ಪಶ್ಚಿಮ ಏಷ್ಯಾ ಮತ್ತು ಇರಾನ್ ನಡುವಿನ ಯುದ್ಧದ ಉದ್ವಿಗ್ನತೆಯ ಪರಿಣಾಮವು ಇದೀಗ ಭಾರತದ ಅಡುಗೆಮನೆಗಳ ಮೇಲೂ ಬೀಳುವ ಸಾಧ್ಯತೆಯಿದೆ. ದೇಶದಲ್ಲಿ ಅಡುಗೆ ಅನಿಲ (LPG) ಕೊರತೆಯಾಗದಂತೆ ಮತ್ತು ಪೂರೈಕೆಯಲ್ಲಿ ವ್ಯತ್ಯಯವಾಗದಂತೆ ಸರ್ಕಾರ ಮುನ್ನೆಚ್ಚರಿಕಾ ಕ್ರಮಗಳನ್ನು ಕೈಗೊಂಡಿದೆ. ಗ್ಯಾಸ್ ಸಿಲಿಂಡರ್ಗಳ ಅನಗತ್ಯ ದಾಸ್ತಾನು ತಡೆಯಲು ಹಾಗೂ ಬ್ಲಾಕ್ ಮಾರ್ಕೆಟಿಂಗ್ಗೆ ಬ್ರೇಕ್ ಹಾಕಲು ಗ್ಯಾಸ್ ಬುಕಿಂಗ್ ನಿಯಮಗಳಲ್ಲಿ ಮಹತ್ವದ ಬದಲಾವಣೆಗಳನ್ನು ತರಲಾಗಿದೆ.
ಮಧ್ಯಮ ವರ್ಗದ ಕುಟುಂಬಗಳು ಸೇರಿದಂತೆ ಎಲ್ಲಾ ಗ್ರಾಹಕರು ಗಮನಿಸಲೇಬೇಕಾದ ಹೊಸ ನಿಯಮಗಳ ಮುಖ್ಯಾಂಶಗಳು ಹೀಗಿವೆ:
ಬುಕಿಂಗ್ ಅಂತರ 25 ದಿನಗಳಿಗೆ ಏರಿಕೆ: ಈ ಮೊದಲು ಎರಡು ಸಿಲಿಂಡರ್ಗಳನ್ನು ಬುಕ್ ಮಾಡುವ ನಡುವೆ 21 ದಿನಗಳ ಅಂತರವಿತ್ತು. ಇದೀಗ ಅದನ್ನು 25 ದಿನಗಳಿಗೆ ಹೆಚ್ಚಿಸಲಾಗಿದೆ. ಅಂದರೆ ಒಮ್ಮೆ ಸಿಲಿಂಡರ್ ಬುಕ್ ಮಾಡಿದ ಬಳಿಕ, ಎರಡನೇ ಬುಕಿಂಗ್ಗೆ ಕನಿಷ್ಠ 25 ದಿನಗಳವರೆಗೆ ಕಾಯಲೇಬೇಕು. ಗ್ಯಾಸ್ ಅಕ್ರಮ ದಾಸ್ತಾನು ತಡೆಯುವುದು ಮತ್ತು ಎಲ್ಲರಿಗೂ ಸಮಾನವಾಗಿ ಗ್ಯಾಸ್ ಪೂರೈಕೆಯಾಗುವಂತೆ ಮಾಡುವುದು ಇದರ ಉದ್ದೇಶ.
ಹೆಚ್ಚುವರಿ ಸಿಲಿಂಡರ್ ನಿಖರ ಕಾರಣ ಕಡ್ಡಾಯ: ಒಂದು ವೇಳೆ ನಿಮ್ಮ ವಾರ್ಷಿಕ ಕೋಟಾ ಮುಗಿದುಹೋಗಿ, ನಿಮಗೆ ಹೆಚ್ಚುವರಿ ಗ್ಯಾಸ್ ಅಗತ್ಯವಿದ್ದರೆ ‘Hello BPCL’ ನಂತಹ ಅಧಿಕೃತ ಮೊಬೈಲ್ ಆ್ಯಪ್ಗಳನ್ನು ಬಳಸಬೇಕು. ಮನೆಯಲ್ಲಿ ಮದುವೆ ಅಥವಾ ದೊಡ್ಡ ಸಮಾರಂಭದಂತಹ ನಿಖರವಾದ ಕಾರಣವನ್ನು ನೀವು ಆ್ಯಪ್ನಲ್ಲಿ ನಮೂದಿಸಬೇಕು. ಏಜೆನ್ಸಿ ಈ ಕಾರಣವನ್ನು ಪರಿಶೀಲಿಸಿದ ನಂತರವೇ ಹೆಚ್ಚುವರಿ ಸಿಲಿಂಡರ್ ಮಂಜೂರು ಮಾಡುತ್ತದೆ.
