ಎಲ್ಪಿಜಿ ಸಿಲಿಂಡರ್ ವಿತರಣಾ ವ್ಯವಸ್ಥೆಯಲ್ಲಿ ಪಾರದರ್ಶಕತೆ ತರಲು ಇಂಡೇನ್ (Indane), ಹೆಚ್ಪಿಸಿಎಲ್ (HPCL) ಮತ್ತು ಭಾರತ್ ಗ್ಯಾಸ್ (Bharat Gas) ಕಂಪನಿಗಳು ಈಗ 100% ಡಿಎಸಿ (DAC – Delivery Authentication Code) ವ್ಯವಸ್ಥೆಯನ್ನು ಜಾರಿಗೆ ತಂದಿವೆ. ಈ ವ್ಯವಸ್ಥೆಯ ಮೂಲಕ ಸಿಲಿಂಡರ್ ದುರುಪಯೋಗವನ್ನು ತಡೆಗಟ್ಟಬಹುದಾಗಿದ್ದರೂ, ಇದನ್ನೇ ಬಂಡವಾಳ ಮಾಡಿಕೊಂಡಿರುವ ಸೈಬರ್ ವಂಚಕರು ಗ್ರಾಹಕರನ್ನು ಲೂಟಿ ಮಾಡಲು ಹೊಂಚು ಹಾಕುತ್ತಿದ್ದಾರೆ.
ಏನಿದು DAC ವ್ಯವಸ್ಥೆ?
ನೀವು ಸಿಲಿಂಡರ್ ಬುಕ್ ಮಾಡಿದಾಗ ನಿಮ್ಮ ನೋಂದಾಯಿತ ಮೊಬೈಲ್ ಸಂಖ್ಯೆಗೆ ಒಂದು ರಹಸ್ಯ ಕೋಡ್ (DAC) ಬರುತ್ತದೆ. ಸಿಲಿಂಡರ್ ವಿತರಣೆ ಮಾಡುವಾಗ ಡೆಲಿವರಿ ಬಾಯ್ಗೆ ಈ ಕೋಡ್ ನೀಡಿದರೆ ಮಾತ್ರ ವಿತರಣೆ ಪ್ರಕ್ರಿಯೆ ಪೂರ್ಣಗೊಳ್ಳುತ್ತದೆ. ಇದರಿಂದ ಸರಿಯಾದ ಗ್ರಾಹಕರಿಗೆ ಸಿಲಿಂಡರ್ ತಲುಪುವುದು ಖಚಿತವಾಗುತ್ತದೆ.
ನಕಲಿ DAC ಸಂದೇಶಗಳನ್ನು ಗುರುತಿಸುವುದು ಹೇಗೆ?
ಸೈಬರ್ ವಂಚಕರಿಂದ ಪಾರಾಗಲು ಗ್ಯಾಸ್ ಕಂಪನಿಗಳು ಕೆಲವು ಪ್ರಮುಖ ಮಾರ್ಗಸೂಚಿಗಳನ್ನು ಬಿಡುಗಡೆ ಮಾಡಿವೆ:
1. ಹೆಚ್ಪಿ ಗ್ಯಾಸ್ (HP Gas) ಗ್ರಾಹಕರಿಗೆ:
ಸಂದೇಶವು ಅಧಿಕೃತವಾಗಿ “VM-HPGASc-S” ಎಂಬ ಹೆಸರಿನಿಂದ ಬಂದಿದೆಯೇ ಎಂದು ಪರಿಶೀಲಿಸಿ.
ಅದರಲ್ಲಿ 4 ಅಂಕಿಗಳ OTP ಇರುತ್ತದೆ. ಇದನ್ನು ಸಿಲಿಂಡರ್ ಮನೆಗೆ ಬಂದಾಗ ಮಾತ್ರ ನೀಡಬೇಕು.
ಹೆಚ್ಪಿ ಗ್ಯಾಸ್ ಸಿಬ್ಬಂದಿ ಎಂದಿಗೂ ಫೋನ್ ಕರೆ, ವಾಟ್ಸಾಪ್ ಅಥವಾ ಯಾವುದೇ ಅನುಮಾನಾಸ್ಪದ ಲಿಂಕ್ಗಳ ಮೂಲಕ ಒಟಿಪಿ ಕೇಳುವುದಿಲ್ಲ.
2. ಇಂಡೇನ್ (Indane) ಗ್ರಾಹಕರಿಗೆ:
ಸಂದೇಶವು VK-INDANE ಅಥವಾ VM-INDANE ನಂತಹ ಅಧಿಕೃತ ಐಡಿಯಿಂದ ಬಂದಿರಲಿ.
ಇಂಡೇನ್ ಸಂದೇಶದಲ್ಲಿ ಸಾಮಾನ್ಯವಾಗಿ 6 ಅಂಕಿಗಳ DAC ಕೋಡ್ ಇರುತ್ತದೆ.
ಸಂದೇಶದಲ್ಲಿ ಬುಕಿಂಗ್ ಅಥವಾ ಇನ್ವಾಯ್ಸ್ ಸಂಖ್ಯೆ ಇದೆಯೇ ಎಂದು ಗಮನಿಸಿ.
ನೆನಪಿರಲಿ: ಸಿಲಿಂಡರ್ ಡೆಲಿವರಿ ಬಾಯ್ ನಿಮ್ಮ ಮನೆ ಬಾಗಿಲಿಗೆ ಬಂದಾಗ ಮಾತ್ರ ಡಿಎಸಿ ಕೋಡ್ ಹಂಚಿಕೊಳ್ಳಿ. ಅದಕ್ಕೂ ಮೊದಲು ಫೋನ್ನಲ್ಲಿ ಯಾರಿಗೂ ನೀಡಬೇಡಿ.
