲು ನೋಂದಣಿ (Registration) ಹಾಗೂ ಶಾಲಾ ಡೈಸ್ ಕೋಡ್ ಪಡೆಯುವ ಕುರಿತು ರಾಜ್ಯ ಸರ್ಕಾರ ಮಹತ್ವದ ಆದೇಶ ಹೊರಡಿಸಿದೆ.
2026-27ನೇ ಸಾಲಿಗೆ ಹೊಸದಾಗಿ ಖಾಸಗಿ ಅನುದಾನರಹಿತ ಪೂರ್ವ ಪ್ರಾಥಮಿಕ / ಕಿರಿಯ, ಹಿರಿಯ ಪ್ರಾಥಮಿಕ ಮತ್ತು ಪ್ರೌಢ ಶಾಲೆಗಳನ್ನು ಪ್ರಾರಂಭಿಸಲು ಉದ್ದೇಶಿಸಿರುವ ಸಂಸ್ಥೆಗಳು https://schooleducation.karnataka.gov.in/ಅರ್ಜಿಗಳನ್ನು ಸಲ್ಲಿಸಲು ಅವಕಾಶ ಕಲ್ಪಿಸಲಾಗಿದೆ. ಪ್ರಸ್ತುತ ಆನ್ ಲೈನ್ ಪ್ರಕ್ರಿಯೆಯಲ್ಲಿ ಕೆಲವು ಸುಧಾರಣೆಗಳು ಅಳವಡಿಸಿದ್ದು ಅದರಂತೆ ಪರಿಷ್ಕರಿಸಿ ಉಲ್ಲೇಖಿತ(9)ರಲ್ಲಿ ವಿವರವಾದ ಸುತ್ತೋಲೆ ಹೊರಡಿಸಲಾಗಿದೆ.
ಹೊಸ ಖಾಸಗಿ ಅನುದಾನರಹಿತ ಶಾಲೆಯ ನೋಂದಣಿಗಾಗಿ ಅಳವಡಿಸಿರುವ ಮಾನದಂಡಗಳು:-
ಉಲ್ಲೇಖ [5]ರ ತಿದ್ದುಪಡಿ ಆದೇಶದಂತೆ ಕೆಳಕಂಡ ಸಂಸ್ಥೆಗಳು ಹೊಸ ಶಾಲಾ ನೊಂದಣಿಗಾಗಿ ಅರ್ಜಿ ಸಲ್ಲಿಸಬಹುದಾಗಿದೆ.
1. ಕರ್ನಾಟಕ ಸಂಘಗಳ ನೋಂದಣಿ ಕಾಯ್ದೆ, 1960 [1960 ರ ಕರ್ನಾಟಕ ಕಾಯ್ದೆ 17] ಅಡಿಯಲ್ಲಿ ನೋಂದಾಯಿಸಲಾದ ಸಂಘ.
2. ಭಾರತೀಯ ಟ್ರಸ್ಟ್ ಕಾಯ್ದೆ 1882 ರ ಅಡಿಯಲ್ಲಿ ನೋಂದಾಯಿಸಲಾದ ದತ್ತಿ ಟ್ರಸ್ಟ್.
3. ಕಂಪನಿಗಳ ಕಾಯ್ದೆ 2013 ರ ಸೆಕ್ಷನ್ 8 ರ ಅಡಿಯಲ್ಲಿ ನೋಂದಾಯಿಸಲಾದ ಕಂಪನಿ [2013 ರ ಕೇಂದ್ರ ಕಾಯ್ದೆ 18]
4. ಸೀಮಿತ ಹೊಣೆಗಾರಿಕೆ ಪಾಲುದಾರಿಕೆ ಕಾಯ್ದೆ 2008 [2009 ರ ಕೇಂದ್ರ ಕಾಯ್ದೆ 6] ಅಡಿಯಲ್ಲಿ ನೋಂದಾಯಿಸಲಾದ ಲಾಭರಹಿತ ಉದ್ದೇಶದ ಸೀಮಿತ ಹೊಣೆಗಾರಿಕೆ ಪಾಲುದಾರಿಕೆ.