ಕಡ್ಡಾಯ ಒಟಿಪಿ (OTP) ವ್ಯವಸ್ಥೆ: ಸುರಕ್ಷತೆ ಮತ್ತು ಸರಿಯಾದ ವಿತರಣೆಗಾಗಿ OTP (DAC ಕೋಡ್) ವ್ಯವಸ್ಥೆಯನ್ನು ಕಡ್ಡಾಯಗೊಳಿಸಲಾಗಿದೆ. ಡೆಲಿವರಿ ಬಾಯ್ ಸಿಲಿಂಡರ್ ತಂದಾಗ, ನಿಮ್ಮ ನೋಂದಾಯಿತ ಮೊಬೈಲ್ ಸಂಖ್ಯೆಗೆ ಬರುವ ಒಟಿಪಿಯನ್ನು ಅವರಿಗೆ ನೀಡಿದರಷ್ಟೇ ವಿತರಣೆ ಖಚಿತವಾಗುತ್ತದೆ. ಇದರಿಂದ ಕಳ್ಳತನ ಹಾಗೂ ಕಾಳಸಂತೆಯಲ್ಲಿ ಗ್ಯಾಸ್ ಮಾರಾಟವಾಗುವುದನ್ನು ಶಾಶ್ವತವಾಗಿ ತಡೆಯಬಹುದು.
ನೋಂದಾಯಿತ ಮೊಬೈಲ್ನಿಂದಲೇ ಬುಕಿಂಗ್: ಇನ್ನು ಮುಂದೆ ನಿಮ್ಮ ನೋಂದಾಯಿತ (ರಿಜಿಸ್ಟರ್ಡ್) ಮೊಬೈಲ್ ಸಂಖ್ಯೆಯಿಂದ ಮಾತ್ರ ಗ್ಯಾಸ್ ಬುಕ್ ಮಾಡಬೇಕು. ಇತರ ಸಂಖ್ಯೆಗಳಿಂದ ಮಾಡಿದರೆ ಆ ಬುಕಿಂಗ್ಗಳನ್ನು ಮಾನ್ಯ ಮಾಡಲಾಗುವುದಿಲ್ಲ.
ಇ-ಕೆವೈಸಿ (e-KYC) ಕಡ್ಡಾಯ: ಎಲ್ಲಾ ಗ್ರಾಹಕರು ಇ-ಕೆವೈಸಿ (e-KYC) ಪ್ರಕ್ರಿಯೆಯನ್ನು ಪೂರ್ಣಗೊಳಿಸುವುದನ್ನು ಸರ್ಕಾರ ಕಡ್ಡಾಯಗೊಳಿಸಿದೆ. ಒಂದುವೇಳೆ ನೀವು ಇ-ಕೆವೈಸಿ ಮಾಡಿಸದಿದ್ದರೆ ಅಥವಾ ನಿಮ್ಮ ಮೊಬೈಲ್ ನಂಬರ್ ಅಪ್ಡೇಟ್ ಆಗದಿದ್ದರೆ, ನಿಮ್ಮ ಸಬ್ಸಿಡಿ ರದ್ದಾಗಬಹುದು. ಜೊತೆಗೆ ಮುಂದಿನ ದಿನಗಳಲ್ಲಿ ಸಿಲಿಂಡರ್ ಪಡೆಯಲು ತೊಂದರೆಯಾಗಬಹುದು. ಆದ್ದರಿಂದ ಆದಷ್ಟು ಬೇಗ ನಿಮ್ಮ ಗ್ಯಾಸ್ ಏಜೆನ್ಸಿಯನ್ನು ಸಂಪರ್ಕಿಸಿ ವಿವರಗಳನ್ನು ಅಪ್ಡೇಟ್ ಮಾಡಿಕೊಳ್ಳುವುದು ಸೂಕ್ತ.
ದೇಶದಲ್ಲಿ ಇಂಧನ ಭದ್ರತೆಯನ್ನು ಕಾಪಾಡುವುದು ಮತ್ತು ವದಂತಿಗಳಿಂದಾಗಿ ನಡೆಯುವ ಅಕ್ರಮ ದಾಸ್ತಾನನ್ನು ತಡೆಯುವುದು ಸರ್ಕಾರದ ಈ ಕಠಿಣ ನಿರ್ಧಾರದ ಹಿಂದಿನ ಗುರಿಯಾಗಿದೆ. ವಿತರಣಾ ವ್ಯವಸ್ಥೆ ಸುಗಮವಾಗಿ ಸಾಗಲು ಗ್ರಾಹಕರು ಈ ನಿಯಮಗಳನ್ನು ಪಾಲಿಸುವಂತೆ ಸೂಚಿಸಲಾಗಿದೆ. ಯಾವುದೇ ತಾಂತ್ರಿಕ ಸಮಸ್ಯೆ ಎದುರಾದರೆ ಅಧಿಕೃತ ಆ್ಯಪ್ ಅಥವಾ ಗ್ಯಾಸ್ ಏಜೆನ್ಸಿ ಸಹಾಯವಾಣಿಯನ್ನು ಸಂಪರ್ಕಿಸಬಹುದು.
