ನಾವು ಪ್ರತಿದಿನ ಸ್ನಾನಕ್ಕೆ ಬಳಸುವ ಸಬೂನು ಕೇವಲ ಕೊಳೆ ಮತ್ತು ಬೆವರಿನ ವಾಸನೆಯನ್ನು ಹೋಗಲಾಡಿಸಲು ಮಾತ್ರವಲ್ಲ, ನಮ್ಮ ಚರ್ಮದ ಆರೋಗ್ಯವನ್ನು ಕಾಪಾಡುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತದೆ. ಆದರೆ ಮಾರುಕಟ್ಟೆಯಲ್ಲಿ ಸಿಗುವ ಬಣ್ಣಬಣ್ಣದ ಮತ್ತು ಆಕರ್ಷಕ ಸುಗಂಧದ ಸಬೂನುಗಳು ನಿಮ್ಮ ಚರ್ಮಕ್ಕೆ ನಿಜಕ್ಕೂ ಸುರಕ್ಷಿತವೇ? ತಜ್ಞರ ಪ್ರಕಾರ, ಸಬೂನು ಖರೀದಿಸುವ ಮುನ್ನ ಅದರಲ್ಲಿರುವ ಅಂಶಗಳನ್ನು ಗಮನಿಸುವುದು ಬಹಳ ಮುಖ್ಯ.
ಸಬೂನುಗಳಲ್ಲಿರುವ ಅಪಾಯಕಾರಿ ರಾಸಾಯನಿಕಗಳು:
ಇಂದಿನ ಅನೇಕ ವಾಣಿಜ್ಯ ಸಬೂನುಗಳಲ್ಲಿ ಹಾನಿಕಾರಕ ರಾಸಾಯನಿಕಗಳಿರುತ್ತವೆ ಎಂದು ವರದಿ ತಿಳಿಸಿದೆ.
ಸೋಡಿಯಂ ಲಾರೆಲ್ ಸಲ್ಫೇಟ್ (SLS): ಇದು ಚರ್ಮದ ನೈಸರ್ಗಿಕ ತೈಲ ಅಂಶವನ್ನು ತೆಗೆದುಹಾಕಿ, ಚರ್ಮವು ಒಣಗುವಂತೆ ಮತ್ತು ಕಿರಿಕಿರಿ ಉಂಟಾಗುವಂತೆ ಮಾಡುತ್ತದೆ.
ಪ್ಯಾರಾಬೆನ್ ಮತ್ತು ಥಾಲೇಟ್ಸ್: ಇವು ಹಾರ್ಮೋನ್ ಅಸಮತೋಲನಕ್ಕೆ ಕಾರಣವಾಗಬಹುದು.
ಟ್ರೈಕ್ಲೋಸನ್: ಇದು ಬ್ಯಾಕ್ಟೀರಿಯಾಗಳನ್ನು ಕೊಲ್ಲುತ್ತದೆಯಾದರೂ, ಹಾರ್ಮೋನ್ ಸಮತೋಲನ ಮತ್ತು ಪರಿಸರಕ್ಕೆ ಹಾನಿಕಾರಕವಾಗಿದೆ.
ಸರಿಯಾದ ಸಬೂನು ಆಯ್ಕೆ ಮಾಡುವುದು ಹೇಗೆ?
ಆರೋಗ್ಯಕರ ಚರ್ಮಕ್ಕಾಗಿ ಈ ಕೆಳಗಿನ ಅಂಶಗಳಿರುವ ಸಬೂನನ್ನು ಆರಿಸಿಕೊಳ್ಳುವುದು ಉತ್ತಮ:
ನೈಸರ್ಗಿಕ ಪದಾರ್ಥಗಳು: ತೆಂಗಿನ ಎಣ್ಣೆ, ಶಿಯಾ ಬಟರ್ (Shea Butter), ಅಲೋವೆರಾ ಮತ್ತು ಜೇನುತುಪ್ಪದಂತಹ ನೈಸರ್ಗಿಕ ಅಂಶಗಳಿಂದ ತಯಾರಿಸಿದ ಸಬೂನುಗಳು ಚರ್ಮಕ್ಕೆ ಪೋಷಣೆ ನೀಡುತ್ತವೆ.
ಗ್ಲಿಸರಿನ್ ಅಂಶ: ಗ್ಲಿಸರಿನ್ ಗಾಳಿಯಲ್ಲಿರುವ ತೇವಾಂಶವನ್ನು ಹೀರಿಕೊಂಡು ಚರ್ಮವನ್ನು ಹೈಡ್ರೇಟ್ ಆಗಿ ಇಡುತ್ತದೆ. ಹ್ಯಾಂಡ್ಮೇಡ್ ಅಥವಾ ನೈಸರ್ಗಿಕ ಸಬೂನುಗಳಲ್ಲಿ ಗ್ಲಿಸರಿನ್ ಹೇರಳವಾಗಿರುತ್ತದೆ.
ಸೂಕ್ಷ್ಮ ಚರ್ಮಕ್ಕೆ ಓಟ್ಮೀಲ್: ಒಂದು ವೇಳೆ ನಿಮ್ಮದು ಬಹಳ ಸೂಕ್ಷ್ಮ ಚರ್ಮವಾಗಿದ್ದರೆ, ಓಟ್ಮೀಲ್ ಮಿಶ್ರಿತ ಸಬೂನುಗಳು ಉತ್ತಮ. ಇವು ಮೃತಕೋಶಗಳನ್ನು ನಿಧಾನವಾಗಿ ತೆಗೆದುಹಾಕಿ ಚರ್ಮಕ್ಕೆ ಆರಾಮ ನೀಡುತ್ತವೆ.
ತಜ್ಞರ ಸಲಹೆ:
ಕೇವಲ ಸಬೂನಿನ ಸುಗಂಧ ಅಥವಾ ಪ್ಯಾಕೇಜಿಂಗ್ ನೋಡಿ ಮರುಳಾಗಬೇಡಿ. ಸಲ್ಫೇಟ್ ಮತ್ತು ಪ್ಯಾರಾಬೆನ್ ಮುಕ್ತ ಸಬೂನುಗಳನ್ನು ಬಳಸಿ. ಚರ್ಮದ ಸಮಸ್ಯೆಗಳಿದ್ದಲ್ಲಿ ವೈದ್ಯರ ಸಲಹೆ ಪಡೆದು ಸೂಕ್ತವಾದ ಸೋಪ್ ಆರಿಸಿಕೊಳ್ಳುವುದು ಉತ್ತಮ.