ಆದರೆ, ಆಸಕ್ತ ಸಂಘ ಸಂಸ್ಥೆಗಳು ಅರ್ಜಿ ಸಲ್ಲಿಸುವ ಮೊದಲು ವೆಬ್ಸೈಟ್ನಲ್ಲಿನ ಮಾನದಂಡಗಳನ್ನು ಗಮನಿಸಿ ಎಲ್ಲಾ ಪೂರಕ ದಾಖಲೆಗಳನ್ನು ಸಿದ್ದಪಡಿಸಿಕೊಂಡು ಅರ್ಜಿ ಸಲ್ಲಿಸುವ ಮೊದಲು ಎಲ್ಲಾ ದಾಖಲೆಗಳು / ಮಾಹಿತಿಗಳನ್ನು ಮತ್ತೊಮ್ಮೆ ಪರಿಶೀಲಿಸಿ ಖಚಿತಪಡಿಸಿಕೊಂಡು ಅರ್ಜಿ ಸಲ್ಲಿಸತಕ್ಕದ್ದು.
ಉಲ್ಲೇಖ[5]ರ ಅಧಿಸೂಚನೆಯಲ್ಲಿ ಶಾಲೆಗಳನ್ನು ಈ ಕೆಳಕಂಡಂತೆ ವಿಂಗಡಿಸಲಾಗಿದೆ. 1. ಪ್ರಾಥಮಿಕ ಶಾಲೆ – 01 ರಿಂದ 05 ಕಿರಿಯ ಪ್ರಾಥಮಿಕ ಶಾಲೆ, 1 ರಿಂದ 8ನೇ ತರಗತಿ ಹಿರಿಯ ಪ್ರಾಥಮಿಕ ಶಾಲೆ, ಹಾಗೂ 6 ರಿಂದ 8 ಹಿರಿಯ ಪ್ರಾಥಮಿಕ ಶಾಲೆ.
2. ಪ್ರೌಢ ಶಾಲೆ – 9 ಮತ್ತು 10ನೇ ತರಗತಿ.
2025-26ನೇ ಸಾಲಿನಲ್ಲಿ ಪೂರ್ವ ಪ್ರಾಥಮಿಕ, ಪ್ರಾಥಮಿಕ ಮತ್ತು ಪ್ರೌಢ ಶಾಲೆಯನ್ನು ಹೊಸದಾಗಿ ಪ್ರಾರಂಭಿಸಲು ಉದ್ದೇಶಿಸಿರುವ ಶಾಲಾ ಆಡಳಿತ ಮಂಡಳಿಗಳು ಉದ್ದೇಶಿತ ಸ್ಥಳದಲ್ಲಿ ಉಲ್ಲೇಖ [5]ರ ನಿಯಮ-4 [i] ರಲ್ಲಿ ನಿಗದಿಪಡಿಸಿರುವಂತೆ ಪ್ರತಿ ವಿದ್ಯಾರ್ಥಿಗೆ ಒಂದು ಚದರ ಮೀಟರ್ ಸ್ಥಳಾವಕಾಶವನ್ನು ಕಲ್ಪಿಸಬೇಕು ಹಾಗೂ ನಿಯಮ-4 [i] [iv]ರಲ್ಲಿ ನಿಗದಿಪಡಿಸಿರುವಂತೆ ಸ್ವಂತದ ಅಥವಾ ಕನಿಷ್ಟ 30 ವರ್ಷಗಳು ಭೋಗ್ಯಕ್ಕೆ ಪಡೆದ ಶಾಲಾ ಕಟ್ಟಡ ಮತ್ತು ಆಟದ ಮೈದಾನವನ್ನು ಕೆಳಕಂಡಂತೆ ಹೊಂದಿರಬೇಕಾಗಿರುತ್ತದೆ. ಹಾಗೂ ಸದರಿ ನಿವೇಶನವು ಶೈಕ್ಷಣಿಕ ಉದ್ದೇಶಕ್ಕಾಗಿ ಪರಿವರ್ತಿತ ನಿವೇಶನವಾಗಿರಬೇಕು.
