ಲಂಡನ್: ನಾವು ಮನೆಯಲ್ಲಿ ಸಾಕುವ ನಾಯಿಗಳನ್ನು ಕುಟುಂಬದ ಸದಸ್ಯರಂತೆಯೇ ಪ್ರೀತಿಸುತ್ತೇವೆ. ಅವುಗಳು ಪ್ರೀತಿಯಿಂದ ನಮ್ಮನ್ನು ನೆಕ್ಕಿದಾಗ ನಮಗೂ ಸಂಭ್ರಮವೆನಿಸುತ್ತದೆ. ಆದರೆ, ಪ್ರೀತಿಯಿಂದ ನೆಕ್ಕುವ ನಾಲಗೆಯೇ ಸಾವಿನ ದೂತನಾಗಬಹುದು ಎಂಬ ಕಹಿ ಸತ್ಯವೊಂದು ಈಗ ಜಗತ್ತನ್ನು ಬೆಚ್ಚಿಬೀಳಿಸಿದೆ. ಬ್ರಿಟನ್ನ 52 ವರ್ಷದ ಮಂಜೀತ್ ಸಂಘ ಎಂಬ ಮಹಿಳೆ ತನ್ನ ಮುದ್ದಿನ ನಾಯಿ ನೆಕ್ಕಿದ ಕಾರಣಕ್ಕೆ ಇಂದು ತಮ್ಮ ಎರಡೂ ಕೈ ಮತ್ತು ಕಾಲುಗಳನ್ನು ಕಳೆದುಕೊಂಡಿದ್ದಾರೆ.
ಏನಿದು ಘಟನೆ?
2025ರ ಜುಲೈನಲ್ಲಿ ಕೆಲಸ ಮುಗಿಸಿ ಮನೆಗೆ ಮರಳಿದ್ದ ಮಂಜೀತ್ ಅವರಿಗೆ ಅಲ್ಪ ಸುಸ್ತು ಕಾಣಿಸಿಕೊಂಡಿತ್ತು. ಆದರೆ ಮರುದಿನವೇ ಪರಿಸ್ಥಿತಿ ವಿಕೋಪಕ್ಕೆ ತಿರುಗಿತು. ಮೈ ಕೈ ತಣ್ಣಗಾಗುವುದು, ತುಟಿಗಳು ನೀಲಿ ಬಣ್ಣಕ್ಕೆ ತಿರುಗುವುದು ಮತ್ತು ಉಸಿರಾಟದ ತೊಂದರೆ ಕಾಣಿಸಿಕೊಂಡಿತು. ಕೂಡಲೇ ಅವರನ್ನು ಆಸ್ಪತ್ರೆಗೆ ದಾಖಲಿಸಿದಾಗ ಶಾಕಿಂಗ್ ವಿಷಯವೊಂದು ಬೆಳಕಿಗೆ ಬಂದಿದೆ.
ಮಂಜೀತ್ ಅವರ ದೇಹಕ್ಕೆ ‘ಸೆಪ್ಸಿಸ್’ (Sepsis) ಎಂಬ ಭೀಕರ ಸೋಂಕು ತಗುಲಿತ್ತು. ಚಿಕಿತ್ಸೆಯ ಅವಧಿಯಲ್ಲಿ ಅವರು ಬರೋಬ್ಬರಿ 6 ಬಾರಿ ಹೃದಯಾಘಾತಕ್ಕೆ ಒಳಗಾಗಿದ್ದರು. ಸೋಂಕು ದೇಹದಾದ್ಯಂತ ಹರಡಿದ್ದರಿಂದ ಅವರ ಪ್ರಾಣ ಉಳಿಸಲು ವೈದ್ಯರು ಅನಿವಾರ್ಯವಾಗಿ ಮಂಜೀತ್ ಅವರ ಎರಡೂ ಕೈಗಳನ್ನು ಮತ್ತು ಮೊಣಕಾಲಿಗಿಂತ ಕೆಳಗಿನ ಎರಡೂ ಕಾಲುಗಳನ್ನು ಕತ್ತರಿಸಿ ತೆಗೆಯಬೇಕಾಯಿತು.
ನಾಯಿ ಕಚ್ಚಿರಲಿಲ್ಲ, ಕೇವಲ ನೆಕ್ಕಿತ್ತು!
