ಬಾಗ್ದಾದ್:ಕಳೆದ ಒಂದು ವಾರದಿಂದ ಇರಾಕ್ನ ಉಗ್ರಗಾಮಿಗಳ ವಶದಲ್ಲಿದ್ದ ಅಮೆರಿಕದ ಸ್ವತಂತ್ರ ಪತ್ರಕರ್ತೆ ಶೆಲ್ಲಿ ಕಿಟಲ್ಸನ್ (49) ಅವರು ಮಂಗಳವಾರ ಸುರಕ್ಷಿತವಾಗಿ ಬಿಡುಗಡೆಯಾಗಿದ್ದಾರೆ. ಇರಾನ್ ಬೆಂಬಲಿತ ‘ಕತೈಬ್ ಹೆಜ್ಬುಲ್ಲಾ’ (Kataib Hezbollah) ಎಂಬ ಉಗ್ರ ಸಂಘಟನೆಯು ಇವರನ್ನು ಮಾರ್ಚ್ 31ರಂದು ಬಾಗ್ದಾದ್ನ ರಸ್ತೆಯೊಂದರಿಂದ ಅಪಹರಿಸಿತ್ತು.
ಶೆಲ್ಲಿ ಕಿಟಲ್ಸನ್ ಅವರ ಬಿಡುಗಡೆಗೆ ಪ್ರತಿಯಾಗಿ, ಇರಾಕ್ ಸರ್ಕಾರವು ತನ್ನ ವಶದಲ್ಲಿದ್ದ ಕತೈಬ್ ಹೆಜ್ಬುಲ್ಲಾ ಸಂಘಟನೆಯ ಕೆಲವು ಸದಸ್ಯರನ್ನು ಬಿಡುಗಡೆ ಮಾಡಿದೆ ಎಂದು ವರದಿಯಾಗಿದೆ.ಕಿಟಲ್ಸನ್ ಅವರನ್ನು ಬಾಗ್ದಾದ್ನಲ್ಲೇ ರಹಸ್ಯ ಸ್ಥಳದಲ್ಲಿ ಇರಿಸಲಾಗಿತ್ತು. ಅಮೆರಿಕದ ವಿದೇಶಾಂಗ ಕಾರ್ಯದರ್ಶಿ ಮಾರ್ಕೊ ರೂಬಿಯೋ ಅವರು ಪತ್ರಕರ್ತೆಯ ಬಿಡುಗಡೆಯನ್ನು ಖಚಿತಪಡಿಸಿದ್ದು, ಸಹಕರಿಸಿದ ಇರಾಕ್ ಸರ್ಕಾರಕ್ಕೆ ಧನ್ಯವಾದ ತಿಳಿಸಿದ್ದಾರೆ.
ಪತ್ರಕರ್ತೆಯನ್ನು ಬಿಡುಗಡೆ ಮಾಡುವಾಗ ಉಗ್ರ ಸಂಘಟನೆಯು ಒಂದು ಕಠಿಣ ಷರತ್ತು ವಿಧಿಸಿದೆ. ಕಿಟಲ್ಸನ್ ಅವರು ತಕ್ಷಣವೇ ಇರಾಕ್ ದೇಶವನ್ನು ಬಿಟ್ಟು ತೆರಳಬೇಕು ಎಂದು ಸಂಘಟನೆಯ ವಕ್ತಾರ ತಿಳಿಸಿದ್ದಾರೆ.ಶೆಲ್ಲಿ ಕಿಟಲ್ಸನ್ ಅವರಿಗೆ ಇರಾಕ್ನಲ್ಲಿ ಉಗ್ರರಿಂದ ಅಪಾಯವಿರುವ ಬಗ್ಗೆ ಅಮೆರಿಕ ಸರ್ಕಾರವು ಮೊದಲೇ ಹಲವು ಬಾರಿ ಎಚ್ಚರಿಕೆ ನೀಡಿತ್ತು. ಆದರೂ ಅವರು ವರದಿಗಾರಿಕೆಗಾಗಿ ಅಲ್ಲೇ ಉಳಿದುಕೊಂಡಿದ್ದರು.