ನೋಂದಣಿ ಮತ್ತು ಸಂಸ್ಕರಣಾ ಶುಲ್ಕದ ವಿವರಗಳು:
ಪೂರ್ವ ಪ್ರಾಥಮಿಕ ಶಾಲೆ: 2,500 ರೂ. ದಿಂದ 15,000 ರೂ. ವರೆಗೆ (ಪ್ರದೇಶಕ್ಕೆ ಅನುಗುಣವಾಗಿ).
ಪ್ರಾಥಮಿಕ ಶಾಲೆ: 50,000 ರೂ.
ಪ್ರೌಢಶಾಲೆ: 1,00,000 ರೂ.
ಪೂರ್ವ ಪ್ರಾಥಮಿಕದಿಂದ ಪ್ರೌಢಶಾಲೆಯವರೆಗೆ (ಬಿಬಿಎಂಪಿ ವ್ಯಾಪ್ತಿ): 1,65,000 ರೂ.
ಅರ್ಜಿ ಸಲ್ಲಿಸುವ ವಿಧಾನ ಮತ್ತು ಪ್ರಮುಖ ದಿನಾಂಕಗಳು:
ಆಸಕ್ತ ಸಂಸ್ಥೆಗಳು ಇಲಾಖೆಯ ಅಧಿಕೃತ ವೆಬ್ಸೈಟ್ schooleducation.karnataka.gov.in ಮೂಲಕ ಆನ್ಲೈನ್ ಅರ್ಜಿ ಸಲ್ಲಿಸಬೇಕು.
ನಗದು ಪಾವತಿ (Cash Mode): ಅರ್ಜಿ ಸಲ್ಲಿಸಲು 30-03-2026 ಕೊನೆಯ ದಿನಾಂಕ.
ಆನ್ಲೈನ್ ಪಾವತಿ (Online Payment): ಅರ್ಜಿ ಸಲ್ಲಿಸಲು 02-04-2026 ಕೊನೆಯ ದಿನಾಂಕ.
ಅರ್ಜಿಯೊಂದಿಗೆ ಶಾಲಾ ಕಟ್ಟಡದ ಫೋಟೋ ಮತ್ತು ವಿಡಿಯೋಗಳನ್ನು ಜಿಯೋ ಟ್ಯಾಗ್ (Geo-tag) ಮಾಡಿ ಅಪ್ಲೋಡ್ ಮಾಡುವುದು ಕಡ್ಡಾಯವಾಗಿದೆ.
ಸುರಕ್ಷತಾ ಕ್ರಮಗಳು:
ಹೊಸ ಶಾಲೆಗಳು ಕಡ್ಡಾಯವಾಗಿ ಪಿಡಬ್ಲ್ಯೂಡಿ (PWD) ಇಲಾಖೆಯಿಂದ ಕಟ್ಟಡ ಸುರಕ್ಷತಾ ಪ್ರಮಾಣಪತ್ರ ಮತ್ತು ಅಗ್ನಿಶಾಮಕ ಇಲಾಖೆಯಿಂದ ಸುರಕ್ಷತಾ ಪ್ರಮಾಣಪತ್ರವನ್ನು ಹೊಂದಿರಬೇಕು.
ಹೆಚ್ಚಿನ ಮಾಹಿತಿಗಾಗಿ ಸಂಬಂಧಪಟ್ಟ ಕ್ಷೇತ್ರ ಶಿಕ್ಷಣಾಧಿಕಾರಿಗಳ (BEO) ಅಥವಾ ಉಪನಿರ್ದೇಶಕರ (DDPI) ಕಚೇರಿಯನ್ನು ಸಂಪರ್ಕಿಸಲು ಸೂಚಿಸಲಾಗಿದೆ.