ಅಚ್ಚರಿಯ ವಿಷಯವೆಂದರೆ, ಮಂಜೀತ್ ಅವರಿಗೆ ನಾಯಿ ಕಚ್ಚಿರಲಿಲ್ಲ. ಬದಲಾಗಿ ಅವರ ಮೈಮೇಲಿದ್ದ ಒಂದು ಸಣ್ಣ ಗಾಯದ ಮೇಲೆ ನಾಯಿ ಪ್ರೀತಿಯಿಂದ ನೆಕ್ಕಿತ್ತು. ನಾಯಿಗಳ ಲಾಲಾರಸದಲ್ಲಿ ‘ಕ್ಯಾಪ್ನೋಸೈಟೋಫಾಗಾ ಕ್ಯಾನಿಮೋರ್ಸಸ್’ (Capnocytophaga Canimorsus) ಎಂಬ ಬ್ಯಾಕ್ಟೀರಿಯಾ ಇರುತ್ತದೆ. ಸಾಮಾನ್ಯವಾಗಿ ಇದು ಅಪಾಯಕಾರಿಯಲ್ಲದಿದ್ದರೂ, ಮನುಷ್ಯನ ರಕ್ತದೊಳಗೆ ಸೇರಿದರೆ ಮಾರಕವಾಗಬಲ್ಲದು. ಮಂಜೀತ್ ಅವರ ಗಾಯದ ಮೂಲಕ ಈ ಬ್ಯಾಕ್ಟೀರಿಯಾ ರಕ್ತ ಸೇರಿ, ದೇಹದ ರೋಗನಿರೋಧಕ ಶಕ್ತಿಯೇ ಅಂಗಾಂಗಗಳ ಮೇಲೆ ದಾಳಿ ಮಾಡುವಂತೆ (ಸೆಪ್ಸಿಸ್) ಪ್ರೇರೇಪಿಸಿತ್ತು.
ಸಾಕುಪ್ರಾಣಿ ಪ್ರಿಯರೇ ಇರಲಿ ಎಚ್ಚರ!
ಈ ಘಟನೆ ಪ್ರಾಣಿಗಳನ್ನು ದ್ವೇಷಿಸಲು ಅಲ್ಲ, ಬದಲಾಗಿ ಮುನ್ನೆಚ್ಚರಿಕೆ ವಹಿಸಲು ನಮಗೆ ಪಾಠವಾಗಿದೆ. ನೀವು ಕೂಡ ಸಾಕುಪ್ರಾಣಿಗಳನ್ನು ಹೊಂದಿದ್ದರೆ ಈ ಕೆಳಗಿನ ಕ್ರಮಗಳನ್ನು ಪಾಲಿಸಿ:
ಗಾಯಗಳನ್ನು ದೂರವಿಡಿ: ನಿಮ್ಮ ಮೈಮೇಲೆ ಸಣ್ಣ ಗಾಯ ಅಥವಾ ಪರಚಿದ ಗುರುತುಗಳಿದ್ದರೆ ಅದನ್ನು ಸಾಕುಪ್ರಾಣಿಗಳು ನೆಕ್ಕದಂತೆ ಜಾಗ್ರತೆ ವಹಿಸಿ.
ತಕ್ಷಣದ ಸ್ವಚ್ಛತೆ: ಒಂದು ವೇಳೆ ನಾಯಿ ನೆಕ್ಕಿದರೆ ಆ ಭಾಗವನ್ನು ಸೋಪು ಮತ್ತು ನೀರಿನಿಂದ ತಕ್ಷಣ ತೊಳೆದುಕೊಳ್ಳಿ.
ಲಕ್ಷಣಗಳ ಮೇಲೆ ಗಮನವಿರಲಿ: ಪ್ರಾಣಿಗಳ ಸಂಪರ್ಕದ ನಂತರ ಅತಿಯಾದ ಜ್ವರ, ನಡುಕ, ಉಸಿರಾಟದ ತೊಂದರೆ ಅಥವಾ ಚರ್ಮದ ಮೇಲೆ ಕೆಂಪು ಕಲೆಗಳು ಕಾಣಿಸಿಕೊಂಡರೆ ನಿರ್ಲಕ್ಷಿಸದೆ ತಕ್ಷಣ ವೈದ್ಯರನ್ನು ಸಂಪರ್ಕಿಸಿ.
